އަޅުގަނޑަށް ޕިއޯނުކަން ދިނުމަށް ވެސް އެމްޑީޕީިން އެއްބަހެއް ނުވާނެ - ގާސިމް
ގާސިމަށް ކޮށްދެވޭނެ އެންމެ ބޮޑު ކަމަކީ، އަދުލުވެރިކަންމަތީގައި ރައްޔިތުންނަށް އެ މަނިކުފާނުގެ ބޮޑުވަޒީރު ކަމުގެ އިންގިލާބީ ބަދަލެއް ގެނެސްދިނުން
ރައްޔިތުންގެ މަޖިލީހުގެ މެމްބަރުން ތިއްބަވާ ގްރޫޕެއްގެ މެސެޖްތަކެއް
އެމަނިކުފާނަށް ޕިއޯނުކަން ދިނުމަށް ވެސް އެމްޑީޕީން އެއްބަސް ނުވާނެ ކަމަށް މާމިގިލީ ދާއިރާގެ ރައްޔިތުންގެ މަޖިލިސް މެމްބަރު ގާސިމް އިބްރާހީމް ވިދާޅުވެއްޖެއެވެ.
ގާސިމް މިހެން ވިދާޅުވީ، ރައްޔިތުންގެ މަޖިލީހުގެ މެމްބަރުން ތިއްބަވާ ވަޓްސްއަޕް ގްރޫޕްގައި ބޮޑުވަޒީރުކަން އެމަނިކުފާނަށް ދެެއްވަން ތާއީދުކަމަށް ބައެއް މެމްބަރުން ދެއްކެވި ވާހަކައަކާ ގުޅިގެންނެވެ.
ބިލެތްދޫ ދާއިރާގެ މެމްބަރު އަހްމަދު ހަލީމް ވިދާޅުވެފައިވަނީ ބޮޑުވަޒީރުކަން ކުރެއްވުމަށް ގާސިމަކީ ގާބިލް ބޭފުޅެއް ކަމަށެވެ. އަދި މި ރާއްޖެއަށް ގާސިމަށް ކޮށްދެވޭނެ އެންމެ ބޮޑު ކަމަކީ، އަދުލުވެރިކަންމަތީގައި ރައްޔިތުންނަށް އެ މަނިކުފާނުގެ ބޮޑުވަޒީރުކަމުގެ އިންގިލާބީ ބަދަލެއް ގެނެސްދިނުން ކަމުގައި އެ ގްރޫޕްގައި ހަލީމް ވިދާޅުވެފައިވެއެވެ.
މި ވާހަކައަށް ތާއީދު ނުކުރެވޭ ކަމަށް މާފަންނު މެދު ދާއިރާގެ އެމްޑީޕީގެ މެމްބަރު އިބްރާހީމް ރަޝީދު (ބޮންޑޭ) ވިދާޅުވިއެވެ. ބޮންޑޭގެ ވާހަކައަށް ގާސީމް ވަނީ ތާއީދު ކުރައްވާފައެވެ.
ބޮންޑޭގެ ވާހަކައަަށް ރައްދުދެއްވައި ހަލީމް ވިދާޅުވީ، މި ވާހަކައަކީ ބައެއް ބޭފުޅުންނަށް އުނދަގޫ ވާހަކައެއް ނަމަވެސް މިއީ ރާއްޖޭގެ ރައްޔިތުންނަށް ރަނގަޅު ގޮތް ކަމަށެވެ. އަދި ޒާތީ ނަޒަރަކުން ބެލީމަ ކަމުނުދާނެ ކަމަށެވެ.
ހަލީމްގެ ވާހަކައަށް ތާއީދުކުރައްވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވާހަކަ ދެއްކެވިއެވެ. އެމަނިުފާނު ވިދާޅުވީ، ގާސިމަކީ ބޮޑު ވަޒީރު ކަަމަށް ވަރަށް ރަނގަޅު ބޭފުޅެއް ކަމަށާއި، ހަލީމަކީ ދުރު ވިސްނޭ މީހެއް ކަމަށެވެ.
ގާސިމް ވިދާޅުވީ، ބޮޑު ވަޒީރުކަން ކީއްކުރަން ޕިއޯނުކަން އެމަނިކުފާނަށް ދޭން ވެސް އެމްޑީޕީން އެއްބަސްނުވާނެ ކަމަށެވެ. އެވަރު ދިނަސް ވަރަށް ރަނގަޅު ބަޔަކަށް ވާނެ ކަމަށެވެ.
މިއަށް ރައްދު ދެއްވައި، ރައީސް ނަޝީދު ވިދާޅުވީ، މިހާތަނަށް ވެސް ގާސިމް ބޭނުންވެލެއްވި ގޮތްތައް އެމްޑީޕީން ހަދާފައިވާނެ ކަމަށެވެ.
އިތުރަށް ހަލީމް ވިދާޅުވެފައިވަނީ، ރައްޖެ ބަދަލުކޮށް ޕާޓީ ނިޒާމް ގެނައުމަށް ގާސިމްގެ ހިއްސާ ބޮޑު ކަމަށާއި، މިއަދުވެސް ގާސިމަށް ސިޔާސީ ގޮތުން ހައްގު މިންވަރު ލިބެންޖެހޭ ކަމަށެވެ. އަދި އެ މިންވަރަކީ ބޮޑު ވަޒީރުކަން ކަމުގައި ވިދާޅުވިއެވެ. މިއަށް ތާއީދުކުރައްވާ ރައީސް ނަޝީދު ވިދާޅުވީ، ގާސިމް ކުރެއްވި މަސައްކަތް އެންމެ ގާތުން ފެނިވަޑައިގެންނެވީ އެމަނިކުފާނަށް ކަމަށެވެ.
އެމްޑީޕީގެ މެމްބަރުން މިހެން ވާހަކަދައްކަވަމުން ގެންދަވާއިރު، ރައީސް ނަޝީދު ގެންދަވަނީ ފައުޅުކަން ބޮޑު ގޮތެއްގައި ބޮޑުވަޒީރުކަމުގެ ޝައުގުވެރިކަން ފައުޅު ކުރައްވަމުންނެވެ.
