އިންޑިއާއަށް ބަދުބަސް ނުބުނާނަމަ ރައީސް ޔާމީނާއެކުވެސް މަސައްކަތް ކުރާނަން - ނަޝީދު
5 ސެޕްޓެމްބަރު 2021 | އާދީއްތަ 14:44ރައީސް މުހައްމަދު ނަޝީދާއި މަޝްވަރާ ކުރަންޖެހޭ އެއްވެސް ސަބަބެއްވެސް އަދި އެފަދަ ޝައުގުވެރިކަމެއްވެސް އިދިކޮޅު ކޯލިޝަނުގައި ނެތް
މޭ6ގެ ހަމަލާއަށްފަހު ރައީސް ނަޝީދު، ފުރަަތަމަ ފަހަރަށް ނޫސްވެރިންނާ ބައްދަުކުރެއްވުން
އިންޑިއާއަށް ބަދުބަސް ނުބުނާ ކަމަށްވާނަމަ ރައީސް ޔާމީނާއެކުވެސް ސިޔާސީ މަސައްކަތް ކުރައްވާނެ ކަމަށް އެމްޑީޕީގެ ރައީސް މުހައްމަދު ނަޝީދު ވިދަޅުވެއްޖެއެވެ.
ފަރުވާ ހޯދެއްވުމަށް ރާއްޖެއިން ބޭރަށް ވަޑައިގެންނެވި ފަހުން ފުރަތަމަ ފަހަރަށް ނޫސްވެރިންނާ އެމަނިކުފާނު ބައްދަލު ކުރެއްވީ އާދިއްތަ ދުވަހުއެވެ. އެ ބައްދަލުވުމުގައި ރައީސް ޔާމީނާއެކު ސިޔާސީ މަސައްކަތްތައް ކުރެއްވުމަށް ރައީސް ނަޝީދު ފައުޅުކުރައްވާފައިވާ ޚިޔާލުފުޅާ ގުޅިގެން ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ރައީސް ނަޝީދު ވިދާޅުވީ، އިންޑިއާއަށް އަދި އެއްވެސް ގައުމަކަށް އަމާޒުކޮށް ބަދުބަސް ބުނުމަކީ އެމަނިކުފާނު ތާއީދު ކުރައްވާ ކަމެއް ނޫން ކަމަށެވެ. އިންޑިއާއަށް ބަދުބަސް ނުބުނާނަަމަ ރައީސް ޔާމީނާއެކު މަސައްކަތް ކުރައްވާނެ ކަމަށާއި، ހުރިހާ ޕާޓީތަކަކުންވެސް ޚާރިޖީ ކަންކަމުގައި އެއްބަސްވާ އުސޫލްތަކެއް އޮންނަން ޖެހޭނެ ކަމަށެވެ.
ސިޔާސީ ޕޯޑިއަމްތަކުގައި ގައުމުތަކަށް އަމާޒުކޮށް ވާހަކަ ދެއްކުމަކީ ތާއިދު ކުރައްވާ ކަމެއް ނޫން ކަމަށާއި، އެއްވެސް ބަޔަކާއެކު ސިޔާސީ މަސައްކަތް ކުރެވޭނީ ސިޔާސީ ފިކުރަށް އައިސްގެން ކަމަށް ރައީސް ނަޝީދު ވިދާޅުވިއެވެ. އެގޮތުން އިންޑިއާއަށް ބަދުބަސް ނުބުނުމަކީ ކުރަން ޖެހޭ ކަމެއްގެ ގޮތުގައި އެމަނިކުފާނު ވިދާޅުވިއެވެ. އިދިކޮޅުގެ ކޯލިޝަންގެ ސިޔާސަތުތައްވެސް އެގޮތަށް ބައްޓަންވާން ޖެހޭ ކަމުގައި ވިދާޅުވިއެވެ. އެފަދަ ސިޔާސަތުތައް ވިސްނިވަޑައިގަންނަވާ ބޭފުޅުން އިދިކޮޅުންވެސް ނުކުމެ ވާހަކަދައްކަވަން ޖެހޭ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ގޮވާލެއްވީ، ހައްދުފަހަނައަޅައި ދިޔުމުގެ ވިސްނުމަށް އެއްވެސް ބަޔަކު ތާއީދު ނުކުރުމަށެވެ. ޑިމޮކްރެޓިކް އުސޫލުން ކަން ކުރުމަށް ތާއީދު ކުރުމަށާއި، ޓެރަރިޒަމަށް ޖާގަ ނުދިނުމަށް ގޮވާލެއްވިއެވެ.
ރައީސް ނަޝީދު މިހެން ވިދާޅުވެފައިވާއިރު ރައީސް މުހައްމަދު ނަޝީދާއި، މަޝްވަރާ ކުރަންޖެހޭ އެއްވެސް ސަބަބެއްވެސް އަދި އެފަދަ ޝައުގުވެރިކަމެއްވެސް އިދިކޮޅު ކޯލިޝަންގައި ނެތްކަމަށް އެކޯލިޝަން ހިންގުމާއި ހަވާލުވެހުންނެވި ޕީއެންސީގެ ރައީސް އަބްދުއްރަހީމް އަބްދުﷲ އާދިއްތަ ދުވަހުވަނީ ވިދާޅުވެފައެވެ. މީގެ ކުރިންވެސް ރައީސް ޔަމީނާއެކު ސިޔާސީ މަސައްކަތް ކުރެއްވުމުގެ ޝައުގުވެރިކަން ރައީސް ނަޝީދު ފައުޅުކުރެއްވުމުން އިދިކޮޅު ކޯލިޝަނުންވަނީ އެކަމަށް ޝައުގުވެރިކަން ނެތް ކަމަށް ބުނެފައެވެ. ރައީސް ނަޝީދުގެ ފިކުރަކީ އިދިކޮޅު ކޯލިޝަންގެ ފިކުރަކީ ދުވަހަކުވެސް އެއްކުރެވޭނެ ފިކުރެއް ނޫން ކަމަށް ބުނެފައިވެއެވެ.
