ޠާލިބާން ޖަމާއަތުން އަފްޣާނިސްތާނުގެ އައު ސަރުކާރު އިއުލާންކޮށްފިއެވެ.

ޠާލިބާން ޖަމާއަތުގެ ތަރުޖަމާން ވަނީ، އެޖަމާއަތުން އެކުލަވާލާ ސަރުކާރުގެ ލީޑަރަކީ، ޠާލިބާން ޖަމާއަތުގެ އެއް ބާނީ ކަމުގައިވާ، މުހައްމަދު ހަސަން އަޚުންދުކަން އިއުލާން ކުރައްވާފައެވެ. އައު ސަރުކާރުގެ އެއްވެސް މަގާމަކަށް އަންހެނަކު އައްޔަން ކޮށްފައެއް ނެތެވެ.

ލީޑަރުގެ އިތުރުން ޑެޕިއުޓީ ލީޑަރަކީ އަބްދުލް ޣަނީ ބަރާދަރު ކަން ވަނީ އިއުލާން ކުރައްވާފައެވެ. އަދި މި ދެބޭފުޅުންގެ އައު ކެބިނެޓްގެ މުހިންމު މަގާމްތަކުގެ ތެރޭގައި ހިމެނެނީ، އިންޓީރިއަރ މިނިސްޓަރެއްގެ ގޮތުގައި ހަމަޖައްސާފައިވަނީ އެމެރިކާއިން ޓެރަރިސްޓެއް ކަމަށް ކަޑައަޅައި، އޭނާގެ ބޮލަށް 10 މިލިއަން ޑޮލަރުގެ އިނާމެއް ހުށަހަޅާފައިވާ، ސިރާޖުއްދީން ހައްޤާނީއެވެ. އަދި ޑިފެންސް މިނިސްޓަރަކަށް ހަމަޖެހިގެން ދިޔައީ، ޠާލިބާން ޖަމާއަތުގެ އެއް ބާނީ ކަމުގައިވާ މުއްލާ އުމަރުގެ ދަރިފުޅު މުއްލާ މުހައްމަދު ޔައުޤޫބު އެވެެ.

ވަގުތީ މާލީ ވަޒީރަކަށް ހަމަޖައްސަވާފައިވަނީ، ހިދާޔަތުﷲ ބަދުރީއެވެ. ވަގުތީ ދިފާއީ ވަޒީރަކީ، މުއްލާ މުހައްމަދު ޔައުޤޫބް، ވަގުތީ ތައުލީމާ ބެހޭ ވަޒީރަކީ ޝެއިޚް މައުލްވޭ ނޫރުﷲ މުނީރެވެ.

އަފްޣާނިސްތާނުގެ އައު ސަރުކާރުގެ ކެބިނެޓް އިއުލާން ކުރައްވަމުން، ޠާލިބާން ޖަމާއަތުގެ ތަރުޖަމާން މުޖާހިދު ވިދާޅުވެފައިވަނީ، މިހާރު އިއުލާން ކުރެވިގެން މިދަނީ ވަގުތީ ކެބިނެޓެއް ކަމަށާއި، އެޖަމާއަތުން ކުރިޔަށް އޮތްތަނުގައި އަފްޣާނިސްތާނުގެ އެހެން ހިސާބުތަކުން ވެސް ސަރުކާރުގެ މުހިންމު މަގާމްތަކަށް މީހުން އައްޔަން ކުރާނެ ކަމަށެވެ.

ޠާލިބާން ޖަމާއަތުން އިއުލާން ކޮށްފައިވާ ކެބިނެޓްގައި އަންހެނުންނާ ބެހޭ ވުޒާރާއެއް ހިމަނާފައި ނުވާއިރު، ކެބިނެޓްގައި ވެސް އެއްވެސް އަންހެނަކު ނުހިމެނެއެވެ.