ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ދުވަހަކުވެސް ފަނޑިޔާރަކަށް ނުފޫޒު ނުފޯރުވާނެކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހު ވާޗުއަލްކޮށް ނޫސްވެރިންނާ ބައްދަލު ކުރައްވައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ނަޝީދު ވިދާޅުވީ، އެމަނިކުފާނު އަބަދުވެސް އިތުބާރު ކުރައްވާނީ އެމްޑީޕީއަށް ކަމަށެވެ. އަދި އެހެން ޕާޓީއަކަށް އިތުބާރެއް ވެސް ނުކުރައްވާކަން ފާހަގަކުރައްވައި ރައީސް ނަޝީދު ވިދާޅުވީ، ޚާއްސަކޮށް ރައީސް ޞާލިޙު ފަނޑިޔާރަކަށް ގުޅުއްވާކަމަށް ދުވަހަކުވެސް ވިދާޅެއް ނުވާނެ ކަމަށެވެ. އެއީ އެހެން ޕާޓީތަކުގެ ނިޒާމަކަށް ވެދާނެ ކަމަށާއި، ނަމަވެސް އެއީ އެމްޑީޕީގެ ނިޒާމެއް ނޫންކަމުގެ ޔަޤީންކަން ދެއްވާކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު އެހެން ވިދާޅުވީ ރައީސް އޮފީހުގެ ޗީފް އޮފް ސްޓާފް އަލީ ޒާހިރުގެ މައްޗަށް ފަނޑިޔާރުންނަށް ނުފޫޒު ފޯރުވާކަމުގެ ބޮޑެތި ތުހުމަތުތަކެއް ކުރެވިފައިވާ ދަނޑިވަޅެއްގައެވެ. ޚާއްސަ ގޮތެއްގައި ދާދި ފަހުން ލީކުވި އޯޑިއޯތަކާއި ކުރީގެ ބައެއް ފަނޑިޔާރުން ދާދި ފަހުން އާންމު ކުރެއްވި ބައެއް މައުލޫމާތުތަކާއެކު އެ ތުހުމަތުތަކުގެ އަޑުވަނީ އިތުރަށް ގަދަވެފައެވެ.
ރައީސް ނަޝީދު އިތުރަށް ވިދާޅުވީ، އިންސާފު ހޯދައިދިނުމަކީ އެމްޑީޕީ އަބަދުވެސް ވަކާލާތު ކުރާ ކަމެއް ކަމަށެވެ. އެގޮތުން ޝަރީއަތްތައް ވެސް އިންސާފާއެކު ކުރިއަށްދާން ޖެހޭނެކަން ފާހަގަކުރައްވައި ރައީސް ނަޝީދު ވިދާޅުވީ، ފަނޑިޔާރު ގެތަކުގެ އިތުބާރު ބޮޑުކުރުމަށް ޖޭއެސްސީން ގިނަ މަސައްކަތްތަކެއް ކުރަމުންދާ ކަމަށެވެ. އަދި އެކަމުގެ ނަތީޖާތައް ވެސް ފެންނަމުންދާކަމަށް ރައީސް ނަޝީދު ވިދާޅުވިއެވެ.
ކްރިމިނަލް ކޯޓުގެ ފަނޑިޔާރުންގެ އޯޑިއޯ ރެކޯޑިންގތަކެއް ކަމަށް ބުނެ މީޑިއާގައި ދައުރުވި އޯޑިއޯތަކުގެ މައްސަލައިގެ ތަހުގީގަށް އެ ފަނޑިޔާރުންގެ އޯޑިއޯ ސާމްޕަލް ވެސް ވަނީ ނަގާފައެވެ. ޖޭއެސްސީން ބުނީ އަމިއްލަ ފަރުދަކު ވިޔަސް، ދައުލަތުގެ ކަމެއް ހިންގުމާ ހަވާލުވެ ހުރި މީހަކު ވިޔަސް، ފަނޑިޔާރުންގެ މަސައްކަތާ ބެހި ނުފޫޒުފޯރުވާކަމަށް ކުރެވޭ ތުހުމަތުތަކަކީ، ފަނޑިޔާރު ގޭގެ އިތުބާރު ނެގެހެއްޓުމާއި، ފަނޑިޔާރު ގޭގެ މިނިވަންކަމާއި އިންސާފުވެރިކަން ކަށަވަރުކޮށް ދެމެހެއްޓުމަށްޓަކައި ވަކިން ޚާއްސަ ސަމާލުކަމެއް ދީގެން ކޮމިޝަނުން ތަހުގީގު ކުރާނެ ކަމެއް ކަމަށެވެ.
