އައްޑަނަ ޖަލްސާއަކީ މި ވެރިކަމުގެ ނިމުމުގެ ފެށުން: ޕީޕީއެމް ޒުވާނުން
ގައުމު ސަލާމަތް ކުރުމަކީ ކޮންމެ މީހެއްގެވެސް ޒިންމާއެއްކަމަށް ބުނެފައިވޭ
އިދިކޮޅު ޒުވާނުންގެ ގޮފިން ބޭއްވި ނޫސްވެރިންގެ ބައްދަލުވުން
ސެޕްޓެމްބަރު މަހުގެ 3 ވަނަ ދުވަހު އިދިކޮޅުން ބާއްވާ "އައްޑަނަ" ޖަލްސާއަކީ މިހިނގާ ވެރިކަން ނިމުމުގެ ފެށުންކަމަށް ޕީޕީއެމްގެ ޒުވާނުންގެ ގޮފިން ބުނެފިއެވެ.
ބުދަ ދުވަހު ނޫސްވެރިންނާ ބައްދަލުކޮށް ޕީޕީއެމް ޒުވާނުންގެ ހުރި ކަންބޮޑުވުންތައް ވަނީ ހިއްސާ ކޮށްފައެވެ. އެގޮތުން ރާއްޖޭގެ އެކި ކަންކޮޅުތަކުން ޒުވާނުންގެ ކަންބޮޑުވުންތައް މި ސަރުކާރާއިމެދު ހުރިކަން ފާހަގަކޮށް ޕީޕީއެމް ޒުވާނުންގެ ގޮފިން ވަނީ، އިގްތިސާދު ހީނަރުވުމާއި، ބޭރުގެ އިންވެސްޓަރުންގެ އިތުބާރު ރާއްޖެއަށް ނެތްކަމުގެ ޝަކުވާއާއި، ބޯހިޔާވަހިކަމުގެ އުއްމީދުތަކަށް ފަސް އެޅިފައިވާ ކަމުގެ ޝަކުވާތައް ލިބެމުންދާކަން ފާހަގަކޮށްފައެވެ.
އޭގެ އިތުރުން، ބިދޭސީންނަށް ޒުވާނުންގެ ވަޒީފާތައް ހިބަކުރަމުންދާ ކަމުގެ ޝަކުވާވެސް ލިބެމުންދާކަމަށް ބުނެފައިވެއެވެ.
ޕީޕީއެމް ޒުވާނުންގެ ގޮފިން ވަނީ މިއަދު މި ގައުމުން މިނިވަންކަމުގެ އެއްވެސް އިހުސާސެއް ނުކުރެވޭކަމަށް ބުނެފައެވެ. އެގޮތުން ނިދިން ހޭލާއިރު ގައުމުގެ ދިވެހި ދިދަ ހުންނާނެކަމުގެ ޔަގީންކަންވެސް ނޯންނަކަމަށް ބުނެފައިވެއެވެ. އަދި ގައުމު ސަލާމަތް ކުރުމަކީ ކޮންމެ މީހެއްގެވެސް ޒިންމާއެއްކަން ފާހަގަކޮށް ޕީޕީއެމް އިން ވަނީ އައްޑަނަ ޖަލްސާގައި ވީހާވެސް ގިނަ މީހުން ބައިވެރިވުމަށް އެދިފައެވެ. އަދި މި ޖަލްސާއަކީ މިހިނގާ ވެރިކަން ނިމުމުގެ ފެށުމުގެ ގޮތުގައި ޕީޕީއެމް ޒުވާނުންގެ ގޮފިން ވަނީ ސިފަކޮށްފައެވެ.
އިދިކޮޅުން އައްޑަނަ ނަމުގައި ބާއްވާ ޖަލްސާ އޮންނަނީ 3 ސެޕްޓެމްބަރު 2021 ވާ ހުކުރު ދުވަހުގެރޭ 08:15 ގައެވެ.
