ޠާލިބާން ޖަމާޢަތާއެކު ސުލްހައިގެ ވާހަކަތަކަށް ތައްޔާރުކަމަށް ޕަންޖްޝިރް ޕްރޮވިންސްގެ ހަނގުރާމަވެރި ލީޑަރު ބުނެފި
5 ސެޕްޓެމްބަރު 2021 | އާދީއްތަ 18:16ޠާލިބާން ޖަމާޢަތާ ދެމެދު ވަރުގަދަޔަށް ހަމަލާ ބަދަލުކުރެވެން ފަށާފައިވަނީ މިދިޔަ ހަފުތާގެ އަންގާރަދުވަހުގެ ރެއިން ފެށިގެން
އަޙުމަދު މަސްޢޫދު - ޕަންޖްޝިރް ޕްރޮވިންސްގެ ހަނގުރާމަވެރި ލީޑަރު
ޠާލިބާން ޖަމާޢަތާއެކު ސުލްހައިގެ ވާހަކަތަކަށް ތައްޔާރު ކަމަށް އަފްޣާނިސްތާނުގެ ޕަންޖްޝިރް ޕްރޮވިންސްގެ ހަނގުރާމަވެރި ލީޑަރު ބުނެފިއެވެެ.
ޕަންޖްޝިރް ޕްރޮވިންސްގެ ހަނގުރާމަވެރި ލީޑަރު އަޙުމަދު މަސްޢޫދު ބުނެފައިވަނީ، ހަނގުރާމަ ހުއްޓުމަށް ސުލްހައިގެ ވާހަަކަތަކަށް މަރުހަބާ ކިޔާ ކަމަށެވެ. އަފްއާނިސްތާނުގެ ޕަންޖްޝިރް ޕްރޮވިންސްގައި ތިބި ހަގުރާމަވެރިންނާ ޠާލިބާނުންނާ ދެމެދު ހިގަމުންދާ ކުރިމަތިލުންތަކުގައި، ދެފަރާތަށްވެސް ބޮޑެތި ގެއްލުންތަކެއް ދަނީ ލިބެމުންނެވެ. އާދީއްތަ ދުވަހު ޕަންޖްޝިރް ހަނުރާމަވެރިން ބުނެފައިވަނީ ޠާލިބާންގެ 1000އަށްވުރެ ގިނަ ހަނގުރާމަވެރިންނާއި ހަތިޔާރު އެމީހުންގެ ބާރުގެ ދަށަށް ގެންގޮސްފައިވާ ކަމަށެވެ.
އިދިކޮޅު ހަގުރާމަވެރިންނާއި ޠާލިބާން ޖަމާޢަތާ ދެމެދު ވަރުގަދައަށް ހަމަލާ ބަދަލުކުރެވެން ފަށާފައިވަނީ މިދިޔަ ހަފުތާގެ އަންގާރަ ދުވަހުގެ ރެއިން ފެށިގެންނެވެ. އަދި މި ހަމަލާތަކާ ގުޅިގެން މި ޕްރޮވިންސްގެ އެތައް ބަޔަކު މިހާރު އަވަށްތައް ދޫކޮށް ދާން ފަށާފައިވާ ކަަމަށްވެސް ރިޕޯޓުތައް ބުނެއެވެ.
ޠާލިބާން ޖަމާޢަތުން ފާއިތުވި އޮގަސްޓުމަހު އަފްޣާނިސްތާނުގެ ވެރިރަށް ކާބުލް އެމީހުންގެ ބާރުގެ ދަށަށް ގެނެސްފައިވީނަމަވެސް، އެގައުމުގެ ހުޅަނގު އުތުރުން އޮންނަ ޕަންޖްޝިރް ޕްރޮވިންސް އެމީހުންގެ ބާރުގެ ދަށަށް ގެންދެވިފައެއް ނުވެއެވެ.
އަދި މި ޕްރޮވިންސް މިހާރު ވެގެން ގޮސްފައިވަނީ، މީގެ އެތައް އަހަރެއް ކުރިން މަރާލާފައިވާ މަޝްހޫރު ހަގުރާމަވެރިޔާ އަޙުމަދު ޝާހު މަސްޢޫދުގެ 32 އަހަރުގެ ދަރިފުޅު އަޙުމަދު މަސްޢޫދުގެ ލީޑަރޝިޕްގައި، ޠާލިބާންއާ ދެކޮޅަށް ހަނގުރާމަކުރަމުންދާ މައި މަރުކަޒު ކަމުގައެވެ. އަޙުމަދު މަސްޢޫދުވަނީ ތާލިބާން ޖަމާޢަތާ ދެކޮޅަށް ހަނގުރާމަވެސް އިއުލާނު ކޮށްފައެވެ.
ޕަންޖްޝިރް ޕްރޮވިންސް އަލުން ހިފުމަށް ޠާލިބާން ޖަމާޢަތުގެ އެތައް ސަތޭގެ ހަގުރާމަވެރިންނެއް ވަނީ ފޮނުވާފައެވެ.
