މިއަހަރުގެ ހޫނު މޫސުމުގެ ޓްރާންސްފަރ މާކެޓް ފެށުމުގެ ކުރިންވެސް ބެލެވިފައި އޮތީ މި ޓްރާންސްފަރ މާކެޓަކީ ކާމިޔާބު ޓްރާންސްފަރ މާކެޓަކަށް ވާނެކަމެވެ. ރިޕޯޓްތަކުގެ ފަލަ ސުރުޚީން ޖާގަ ހޯދާނެވަރުގެ ދެ ޓްރާންސްފަރއެއް މި ޓްރާންސްފަރ މާކެޓުގައި ފެންނާނެ ކަމަށް އޭރުވެސް ތުންތުން މަތިން ވާހަކަ ދެކެވުނެއެވެ. އޭގެ ހެއްކަކީ މި ޓްރާންސްފަރ މާކެޓުގައި މި ގަރުނުގެ އެންމެ މޮޅު ދެ ކުޅުންތެރިންކަމަށް ގިނަ ބަޔަކު ދެކެމުން އަންނަ ދެ ކުޅުންތެރިން ކްލަބް ބަދަލު ކުރުމެވެ.

ޅަ އުމުރުގައި ބާސާއާ ގުޅުނު މެސީ އެ ޓީމު ދޫކޮށް ޕީއެސްޖީއަށް ބަދަލުވިއިރު، މެސީއަކީ ބާސާގެ ތާރީޚުގައި އެ ޓީމަށް އެންމެ ގިނަ ލަނޑު ޖަހާދީފައިވާ އަދި އެއް ޓީމަކަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އަދި މެސީއަކީ ބާސާގެ ތާރީޚުގައި އެ ޓީމަށް އެންމެ ގިނަ މެޗު ކުޅެދީފައިވާ ކުޅުންތެރިޔާވެސްމެއެވެ.

ބާސެލޯނާ ދޫކޮށް ހިލޭ ޓްރާންސަފަރ އެއްގެ ދަށުން އުމުރުން 34 އަހަރުގެ މެސީ ފްރާންސްގެ ގަދަ ބާރު ޕީއެސްޖީއަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން މެސީ ޕީއެސްޖީއާއެކު ހަދާފައިވާ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ހޫނު މޫސުމުގައެވެ.

ޕޯޗުގަލުގެ ސްޕޯޓިން ލިޒްބަން ދޫކޮށް 2003 ވަނަ އަހަރު ރޮނާލްޑޯ އެންމެ ފުރަތަމަ ޔުނައިޓެޑާ ގުޅުނީ އޭރުގެ ރިކޯޑު ފީއެއް ކަމަށްވާ 12.24 މިލިޔަން ޕައުންޑަށެވެ. އެކަމަކު 2008 ވަނަ އަހަރު ރޮނާލްޑޯ ވަނީ ޔުނައިޓެޑް ދޫކޮށް ރެއާލް މެޑްރިޑަށް ބަދަލުވެފައެވެ. އެހެންކަމުން ރޮނާލްޑޯ އަލުން ޔުނައިޓެޑުގެ ޖާޒީގައި ފެނިގެންދާނީ 12 އަހަރުގެ މެދުކެނޑުމަކަށްފަހުއެވެ.

މި ޓްރާންސްފަރ މާކެޓުގައި ރޮނާލްޑޯ އެންމެ ބޮޑަށް ބަދަލުވާނެ ކަމަށް ބެލެވުނީ ވާދަވެރި މެންޗެސްޓާ ސިޓީއަށެވެ. އެކަމަކު ސަރ އެލެކްސް ފާގަސަންގެ އެދުމުގެ މަތީން ރޮނާލްޑޯ ގުޅުނީ މެންޗެސްޓާ ޔުނައިޓެޑަށެވެ.

ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ ބަލޮންޑޯ އެވޯޑް ފަސް ފަހަރު ހޯދާފައިވާ ރޮނާލްޑޯ އަލުން އަނބުރާ ޔުނައިޓެޑާ ގުޅުނުއިރު، އޭނާ ވަނީ އެ ޓީމުގައި ހުރެ ބަލޮންޑޯ އެވޯޑެއް ހޯދާފައެވެ. އަދި މީގެ ކުރިން ޔުނައިޓެޑަށް ކުޅެދިން ހަ އަހަރުގެ ތެރޭ ރޮނާލްޑޯ ވަނީ އެ ޓީމާއެކު ނުވަ ތަށި ކާމިޔާބުކޮށްފައެވެ. އަދި އެ ޓީމަށް ކުޅެދިން 292 މެޗުގައި ވަނީ 118 ލަނޑު ޖަހާފައެވެ.

ޕްރިމިއާ ލީގުގެ ތާރީޚުގައި އެންމެ އަގުބޮޑުކޮށް ކުލަބަކުން ހޯދި ކުޅުންތެރިޔަކީ ޖެކް ގްރީލިޝްއެވެ. ގްރީލިޝް ހޯދުމަށް ސިޓީން ވަނީ 100 މިލިއަން ޕައުންޑް ޚަރަދުކޮށްފައެވެ. އުމުރުން 25 އަހަރުގެ މިޑްފިލްޑަރު ވަނީ އެސްޓަން ވިލާގައި ތަފާތު މޮޅު ކުޅުމެއް މިދިޔަ ސީޒަނުގައި ދައްކައިފައެވެ. އެއާއިއެކު މިދިޔަ އަހަރުގެ ސެޕްޓެމްބަރު މަހުގެ ކުރީކޮޅު ކުޅުނު ޔުއެފާ ނޭޝަނަލް ލީގުގެ މެޗުތަކަށް އެކުލަވާލި އިންގްލޭންޑްގެ ގައުމީ ސްކޮޑުން ފުރަތަމަ ފަހަރަށް އޭނާ ވަނީ ފުރުސަތު ހޯދާފައެވެ. އަދި ނިމިދިޔަ ޔޫރޯ ފުޓުބޯޅަ މުބާރާތުގެ ރަނަރަޕްކަން ހޯދި އިންގްލެންޑްގެ ޓީމުގައިވެސް ގްރީލިޝް ހިމެނެއެވެ.

އިންޓަ މިލާން ދޫކޮށް ލުކާކޫ އަލުން އެނބުރި ޗެލްސީއާ ގުޅުނީ 97.5 މިލިއަން ޕައުންޑްގެ ފީއަކަށެވެ. ޗެލްސީއާ އޭނާ ގުޅުނީ ފަސް އަހަރުގެ އެއްބަސްވުމެއްގެ ދަށުންނެވެ. އެއާއެކު ލުކާކޫ ވެފައިވަނީ ޗެލްސީގެ ތާރީޚުގައި އެންމެ އަގުބޮޑުކޮށް ގެނައި ކުޅުންތެރިޔާއަށެވެ. އަދި ލުކާކޫ އަކީ ޕްރިމިއާ ލީގުގެ ކުލަބަކުން ދެވަނައަށް އެންމެ އަގުބޮޑުކޮށް ހޯދި ކުޅުންތެރިޔާއެވެ.

މީގެ އިތުރުން މި ޑީލާއެކު ލުކާކޫ ވެފައިވަނީ ޖުމްލަ ޓްރާންސްފާ ފީތަކަށް ބަލާއިރު ދުނިޔޭގެ އެންމެ އަގުބޮޑު ކުޅުންތެރިޔާއަށެވެ. އެގޮތުން ލުކާކޫގެ ހުރިހާ ޓްރާންސްފާ ފީތަކަށް ބަލާއިރު އޭނާގެ ޖުމްލަ އަގަކީ 291 މިލިޔަން ޕައުންޑެވެ. މީގެ ކުރިން ޖުމްލަ ޓްރާންސްފާ ފީތަކަށް ބަލާއިރު އެންމެ އަގުބޮޑު ކުޅުންތެރިއަކީ ބްރެޒިލުގެ ތަރި ނޭމާއެވެ. ނޭމާގެ ޓްރާންސްފާ ފީތަކުގެ ޖުމްލަ އަދަދަކީ 279 މިލިޔަން ޕައުންޑެވެ.

މި ފަހަކަށް އައިސް ތަފާތު މޮޅު ކުޅުމެއް ދައްކަމުން އަންނަ ލުކާކޫ ވަނީ އިންޓައާއެކު މިދިޔަ ސީޒަނުގެ އިޓާލިއަން ލީގު ކާމިޔާބުކޮށްފައެވެ. އަދި އިންޓަގައި ހޭދަކުރި ދެ ސީޒަނުގައިވެސް ލުކާކޫ މޮޅު ކުޅުމެއް ދެއްކިއިރު، އޭނާ ވަނީ އެ ޓީމަށް ކުޅެދިން 95 މެޗުގައި 64 ލަނޑު ޖަހާފައެވެ.

މި ހަތަރު ކުޅުންތެރިންގެ ޓްރާންސްފަރއަށް ބަލާލި ކަމުގައި ވިޔަސް ނިމިދިޔަ ހޫނު މޫސުމުގެ ޓްރާންސްފަރ މާކެޓްގެ ކާމިޔާބީ ފެންނާނެއެވެ. އެކަމަކު މިއީ ބައެއް ކްލަބްތަކަށް ނާކާމިޔާބު ޓްރާންސްފަރ މާކެޓެއް ކަމުގައި ބުނެވިދާނެއެވެ. އެގޮތުން ޔޫރަޕްގެ ގަދަ ބާރު ސްޕެއިންގެ ރެއާލް މެޑްރިޑަށް މިއީ ނާކާމިޔާބު ޓްރާންސްފަރ މާކެޓެކެވެ. މި ޓްރާންސްފަރ މާކެޓުގައި އެ ޓީމުން އެންމެ ބޮޑަށް ފާރަލީ ކުޅުންތެރިޔަކީ ފްރާންސްގެ ޒުވާން ތަރި ކީލިއަން އެމްބާޕޭއެވެ. ރެއާލުން އެމްބާޕޭ ހޯދުމަށް 220 މިލިއަން ޕައުންޑްގެ ބިޑެއް ހުށަހެޅުމުންވެސް، ޕީއެސްޖީއިން ވަނީ އެމްބާޕޭ ވިއްކުމަށް ދެކޮޅު ހަދާފައެވެ.