ފާއިތުވި 24 ގަޑިއިރު އަތޮޅުތެރެއިން ކޮވިޑަށް ޕޮޒިޓިވްވި 119 މީހުންނާއެކު މުޅި ރާއްޖެއިން 169 މީހުން ކޮވިޑަށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެފަހުން ހާމަކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު މާލެ ސަރަހައްދުން ޕޮޒިޓިވްވެފައިވަނީ 49 މީހުންނެވެ. ހިންގަމުންދާ ރިސޯޓްތަކުން ވަނީ އެކަކު ކޮވިޑަށް ޕޮޒިޓިވްވެފައެވެ. މިއާއެކު ރާއްޖެއިން މިހާތަނަށް ކޮވިޑަށް ޕޮޒިޓިވްވި މީހުންގެ އަދަދު ވަނީ 80،960ށް އަރާފައެވެ. މިވަގުތު އެކްޓިވް ކޭހުގެ ގޮތުގައި ގުނަމުންދަނީ 1709 ކޭހެކެވެ. އޭގެތެރެއިން 17 މީހުންނަށް ފަރުވާދެމުން އަންނަނީ ހޮސްޕިޓަލްތަކުގައެވެ.

ރާއްޖޭގައި މިހާތަނަށް މިބަލީގައި 226 މީހުން ވަނީ ނިޔާވެފައެވެ.

ފާއިތުވި 24 ގަޑިއިރު އަތޮޅުތަކުގެ ކޭސްތައް އިތުރުވެފައިވާއިރު ށ މިލަންދޫން ޕޮޒިޓިވްވި މީހުންގެ އަދަދު އެކަނިވެސް 31ށް ވަނީ އަރާފައެވެ. މިލަންދޫގެ އިތުރުން ބައެއް ރަށްރަށުގައި އަންނަނީ މިވަގުތު ކޮވިޑް ފެތުރެމުންނެވެ.

ކޮވިޑްގެ ހަތަރު ވަނަ ރާޅަށް ފަހު ރާއްޖޭގައި ކޮވިޑްގެ ހާލަތު ވަނީ ވަރަށް ބޮޑަށް ކޮންޓްރޯލްވެފައެވެ. ނަމަވެސް އަދިވެސް ކޮވިޑުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަންދިނުމަށް ކަމާބެހޭ ފަރާތްތަކުން އަންނަނީ އިރުޝާދު ދެމުންނެވެ.