ލީކުވިކަމަށް ބުނާ އޯޑިއޯ ރެކޯޑިންތަކާ ގުޅިގެން ހުށަހެޅި މައްސަލަ ބޭރުކޮށްލުމުން މެންބަރު ޝަރީފު ކޮމިޓީތަކަށް

ލީކުވިކަމަށް ބުނާ އޯޑިއޯ ރެކޯޑިންތަކާ ގުޅިގެން ރައްޔިތުންގެ މަޖިލީހަށް ހުށަހެޅި މައްސަލަ ބޭރުކޮށްލުމުން މައްސަލަ ހުށަހެޅުއްވި މަޑުއްވަރި ދާއިރާގެ މެންބަރު އާދަމް ޝަރީފް ކޮމިޓީތަކަށް އެ މައްސަލަ ހުށަހަޅުއްވައިފިއެވެ.

މި މައްސަލަ މަޖިލީހުން ބޭރު ކޮށްލާފައިވާއިރު އެކަމަށް ނެގުނު ވޯޓުގައި ބައިވެރި 20 މެންބަރުން މި ބިލު ބަލައިގަތުމަށް ނުފެންނަކަމަށް ވޯޓު ދެއްވިއެވެ. އަދި 7 މެންބަރަކު ވަނީ މައްސަލަ ބަލައިގަތުމަށް ފެންނަ ކަމަށް ވޯޓު ދެއްވާފައެވެ.

މިކަމާ ގުޅިގެން މެންބަރު ވަނީ އެ މައްސަލަ ބަލައިދިނުމަށް އެދި މަޖިލީހުގެ ސަލާމަތީ ޚިދުމަތްތަކާބެހޭ (241) ކޮމިޓީއާއި ހިއުމަން ރައިޓްސް އެންޑް ޖެންޑާ ކޮމިޓީގެ އިތުރުން ޖުޑީޝަރީ ކޮމިޓީއަށް ހުށަހަޅުއްވާފައެވެ.

މައްސަލަ ހުށަހަޅުއްވަމުން މެންބަރު ވިދާޅުވީ ކުރީގެ ރައީސުލްޖުމްހޫރިއްޔާ އަބްދުﷲ ޔާމީން ޢަބްދުލްޤައްޔޫމްގެ މައްޗަށް 5 އަހަރު ދުވަހުގެ ޖަލު ޙުކުމެއް ކޮށްފައިވަނީ ނުޙައްޤުން ކަމަށާއި އެއީ ފާސިޤު ހެކި އުފައްދައިގެން ކޮށްފައިވާ ސިޔާސީ ޙުކުމެއްކަމަށް ދިވެހި ރައްޔިތުންގެ ގިނަ ބަޔަކު ތަކުރާރުކޮށް ބުނަމުންދަނިކޮށް، ރައީސް ޔާމީންގެ ޝަރީޢަތަށް ނުފޫޒު ފޯރުވުމުގެގޮތުން، ޙުކުމްކުރި ބެންޗުގައި ތިބި ފަނޑިޔާރުންނަށް ރިޝްވަތު ދީ، ބިރުދައްކާފައިވާކަން އެނގޭ އޯޑިއޯތަކެއް ލީކުވެފައިވާ ކަމަށެވެ.

މެންބަރު ވިދާޅުވީ ރައީސް ޔާމީނަށް ޙުކުމްކުރި ފަނޑިޔާރަކަށް ލިބޭނެކަމަށް ކުރިން އަންގާފައިވާ މަގާމުގެ ކުރިއެރުން ލިބިފައިވާއިރު، ބެންޗުގައި ދެން އިން ފަނޑިޔާރަށް ލިބޭނެކަމަށް ބުނެފައިވާ މަޤާމުގެ ކުރިއެރުން ލިބިފައި ނުވާކަމުގެ ޝަކުވާއާއި އެ ފަނޑިޔާރު ރައީސް ޔާމީނަށް ނުޙައްޤު ޙުކުމްކުރި ބެންޗުގައި އިނީ، ޙުކުމުގައިވާ އެއްޗެއް ނޭނގޭ ޙާލުގައި ވެސް، ސަރުކާރުން އަންގާފައިވާތީކަން އެ އޯޑިއޯތަކުން ދޭހަވާ ކަމަށެވެ.

ލީކުވެފައިވަނީ, މަނީ ލޯންޑަރިންގގެ ކުށް ސާބިތުވެ 5 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީންގެ ފަރާތުން އެ ހުކުމް ސުޕްރީމް ކޯޓުގައި އިސްތިއުނާފު ކުރި މައްސަލަ ތާވަލުކުރިތަނާ، ޔާމީނަށް ހުކުމް ކުރެއްވި ފަނޑިޔާރަކާގުޅޭ އޯޑިއޯއެކެވެ.

މި މައްސަލައާ ގުޅިގެން ޖޭއެސްސީން ބުނީ ފަނޑިޔާރުންނަކީ ވަކި ފަރާތަކަށް ބުރަނުވެ، ވަކި ފަރާތަކުން ދައްކަފާނެ ބިރަކަށް ޖެހިލުންނުވެ، ތަޢައްޞުބުން އެއްކިބާވެ، ޤާނޫނު އަސާސީއާއި ޤާނޫނާ އެއްގޮތަށް ކަންތައްތައް ނިންމުމުގައި ދެމިތިބެންޖެހޭ ބައެއްކަމަށެވެ.