ޔޫރަޕްގެ ގައުމުތަކުގައި ކޮވިޑް-19ގެ ކޭސްތައް އިތުރުވަމުން އަންނައިރު ވެކްސިން ޖަހާ މީހުންގެ އަދަދު ދަށަށްދާތީ ކޮވިޑް ފެތުރުން ހުއްޓުވުމަށް ހުރަސްތަކެއް ކުރިމަތިވަމުން އަންނަ ކަމުގެ އިންޒާރު ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ން ދީފިއެވެ.

އެކަމާގުޅިގެން ވާހަކަދައްކަވަމުން ޑަބްލިޔުއެޗްއޯއިން ޔޫރަޕަށް ކަނޑައަޅުއްވާފައި ހުންނަވާ ޑިރެކްޓަރ ހާންސް ކްލޫގާ ވިދާޅުވީ ފާއިތުވި ދުވަސްތަކުގައި ޔޫރަޕްގެ ސަރަހައްދުގައި ކޮވިޑްގެ ކޭސްތައް އިތުރުވެ އެބަލީގައި މަރުވާ މީހުންގެ އަދަދު އިތުރުވަމުން އައިސްފައިވަނީ ކަންބޮޑުވާ މިންވަރަށް ކަމަށެވެ. ޑެލްޓާ ވޭރިއަންޓް ހަލުވިކަމާއެކު ފެތުރެމުން އަންނައިރު ފިޔަވަޅުތަކަށް ލުއިތައް ދެމުން އައުމާއި މީހުން އެއްތަނުން އަނެއްތަނަށް ދަތުރުކުރުމުގެ ސަބަބުން ކޭސްތައް އިތުރުވަމުން އަންނަކަމަށް ހާންސް ވިދާޅުވިއެވެ.

ހާންސް ވިދާޅުވީ މިއަހަރު ނިމެން ބާކީ މިއޮތް ހަތަރު މަސް ދުވަސްތެރޭގައި ޔޫރަޕްގެ ގައުމުތަކުން 236،000 މީހުން މިބަލީގައި މަރުވާނެކަމަށް އަންދާޒާކުރެވޭކަމަށެވެ. ކޮވިޑްގެ ޕެންޑަމިކްގައި މިހާތަނަށް ޔޫރަޕުގެ ގައުމުތަކުން 65 މިލިއަން މީހުންނަށް ކޮވިޑް ޖެހިފައިވާއިރު 1.3 މިލިއަން މީހުން ވަނީ މިހާތަނަށް އައިއިރު މިބަލީގައި މަރުވެފައެވެ.

ޔޫރަޕްގެ ގައުމުތަކުގައި ކޮވިޑް ޖެހޭ މީހުންގެ އަދަދު އޭޕްރީލް މަހު ވަނީ ދަށަށްގޮސްފައެވެ. އޭގެފަހުން ޖޫން މަހުގެ ފަހުކޮޅުން ފެށިގެން ކޭސްތައް އަންނަނީ އިތުރުވަމުންނެވެ.

ހާންސް ވިދާޅުވީ ޔޫރަޕްގައި ހިމެނޭ 53 ގައުމުތަކުގެ ތެރެއިން 33 ގައުމެއްގައި ފާއިތުވި ދެ ހަފްތާގައި ކޭސްތައް ފެންނަ މިންވަރު ވަނީ 10 އިންސައްތަ އިތުރުވެފައެވެ. އޮގަސްޓް އެންމެ ފަހު ހަފްތާގައި ރަޝިޔާ، ފްރާންސް، އިނގިރޭސިވިލާތް، ތުރުކީ އަދި ސްޕެއިންއިން ވަނީ އެންމެ ގިނައިން ކޭސްތައް ފެނިގެން ރިޕޯޓްކޮށްފައެވެ. މީގެއިތުރުން ފާއިތުވި ހަފްތާގައި ޔޫރަޕްގެ ގައުމުތަކުގައި ކޮވިޑް ބަލީގައި މަރުވި މީހުންގެ އަދަދު ވަނީ 11 އިންސައްތަ އިތުރުވެފައެވެ.

ކޮވިޑްގެ ކޭސްތައް އިތުރުވަމުން އަންނައިރު ބައެއް ގައުމުތަކުގައި ވެކްސިން ޖަހާ މިންވަރު ދަށަށްދާ ދިޔުމަކީ ކަންބޮޑުވުމެއްކަމަށް ހާންސް ވިދާޅުވިއެވެ.

ޔޫރަޕްގެ ގައުމުތަކުގެ ތެރެއިން އެންމެ މުއްސަނދި ގައުމުތަކަކީ މުޅި ދުނިޔެއަށް ބަލާއިރު އާބާދީގެ ނިސްބަތުން އެންމެ ގިނަ މީހުންނަށް ވެކްސިން ދީފައިވާ ގައުމުތަކެވެ.

ތަފާސްހިސާބުތަކުން ދައްކާގޮތުގައި ޔޫރަޕްގެ 29 ގައުމެއްގައި ވެކްސިން ޖަހަންޖެހޭ އާބާދީގެ 75.1 އިންސައްތަ މީހުން ވަނީ ވެކްސިންގެ ފުރަތަމަ ޑޯޒް ޖަހާފައެވެ. އަދި 64.9 އިންސައްތަ މީހުން ވަނީ ދެވަނަ ޑޯޒް ޖަހާފައެވެ. ނަމަވެސް ފާއިތުވި ހަ ހަފްތާގައި ޔޫރަޕްގައި ކޮވިޑް ވެކްސިން ޖަހާ މީހުންގެ އަދަދު ދަށަށްގޮސްފައިވާ ކަމަށް ހާންސް ވިދާޅުވިއެވެ.

ވެކްސިން ޖަހާ މީހުންގެ އަދަދު ދަށް ވެފައިވަނީ ދެ ސަބަބަކާހެދި ކަމަށް ހާންސް ވިދާޅުވިއެވެ. ފުރަތަމަ ސަބަބަކީ ބައެއް ގައުމުތަކަށް އެކަށީގެންވާ މިންވަރަށް ވެކްސިން ނުލިބުމެވެ. ދެވަނަ ސަބަބަކީ ވެކްސިން ޖެހުމާ މީހުން ދެކޮޅު ހެދުންކަމަށް ހާންސް ވިދާޅުވިއެވެ.

ޔޫރަޕްގެ ގައުމުތަކުގެ ތެރެއިން އެންމެ މަދުން އަދި މެދު މިނުގައި އާމްދަނީ ލިބޭ ގައުމުތަކުގައި ވެކްސިންގެ ދެ ޑޯޒް ފުރިހަމަކޮށްފައިވަނީ 6 އިންސައްތަ މީހުންނެވެ. މީގެތެރެއިން ބައެއް ގައުމުތަކުގައި ސިއްހީ ދާއިރާގައި މަސައްކަތްކުރާ މީހުންގެ ތެރެއިން ވެކްސިން ދީފައިވަނީ ކޮންމެ 10 މީހަކުން އެކަކަށެވެ.