ރައީސް ނަޝީދުގެ ބަޔާން ނެންގެވުމަށް ޕީޖީއާއި ފުލުހުން ޔޫކޭއަށް ވަޑައިގެންނެވުމަށް މަޝްވަރާ ކުރައްވަނީ
3 ސެޕްޓެމްބަރު 2021 | ހުކުރު 13:36ބަޔާން ދެއްވަން ތައްޔާރަށް ހުންނެވިކަން ރައީސް ނަޝީދުގެ ފަރާތްޕުޅުން ސިޓީއަކުން އެންގެވި
ޕީޖީ އޮފީހުން ބޭއްވި ނޫސްވެރިންގެ ބައްދަލުވުމެއްގައި ޕީޖީ ހުސައިން ޝަމީމް ވާހަކަ ދައްކަވަނީ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާގެ ތަހުގީގަށާއި، ޝަރީއަތަށް ރައީސް ނަޝީދުގެ ބަޔާން ނެންގެވުމަށް ޕްރޮސެކިއުޓަރ ޖެނެރަލް ހުސައިން ޝަމީމާއި ފުލުހުންގެ ޓީމެއް އިނގިރޭސިވިލާތަށް ވަޑައިގަތުމަށް ތައްޔާރުވެއްޖެއެވެ.
ރައީސް ނަޝީދުގެ ފަރާތުން އައްޔަން ކުރައްވާފައިވާ ވަކީލު އަހުމަދު ނާޒިމް އަބްދުއްސައްތާރު ވަނީ ރައީސް ނަޝީދު މިހާރު ހުންނެވީ ބަޔާން ދެއްވަން ތައްޔާރަށް ކަމަށާއި، މައްސަލައިގެ ތުހުމަތުކުރެވޭ މީހުންގެ ޝަރީއަތުގެ އިބްތިދާއީ މަރުހަލާ ނިމުމުގެ ކުރިން ބަޔާން ނެގުމަށް އެމަނިކުފާނު އެދިވަޑައިގަންނަވާކަން ފާހަގަ ކުރައްވާފައެވެ. އަދި ބަޔާން ދެއްވަން ތައްޔާރަށް ހުންނެވިކަން ރައީސް ނަޝީދުގެ ފަރާތްޕުޅުން ސިޓީއަކުން ވަނީ ޕީޖީއަށްވެސް އަންގަވާފައެވެ. ރާއްޖެއެމްވީއަށް އެނގިފައިވާ ގޮތުގައި ފުލުހުންގެ ޓީމަކާއެކު އިގިރޭސިވިލާތަށް ވަޑައިގެންނެވުމުގެ މަޝްވަރާތަކެއް ފުލުހުންނާއި ޕީޖީން މިހާރު ގެންދަވަނީ ކުރައްވަމުންނެވެ. ނަމަވެސް އިނގިރޭސިވިލާތަށް ވަޑައިގަންނަވާނެ ވަކި ތާރީޚެއް އަދި ކަނޑައަޅުއްވާފައެއް ނުވެއެވެ. އެގޮތުން ކޮވިޑް-19 ގެ ހާލަތާއި ދަތުރުފަތުރުގައި ހުރި ގޮންޖެހުންތަކާއެކު އެކަމަށް ލަސްތަކެއް އައިސްފައިވާކަން ރާއްޖެއެމްވީއަށް ވަނީ މައުލޫމާތު ލިބިފައެވެ.
ރައީސް ނަޝީދުގެ ބަޔާނެއް ވަރަށް މުހިއްމުކަމަށް ޕްރޮސެކިއުޓަރ ޖެނެރަލް ހުސައިން ޝަމީމު ވެސް ވަނީ ވިދާޅުވެފައެވެ. އަދި ފުލުހުން ވެސް ވަނީ މިގޮތަށް ބުނެފައެވެ. ޝަރީއަތަށް ރައީސް ނަޝީދުގެ ބަޔާނެއް މުހިއްމުވުމުން އެމަނިކުފާނުގެ ފަރާތުން ވަކީލަކަށް އަހުމަދު ނާޒިމް އަބްދުއްސައްތާރު ހަމަޖައްސައްވާވަފައިވަނީ އޮގަސްޓް މަހުގެ 5ވަނަ ދުވަހުއެވެ.
މި ހަމަލާއާ ގުޅިގެން މިހާތަނަށް ދައުވާ އުފުލާފައިވަނީ ހަމަލާއާ ގުޅިގެން އެންމެ ފުރަތަމަ ހައްޔަރުކުރި ތިން މީހުން ކަމަށްވާ އަހުމަދު އަދުހަމާއި މުޖާޒް އަހްމަދު އަދި ތަހުމީން އަހްމަދުގެ މައްޗަށާއި ބޮން ގޮއްވާލި ސައިކަލްގައި އެ ބޮން ހަރުކުރުމުގައި އަމަލީ ގޮތުން މަސައްކަތް ކުރި ކަމަށް ތުހުމަތުވާ އަލީ ހައިޝަމްގެ މައްޗަށެވެ.
6 މެއިގައި ރައީސް ނަޝީދަށް ދިން ހަމަލާ ރާވައި ހިންގި ފަރާތްތަކުގެ ތަހުގީގު އަދި ނުނިމި ކުރިއަށްދާކަމަށް ދިވެހި ފުލުހުންގެ ޚިދުމަތުން ބުނެފައިވުމާއެކު އެ ތަހުގީގު ނިމި، އެކަންރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި އެމަނިކުފާނު ރާއްޖެ ވަޑައިގަތުމަކީ އެމަނިކުފާނުގެ އާއިލާއާއި ހެޔޮއެދޭ އެތައް ބަޔަކާއި އަދި އެމަނިކުފާނު ވެސް ޖެހިލުންވާ ކަމެއްކަން ފާހަގަ ކުރައްވައި ރައީސް ނަޝީދު ވަނީ ރާއްޖެ ވަޑައިނުގެން މަޑު ކުރެއްވުމަށް ނިންމަވާފައެވެ.
