އައިޓީއެފްސީން އެސްޓީއޯއަށް 75 މިލިއަން ޑޮލަރުގެ ޓްރޭޑް ފެސިލިޓީއެއް
2 ސެޕްޓެމްބަރު 2021 | ބުރާސްފަތި 22:35އެއްބަސްވުމުގައި އެސްޓީއޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު
އިންޓަނޭޝަނަލް އިސްލާމިކް ޓްރޭޑް ފައިނޭންސިން ކޯޕަރޭޝަންގެ ސީއީއޯ ހާނީ ސާލެމް އަދި އެސްޓީއޯގެ މެނޭޖިން ޑިރެކްޓަރު ހުސެން އަމްރު
އިންޓަނޭޝަނަލް އިސްލާމިކް ޓްރޭޑް ފައިނޭންސިން ކޯޕަރޭޝަނުން ސްޓޭޓް ޓްރޭޑިން އޯގަނައިޒޭޝަން, އެސްޓީއޯއަށް 75 މިލިއަން އެމެރިކާ ޑޮލަރުގެ ޓްރޭޑް ފެސިލިޓީއެއް ހަމަޖައްސައި ދިނުމަށް އެއްބަސްވެއްޖެއެވެ.
އުޒުބެކިސްތާނުގެ ވެރިރަށް ތަޝްކެންތުގައި ކުރިޔަށްދާ އިސްލާމިކް ޑިވެލޮޕްމަންޓް ބޭންކް (އައިއެސްޑީބީ) ގްރޫޕުގެ އަހަރީ ބައްދަލުވުމުގެ ހަވާސާގައި ބުރާސްފަތި ދުވަހު ބޭއްވި ބައްދަލުވުމެއްގައި މި އެއްބަސްވުމުގައި އެސްޓީއޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހުސެން އަމްރު މުހައްމަދު ރަޝާދެވެ. އަދި ފައިނޭންސް ކޯޕަރޭޝަންގެ ފަރާތުން ސޮއިކުރެއްވީ ސީއީއޯ ހާނީ ސާލިމެވެ.
އިސްލާމިކް ފައިނޭންސިންގެ މި މުރާބަހާ ފެސިލިޓީ އެސްޓީއޯއިން ބޭނުންކުރުމަށް ހަމަޖެހިފައިވަނީ ތެލާއި ކާޑުގެ ބާވަތްތައް ގަތުމަށެވެ.
އެސްޓީއޯއަށް ދޫކުރި ފެސިލިޓީއާ ގުޅިގެން އައިޓީއެފްސީން ބުނީ މި ފައިސާއަކީ ކޮވިޑާ ގުޅިގެން ހީނަރުވެފައިވާ ރާއްޖޭގެ އިގުތިސާދު ދިރުވަން ކުރާ މަސައްކަތަށް މުހިންމު ފެސިލިޓީއެއް ކަމަށެވެ.
މި އެއްބަސްވުމުގެ ދަށުން ފައިސާ ދޭން އެއްބަސްވި އިސްލާމިކް ޓްރޭޑް ފައިނޭންސިން ކޯޕަރޭޝަނަކީ އައިއެސްޑީބީގެ ޓްރޭޑް ފައިނޭންސިން ގޮތްޕެވެ.
އެސްޓީއޯއިން ވަނީ 2019 ވަނަ އަހަރުން ފެށިގެން ކުންފުނީގެ ހިންގުމުގެ ޚަރަދު ކުޑަކޮށް ކުންފުނީގެ ފައިދާ އިތުރުކޮށްފައެވެ. މިއާއެކު އެކުންފުންޏާއެކު ވިޔަފާރީގެ މުއާމަލާތްތައް ހިންގާ ބޭރުގެ ކުންފުނިތަކުގެ އިތުބާރުވަނީ ބޮޑުވެފައެވެ.
އިސްލާމިކް ޓްރޭޑް ފައިނޭންސިން ކޯޕަރޭޝަނަކީ އެސްޓީއޯއަށް ޓްރޭޑް ފެސިލިޓީ ހަމަޖައްސައިދެމުންދާތާ އަހަރުތަކެއް ވެފައިވާ ކުންފުންޏަކަށްވާއިރު އަމްރުގެ މެނޭޖިން ޑިރެކްޓަރުކަމުގެ ދަށުން ދެ ކުންފުނީގެ ގުޅުން ވަނީ އިތުރަށް ބަދަހިވެފައެވެ.
