އުނބަށް ނުޖަހައި ހަމަ އެއްކަމެއްވެސް މުއިއްޒަށް ނުކުރެވެނީތަ؟

މަގުމަތިން ދިމާވި މީހަކު ގޮވާލާފައި ބުންޏެވެ. އަނެއްކާ ހުދު ފޮތިކޮޅަކަށް ވީ ދޯއެވެ. ކޮށްލި މަލާމާތެކޭ ހިތާ ހިނިގަނޑެއް ޖަހާލާފައި ވީ ކީއްހޭ އަހާލައިފީެވެ. ދެންވެސް ބުނީ ހަމަ އެފަދަ އެއްޗެކެވެ. ހީވަނީ ކުޅޭ ކުޅިވަރެއް ހެނެވެ. އިހުނަށްވުރެ ގާތްވެލަމުން ވީ ގޮތެއް ބުނެލަދޭން އެދުނީމެވެ.

އެއްކަލަ ވަކިކުރި ކަލޭގެ އަނެއްކާވެސް ގެންގޮސް އެތަނަށް ލީއްޔެއް ނޫންހޭ ބުންޏެވެ. އެއްޗެއް ބުނަންވާއިރަށް އޭނާ ބުނީ ސިނގިރޭޓް ވައްކަމުގައި ކްނަޑާލި މީހާއަށް އަލުން އަންބުރާ ވަޒީފާ ދިންވާހަކައެވެ. އޭނާ އަދިވެސް އިތުރަށް ބުންޏެވެ. މީދެން މީހުން ކުރާޒާތުގެ ކަންކަން ހެއްޔެވެ. އިރުއޮއްސި އިރު އަރަންވާއިރަށް މީހަކު ކަނޑާ އެއްލާލަންވިއެވެ. އަނެއްކޮޅުން އިރުއޮއްސެންވާއިރަށް އެމީހަކު އަނބުރާ ގެނެސް ލާންވީއެވެ. ހީވަނީ ކުޅޭ ކުޅިވަރެއް ހެންނެވެ.

އޭނާ ބުންޏަސް އެއީކީ އާދައިގެ ވާހަކައެއް ނޫނެވެ. ހިންގާން ނޭނގިގެން އަދި އުރައްޕަތެއްނެތް މުިއްޒު ވެރިކަމުގައި ކަންކުރަމުން އަންނަ ބީދައެވެ.

އެމީހާއެބުނިހެން ގެއްލުނު ސިނގިރޭޓް ކޮންޓޭނަރުތަކުގެ މައްސަލައިގާ ކަސްޓަމްގެ ދެ އޮފިސަރަކު ވަކިކުރީ ކުއްލިއަކަށެވެ. 30 އަހަރަށްވުރެ ގިނަ ދުވަހު އެތަނުގައި ޚިދުމަތް ކޮށްފައިވާ ދެމީހަކު ޚިދުމަތުގައި ތިއްބާ ކަނދާ އެއްލާލީ އެމީހުންގާތު ހޭވެސް އަހާލުމެއް ނެތިއެވެ. ކަލޭމެން އެޒާތުގެ ކަމެއް ކުރީންތޯއާ އެވައްކަމުގައި ބައިވެރިވީންތޯވެސް އަހާނުލައެވެ. އަމުދުން އެތުހުމަތުތަކުން ބަރީވާން އެއްޗެއްވެސް ބުނާނެ ފުރުސަތެއް ނުދީއެވެ. ލިބުނު ރިޕޯޓަކާ ގުޅިގެން ބާރގަދަ މަޖިލީހުގެ ކޮމެޓީއަކުން ދިން ލަފަޔަކަށެވެ. މުއިއްޒު ވިދާޅުވިއްޔާ ވިދާޅުވިގޮތަކަށް ކންކުރާން ތައްޔާރަށް އޮތް ރައްޔިތުންގެ މަޖިލީހުގެވެސް އެންމެ ބާރުގަދަ އެއްކޮމެޓީން ދިން ލަފައަކައެށެވެ. މަޝްހޫރު ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން (241 ކޮމިޓީ) ދިން އެލަފަޔާމެދު ވިސްނާލިހެންވެސް ހީނުވިއެވެ. އެދެއޮފިސަރުން އެފޮނުވާލީ ގެއަށެވެ.

މުޅި ދުނިޔެއަށް އެފެނުނީ އެއީ ބޮޑު ދެ ވަގުންގެ ގޮތުގައެވެ. މައި ދޮރާށި ބަލަހައްޓަންތިބި ދެމީހަކު ގައުމަށާއި ރައްޔިތުންނަށް ޣައްދާރުވި ޣައްދާރުވުމެއްގެ ގޮތުގައެވެ. 30 އަހަރު ކުރި ޚިދުމަތުގެ އަގު މަދު ސިކުންތު ކޮޅެއްގެ ތެރޭގައި ވެއްޔާ މޮޑެވުނީއެވެ. ބޮޑު ވަގެއްގެ ޓެގު އެޅުވި މުޅި ރާއްޖެއަށާއި މުޅި ދުނިޔެއަށް ފަޟީހަތްވެ ނިމުނީއެވެ.

އެވާހަކަތައް އެހެރީ އަދިވެސް ނޫސްތަކުގައެވެ. ސޯޝަލް މީޑިޔާގައި ފޮޓޯއާއެކު ހާމަޔަށް ފެންނާށެވެ. މަސްއޮޑި އަތިރީގަޔާއި ހޮޅުއަށިތަކުގައިވެސް ދެއްކީ އެވާހަކައެވެ. އެމީހުންގެ އަގު ހަމަ އެކީއެކަށް ވެއްޓުނީއެވެ.

އޭގެތެރެއިން އެކަކީ ކަސްޓަމްސްގެ ހިދުމަތުގައި 30 އަހަރަށް ވުރެ ގިނަ ދުވަހު އުޅުއްވި ކަސްޓަމްސްގެ ޑެޕިއުޓީ ކޮމިޝަނަރު މަހުމޫދު ރިޔާޒު އެވެ. މީހުން އޭރުވެސް ކިޔެވެ. ކުދަމިނުން އެމީހުންނަށް ދިފާއުގައި ބަހެއް ބުނެލަންވެސް ފުރުސަތެއް ދޭން ޖެހޭނެތާއެވެ. އެއިން ކަމަކަށް ފަރުވާލެއް ނުބެހެއްޓެވިއެވެ. ބަސްބުނިހިނދުން މުއިއްޒު ކަންކަން ނިންމަވާލެއްވީއެވެ. ހިންގި ތަހުގީގެއްގެ މައުލޫމާތެއްވެސް ހިއްސާނުކޮށް އެފަދަ ކަންކަމުގައި މުއިއްޒު ސާގެންގުޅުއްވާ މުއިއްޒު ސްޕީޑުގައެވެ.

އޭގެ ދުވަސްކޮޅެއް ފަހެވެ. ރޭކާލީ ދެނެވެ. އަނެއްކާވެސް ހަމަ އެއްކަލަ މަޖިލީހުގެ ކޮމެޓީއެވެ. އެކޮމެޓީން ދިން ލަފާ އަނބުރާ ގެނައީއެވެ. ނިންމުން ބަދަލު ކުރީއއެވެ. ޔޫޓާންއެއް ނަގާ އިހުހުރިގޮތައް އިއާދަކުރާން ނިންމީއއެވެ. ރީތިބަހުންނަމަ އުންބަށް ޖެހީއެވެ. މަހްމޫދު ރިޔާޒަށް އަލުން އަނބުރާ އެވަނީ އެވަޒީފާ ދީފައެވެ.

މުއިއްޒު ތަކުރާރުކޮށް ވިދާޅުވަމުން ގެންދަވަނީ އެ މަނިކުފާނު ކުރައްވާނީ ގާނޫނުގެ ވެރިކަން ކަން ކަށަވަރުކުރައްވާނެ ކަމަށާއި "އަދުލުވެރިކަމާއި އިންސާފު، ދައުލަތުގައި ގާއިމުކުރުމަށް ދައުލަތުގެ އެންމެ މަތީ ވެރިޔާގެ ހައިސިއްޔަތުން އަދާކުރަންޖެހޭ ވާޖިބު އަދާކުރާނަން" ކަމަށެވެ.

ކޮންމެއަކަސް އުނބަށް ޖަހައިފިއެވެ. މުއިއްޒު ޖައްސަވާ އުނބު ލިސްޓަށް އުނބެއް އިތުރުވީއެވެ. މިފަހަރު ގަބޫލު ކުރަންވީ ކޮންކަމެއް ކަމެއް ނޭނގުނެވެ. އެބުނާ މުއިއްޒުގެ އަދުލު އިންސާފަށް ކަންކުރީ ވަކިކުރުމުގައި ކަމެވެ. ނޫންނަމަ އަލުން އަނބުރާ ވަޒީފާ ދިނުމުގައި ކަމެވެ. ހަމ ގައިމުވެސް އެނގޭ އެއްކަމެއް އެބައޮތެވެ. މުއިއްޒުގެ ވާނުވާ ނޭނގޭ ސްޓައިލް ހަމަ އެގޮތުގައި ބާރަށް ކުރިއަށްދާކަމެވެ. ދެއުޅިއެއްނުވާ ނިންމުންތައް ނިންމައި އަލުން އަނބުރާ އެކަން ބަދަލުކޮށް އުނބަށް ޖެހުން ހުއްޓެން ގާތްވެސް ނުވާކަމެވެ. އަދިވެސް އެހެންކަމެއް ހަމަ އެހާމެ ސާފެވެ. މަހްމޫދު ރިޔާޒްގެ ނަން ހިމނައިގެން އޭރު އެލިޔުނު ހަބަރުތަކާއި ސޯޝަލް މީޑިޔާ ޕޯސްޓްތައް ފަނޑުކަމެއްނެތި އެގޮތުގައި ހުންނާނެ ކަމެވެ. މުނިކާފަ ދަރިންނާ ހަމައިންވެސް އެތަކެތި ނުފޮހެވި ހުންނާނެއެވެ. ފޮޓޯއާއެކު ޖެހުނު ލައްގަނޑު ހަމަ އެގޮތުގައި އޮންނާނެއެވެ. ކުށެއް ނުކުރާނަމަ މައުސޫމު މީހަކަށް ހިތުން ނުފިލާވަރުގެ ހިތި ލަގާއެއް މުޅިއުމުރަށް ލިބުނީއެވެ.