އެގްޒޮޓިކް އެންޓަޕްރައިޒަސްގެ ބޮންޑެޑް ވެއާހައުސްއަކުން ގިނަ އަދަދެއްގެ ސިނގިރެޓު ގެއްލުނު މައްސަލަ ހިނގި ދުވަސްވަރު އެ ކުންފުނީގެ ހިއްސާ ރައްޔިތުންގެ މަޖިލީހުގެ ހިތާދޫ ދާއިރާގެ މެމްބަރު މުހައްމަދު ސިރުހާނަށް އަށް އަށް ދީފައިވާ ކަމަށް މަޖިލީހުގެ ސަލާމަތީ ހިދުމަތްތަކުގެ ކޮމިޓީ( 241 ކޮމިޓީ) ގެ ރިޕޯޓުން ހާމަވެއްޖެއެވެ.

ސިނގެރެޓްތައް ގެއްލުނު މައްސަލަ ދިމާވި އިރު ސިރުހާން އަކީ މަޖިލީހުގެ މެމްބަރެއް ނޫނެވެ. އޭނާ މެމްބަރުކަމަށް ހޮވިވަޑައިގަތީ 2024 ވަނަ އަހަރުގެ މަޖިލިސް އިންތިޚާބުގައެވެ.

ހޯމަ ދުވަހު މަޖިލީހުގެ ޖަލްސާގައި ފާސްކުރި ރިޕޯޓްގައި ބުނެފައި ވަނީ އެގްޒޮޓިކް އެންޓަޕްރައިޒަސް ކަސްޓަމްސްގައި ބޮންޑެޑް ވެއާހައުސް ރަޖިސްޓްރީކޮށްފައި ވަނީ އެ ކުންފުނީގެ ހިއްސާދާރުންގެ ގޮތުގައި ލުބުނާ ހުސައިން މަނިކު އާއި އަބްދުﷲ ހަސަން ތިއްބާ ކަމަށެވެ.

އެހެންނަމަވެސް، އޭގެ ފަހުން އެގްޒޮޓިކް އެންޓަޕްރައިޒަސް އިން ފޭކް ސިނގިރެޓްތަކެއް އެތެރެކޮށްފައިވާ މައްސަލަ އެއް ޑިސެމްބަރު 9، 2023 ގައި ވަނީ ފެންމަތިވެފައެވެ. އޭރު އެ ކުންފުނީގެ ހިއްސާދާރުންނަކީ ލުބުނާ ހުސައިން މަނިކާއި މެމްބަރު މުހައްމަދު ސިރުހާން ކަމަށް 241 ކޮމިޓީގެ ރިޕޯޓުން އެނގެއެވެ.

މި މައްސަލައިގައި 241 ކޮމިޓީ އިން އެކުލަވާލި ރިޕޯޓާއި މެދު މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެފައި ވަނީ ސިނގިރޭޓު ކޭސްތައް މަދުވިކަން އެނގިފައި ވަނީ ވެސް އެ ކުންފުނީގެ ހިއްސާ ބަދަލުކުރުމަށް ފަހު ކަސްޓަމްސްގެ ސަމާލުކަމަށް އެކަން ގެނެސް، އަލުން ސިނގިރޭޓުތައް ގުނުމާއި ހިސާބުން ކަމަށެވެ. އެހެންކަމުން މިއީ ދުރާލާ ރާވައިގެން ހިންގާފައިވާ ޖަރީމާ އެއް ކަަމަށް ނާޒިމް ވިދާޅުވިއެވެ. އެ ކުންފުނީގެ ހިއްސާ ބަދަލުކޮށްފައި ވަނީ ވެސް ކަސްޓަމްސް އަށް ވެސް އެނގިގެން ވަރަށް ބޮޑަށް ރޭވިގެން ކަމަށް އޭނާ ވަނީ ތުހުމަތު ކުރައްވާފަ އެވެ.

241 ކޮމިޓީގެ ދިރާސާ ރިޕޯޓާއި ގުޅިގެން މެމްބަރު ސިރުހާން ވަނީ ބަޔާނެއް ނެރުއްވާފައެވެ. އޭނާ ވިދާޅުވީ އެގްޒޮޓިކް އެންޓަރޕްރައިޒިސް އަކީ ޤާނޫނުތަކާއި އެއްގޮތަށް ރަޖިސްޓްރީކޮށްގެން ހިންގި ވިޔަފާރި އެއް ކަމަށެވެ. އެހެންކަމުން 2023 ވަނަ އަހަރު އެ ކުންފުންޏާއި ގުޅިފައި ވާނެ ކަމަށް އޭނާ ފާހަގަކުރައްވާފައިވެއެވެ. ނަމަވެސް އޭގެ ކުޑަ ދުވަސްކޮޅެއް ފަހުން ސިޔާސީ މަސައްކަތްތަކަށް ވަގުތު ހުސްކުރުމަށް އޭނާގެ ހިއްސާ އޮތް ކުންފުނިތަކުން ހިއްސާ ދޫކޮށްލާފައިވާނެ ކަމަށް އޭނާ ވަނީ ވިދާޅުވެފައެވެ. ސިރުހާން ވިދާޅުވީ އޭނާ އެގްޒޮޓިކް އެންޓަރޕްރައިސިސްގެ ބޯޑުގެ ޑިރެކްޓަރަކަށް އަދި ހިއްސާދާރަކަށް ހުންނެވި މުއްދަތުގައި އެ ކުންފުނިން ޤާނޫނާއި ޚިލާފު މުއާމަލާތެއް ހިންގާފައި ނުވާނެ ކަމަށެވެ.

މި މައްސަލައިގައި ހިމެނޭ ވަގަށް އެތެރެކޮށްފައިވާ ސިނގިރެޓްގެ އަގު 30-40 މިލިއަން ރުފިޔާއަށް އަރާނެ ކަމަށް މަޖިލީހުގެ ނައިބު ރައީސް ނާޒިމް ވަނީ ވިދާޅުވެފައެވެ.