އިންސާނީ ހައްގުތަކަށް މަސައްކަތް ކުރި މަޝްހޫރު ކެމްޕެއިނާ އަދި ޗައިނާގެ އެންމެ މަޝްހޫރު ސިޔާސީ ކުށްވެރިޔާ ލިޔު ޝިއަބޯގެ އަންހެނުން ކަމަށްވާ ލިޔު ޝިއާ،  ޗައިނާގެ ސަރުކާރުން "ގެއްލުވާލައިފައިވާ" ކަމަށް އެމެރިކާގައި ހަރަކާތްތެރިވާ އޭނާގެ ލޯޔަރު ޖެރަޑް ޖެންސާ ވިދާޅުވެއްޖެއެވެ. 

ޖެރަޑް ޖެންސާ ވިދާޅުވީ ލިޔު ޝިއާ، އޭނާގެ ފިރިމީހާ ލިޔު ޝިއަބޯ މަރުވުމުގެ އެއްދުވަސް ވަރުކުރިން ފެށިގެން އަދި މިހާތަނަށް އެއްވެސް މީހާކަށް އޭނާއާ މުއާމަލާތެއް ނުކުރެވޭނެ ކަމަށެވެ. އަދި ޗައިނާގެ ސަރުކާރުން ލިޔު ޝިއާ އެއްވެސް މީހަކަށް މުވާސަލާތެއް ނުކުރެވޭ ސަރަހައްދެއްގައި ހައްޔަރުކޮށްފައިވާ ކަމަށް ޖެންސާ ތުހުމަތު ކުރެއްވިއެވެ. ލިޔު ޝިއާގެ ފިރިމީހާ ލިޔު ޝިއަބޯ މަރުވެފައި ވަނީ މިއަހަރުގެ ޖުލައި 13 ގައެވެ. ޗައިނާ ސަރުކާރުން ލިޔު ޝިއާ "ގެއްލުވާލާފައިވާ" ކަމަށް އެމެރިކާގައި ބޭސްވެ ހުންނަ އޭނާގެ ވަކީލް ބުނެފައި ވަނީ އދ ގެ "ޔޫއެން ވާކިން ގްރޫޕް އޮން އެންފޯސްޑް އޯރ އިންވޮލަންޓްރީ ޑިސަޕިއަރެންސެސް" އަށް ދެއްވި ބަޔާނެއްގައެވެ. 

2010 ގައި ލިޔު ޝިއަބޯ އަށް ނޯބެލް ސުލްހައިގެ އިނާމު ލިބުނު ފަހުން އޭނާގެ އަންހެނުން ލިޔު ޝިއާ ހުރީ ދައުވާއެއް ނުކޮށް ގޭ ބަންދުގައެވެ. އެމެރިކާ، އީޔޫ އަދި އދ ގެ އިންސާނީ ހައްގުތަަކާ ބެހޭ ހައި ކޮމިޝަނާ ވަނީ ލިޔު ޝިއާ ގޭ ބަންދުން ދޫކޮށްލުމަށް ގޮވާލާފާއެވެ. 

އުމުރުން  61 އަހަރުގެ ލިޔު ޝިއަބޯ މަރުވެފައި ވަނީ މޭގެ ކެންސަރު ބަލީގައެވެ. އޭނާ މަރުވިއިރު އޭނާ ދިޔައީ  ސަރުކާރު ވައްޓާލަން އުޅުމުގެ ކުށުގަައި 11 އަހަރުގެ ޖަލު ހުކުމެއް ތަންފީޒު ކުރަމުންނެވެ. ޢޭނާ މަރުވުމުގެ ދެމަހެއްހާ ދުވަސް ކުރިން މެޑިކަލް ޕެރޯލްގެ ދަށުން ވަނީ ދޫކޮށްލާފައެވެ. 

ޖަލު ބަންދުގައި ހުރުމުގެ ސަބަބުން ޝިއަބޯ އަށް ލިބުނު ނޯބެލް ސުލްހައިގެ އިނާމު ބަލާ އޭނާއަށް ނުދެވުނު  އިރު ރިޕޯޓުތައް ބުނާ ގޮތުން އޭނާ އަށް އިނާމާ އެކު ލިބުނު 1.4 މިިލިއަން ޑޮަލަރުގެ ފައިސާ ވެސް ހޯދާފައެއް ނުވެއެވެ.