ގެއްލުނު ފޯރި އަލުން ގެނައުމަށް މިއީ ރަނުގެ ފުރުސަތެއް

ފުޓްބޯޅައަކީ ރާއްޖޭގެ އެއް ނަންބަރު ކުޅިވަރެވެ. އިހުން ފެށިގެންވެސް ދިވެހީންނަކީ ފުޓްބޯޅައަށް މަރުދޭ ބަޔެކެވެ. ހާއްސަކޮށް ދިވެހި ސަޕޯޓަރުންނަކީ ފުޓުބޯޅައިގައި 12 ވަނަ ކުޅުންތެރިޔާގެ ދައުރު އަދާކުރާ ބަޔެކެވެ. 12 ވަނަ ކުޅުންތެރިޔާއާއެކު ދިވެހީން ވަނީ އެތައް ކާމިޔާބީތަކެއްވެސް ހޯދާފައެވެ.

މީގެ ކުރިން އީރާން އަތުން 17-0 ގެ ނަތީޖާއަކުން ދިވެހީން ބަލިވި ދުވަހުވެސް ދިވެހި ސަޕޯޓަރުން ގައުމީ ޓީމާއެކު ދެގޮތެއް ނުވެ ތިއްބެވެ. އޭގެ ފަހުން ފީފާ ވޯލްޑް ކަޕް ކުޅުނު ކޮރެއާ ޓީމާ ދެކޮޅަށް ދިވެހި ފަސްގަނޑުގައި ކުޅެ އެއްވަރުކުރި މެޗުގައި އެންމެ މުހިންމު ދައުރެއް އަދާކުރީ ދިވެހި ސަޕޯޓަރުން ކަމަށް އެ ދުވަހު އެ މެޗު ކުޅުނު ކުޅުންތެރިން ބުނެއެވެ.

ފަހުގެ ތާރީޚަށް ބަލާނަމަ ދިވެހި ފުޓްބޯޅައިގެ ރަން އަހަރު ކަމަށް ގިނަ ބަޔަކު ދެކޭ 2008 ވަނަ އަހަރުގެ ސާފް ޗެމްޕިއަންޝިޕުގައި ހޯދި ރަން ކާމިޔާބީގެ ފަހަތުގައިވެސް ވަނީ ދިވެހި ސަޕޯޓަރުންނެވެ. އަމިއްލަ ގައުމާއި، އަވައްޓެރި ސްރީ ލަންކާގައި ކުޅުނު އެ މުބާރާތަކީ ރާއްޖޭން ފުޓްބޯޅައިން ހޯދި ފުރަތަމަ ކާމިޔާބީވެސްމެއެވެ.

"މިއީ އަހަރެމެންގެ ފަހަރު" ކިޔާ ގޮސް ބިޔަބޮޑު އިންޑިއާ ކުޑަކަކުލަށް ތިރިކޮށްލީ ދިވެހި ސަޕޯޓަރުންގެ ފޯރީގެ އަޑާއެކުގައެވެ. އެ މުބާރާތުގެ ގްރޫޕް ސްޓޭޖް މެޗުތައް ރާއްޖޭގައި ކުޅުނުއިރު، ގަލޮޅު ދަނޑު ފުރި ބާރުވިއެވެ. އޭގެ ފަހުން ސެމީ ފައިނަލާއި ފައިނަލް މެޗު ލަންކާގައި ކުޅުނެއް ކަމަކު، އެ ދެ މެޗުގައިވެސް ފެނިގެންދިޔައީ ދިވެހި ސަޕޯޓަރުންގެ ފޯރިއެވެ. އޭގެ ފަހުން 2018 ވަނަ އަހަރު ރާއްޖެއިން ތަށި ކާމިޔާބުކުރުމުގައިވެސް ދިވެހި ސަޕޯޓަރުންގެ ދައުރު ބޮޑެވެ.

އޭގެ 13 އަހަރު ފަހުން އަނެއްކާވެސް މިއޮތީ ސާފް ޗެމްޕިއަންޝިޕް ރާއްޖޭގައި ބޭއްވުމުގެ ފުރުސަތު ލިބިފައެވެ. ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް މީގެ ކުރިން ވަނީ މިއީ ފުޓްބޯޅައިގެ ގެއްލިފައިވާ ފޯރި އަލުން ގެނައުމަށް ދިވެހިންނަށް ލިބުނު ރަނުގެ ފުރުސަތެއް ކަމަށް ބުނެފައެވެ. އަދި ފުޓްބޯޅައަކީ ގައުމު އެއްބައިވަންތަ ކުރުވާ ކުޅިވަރެއް ކަމަށާއި، މީގެ ކުރިންވެސް އެކަން ދިވެހީން ސާބިތުކޮށްދީފައިވާ ކަމަށް ވަނީ ބުނެފައެވެ.

ތެދެކެވެ. 2008 ވަނަ އަހަރު އަދި 2018 ވަނަ އަހަރު ދިވެހީން ސާފުގެ ރަން ކާމިޔާބީ ހޯދީ ސިޔާސީ ގޮތުން ގައުމު ހަލަބޮލިވެފައިވާ ދަނޑިވަޅެއްގައެވެ. އެކަމަކު އެ ދެ ފަހަރުވެސް ދިވެހީންނަކީ އެއްބައިވަންތަ ބައެއްކަން ސާބިތުކޮށްދިނީ ފުޓްބޯޅައެވެ.

ރާއްޖޭގެ ގައުމީ ފުޓްބޯޅަ ޓީމުގެ ކޯޗު އަލީ ސުޒޭން ބުނީ ރާއްޖޭގެ އެއް ނަންބަރު ކުޅިވަރުގެ ގޮތުގައި ފުޓްބޯޅަ މިއަދާ ހަމައަށްވެސް އޮތީ ދިވެހި ސަޕޯޓަރުންގެ ސަބަބުން ކަމަށާއި، ކުރިއަށް އޮތް ސާފް ޗެމްޕިއަންޝިޕް މުބާރާތް ކާމިޔާބުކުރެވޭނީ ސަޕޯޓަރުންގެ ސަޕޯޓާއެކުގައި ކަމަށެވެ.

މީގެ އިތުރުން ރާއްޖޭގައި އުފެދުނު އެންމެ މޮޅު ގޯލްކީޕަރު އަދި މިހާރު ގައުމީ ޓީމުގެ އެސިސްޓަންޓް ކޯޗު އިމްރާން މުޙައްމަދު ބުނީ ފުޓްބޯޅައިން ދިވެހިން ހޯދި ހުރިހާ ކާމިޔާބީއެއްގެ ފަހަތުގައި ވަނީ 12 ވަނަ ކުޅުންތެރިޔާ ކަމަށާއި، އެހެންކަމުން ކުރިއަށް އޮތް ސާފް ޗެމްޕިއަންޝިޕަށްވެސް 12 ވަނަ ކުޅުންތެރިޔާ ދިވެހި ޓީމަށް މުހިންމުވާނެ ކަމަށެވެ.

ސާފް ޗެމްޕިއަންޝިޕުގެ ފޯރި އަލުން ނެގުމަށް މަސައްކަތްކުރަމުން އަންނައިރު، އެފްއޭއެމުން ވަނީ ސާފް ޗެމްޕިއަންޝިޕް ބަލަން ސަޕޯޓަރުން ދަނޑަށް ވެއްދުމާ ގުޅޭ ގޮތުން ހެލްތު ޕްރޮޓެކްޝަން އެޖެންސީ (އެޗްޕީއޭ) އާއެކު މަޝްވަރާކުރުމަށް ނިންމާފައެވެ. އަދި ސާފް ޗެމްޕިއަންޝިޕުގެ ކުރިން ސަޕޯޓަރުންގެ ފޯރި އިތުރުކުރުމުގެ ގޮތުން މިމަހު ޚާއްސަ ކެމްޕެއިނެއް ފަށަންވެސް ވަނީ ނިންމާފައެވެ.