މަހުލޫފަށް އެމްޑީޕީގެ އެތެރޭގެ އިންތިޚާބުގައި ވާދަކުރެވޭނެކަމަށް ނިންމައިފި
ވާދަކުރެވޭ ގޮތަށް ނިންމީ އެމްޑީޕީގެ އިސްތިއުނާފް ފަނޑިޔާރުންގެ މަޖިލީހުން
އަޙްމަދު މަހުލޫފް - ކުޅިވަރާ ބެހޭ ވަޒީރު
ކުޅިވަރާ ބެހޭ ވަޒީރު އަހުމަދު މަހުލޫފަށް އެމްޑީޕީގެ އެތެރޭގެ އިންތިޚާބުގައި ވާދަކުރެވޭ ގޮތަށް ކަނޑައަޅައިފިއެވެ.
މިގިތަށް ކަނޑައެޅީ ބުދަ ދުވަހު އޮތް އެމްޑީޕީގެ އިސްތިއުނާފް ފަނޑިޔާރުންގެ މަޖިލީހުންނެވެ. އިސްތިއުނާފް ފަނޑިޔާރުންގެ މަޖިލީހުން މިގޮތަށް ނިންމާފައި މިވަނީ، އެމްޑީޕީގެ ދާއިރާތަކުގެ އިންތިޚާބުގައި ވާދަކުރުމަށް ޝަރުތު ފުރިހަމަ ނުވާކަމަށް ނިންމާފައިވާ ނިންމުމާ ގުޅިގެން އެ މައްސަލަ އިސްތިއުނާފުގައި އޮވެމެ، ޖަވާބެއް ނުލިބޭތީ އެ މައްސަލަ އިލެކްޝަންސް ކޮމިޝަން (އީސީ)ށް ހުށަހަޅުއްވާފައި ވަނިކޮށެވެ.
މަހުލޫފު ވިދާޅުވެފައިވަނީ، އެމްޑީޕީގެ އިންތިޚާބާ ބެހޭ ކޮމިޓީ އަދި އިސްތިއުނާފު ފަޑިޔާރުންގެ މަޖިލީހަށް ހުށަހެޅި ޝަކުވާއަށް އެއްވެސް ޖަވާބެއް ނުލިބި އިންތިޚާބަށް އެންމެ 30 ދުވަހަށް ވެފައިވާތީ ސިޔާސީ ޕާޓީތަކުގެ ބެލެނިވެރިފަރާތް ކަމުގައިވާ އީސީއަށް މައްސަލަ ހުށަހަޅުއްވާފައިވާ ކަމަށެވެ.
މަހުލޫފު ވަނީ މި މައްސަލައިގައި ޖަވާބެއް ނުލިބި ތަފާތުކުރުންތަކެއް އެ ޕާޓީން ގެންގުޅޭ ކަމަށް ބުނެ ކަންބޮޑުވުންފާޅުކުރައްވާފައެވެ.
