އާރްބީ ލައިޕްޒީގުގެ ކެޕްޓަން މާސެލް ސަބިޓްޒާ ބަޔާން މިއުނިކަށް ބަދަލުވެއްޖެއެވެ.

އުމުރުން 27 އަހަރުގެ އޮސްޓްރިއާގެ މިޑްފީލްޑަރު ބަޔާނަށް ބަދަލުވީ ހަތަރު އަހަރުގެ އެއްބަސްވުމެއްގެ ދަށުންނެވެ. ރިޕޯޓުތައް ބުނާ ގޮތުން ބަޔާނުން ސަބިޓްޒާގެ ސޮއި ހޯދީ ލައިޕްޒީގަށް 16 މިލިޔަން ޔޫރޯ ދެއްކުމަށްފަހުއެވެ.

ސަބިޓްޒާ ބަޔާނަށް ބަދަލުވިއިރު، އެ ޓީމުގެ މިހާރުގެ ކޯޗަކީ މިދިޔަ ސީޒަނުގައި ލައިޕްޒީގުގައި ސަބިޓްޒައާއަށް އިރުޝާދުދިން ޒުވާން ކޯޗު ހޫލިއަން ނާގަލްސްމަންއެވެ. އަދި ހަމަ މިދިޔަ ސީޒަނުގައި ލައިޕްޒީގުގައި ނާގަލްސްމަން އިރުޝާދުދިން ފްރާންސްގެ ޒުވާން ޑިފެންޑަރު ޑަޔުޓް އުޕަމެކާނޯވެސް ވަނީ މި އަހަރު ބަޔާނަށް ބަދަލުވެފައެވެ.

ލައިޕްޒީގުގައި ހަތް އަހަރު ހޭދަކުރުމަށްފަހު ސަބިޓްޒާ އެ ޓީމު ދޫކޮށްލިއިރު، 2014 ވަނަ އަހަރު ލައިޕްޒީގާ ގުޅުނު ސަބިޓްޒާ ވަނީ އެ ޓީމަށް ކުޅެދިން 229 މެޗުގައި 52 ލަނޑު ޖަހާފައެވެ. އަދި މީގެ ކުރިން ލޯނު އުސޫލުން ރެޑްބުލްއިން ހިންގަމުން އަންނަ އާރްބީ ސާލްޒްބާގަށްވެސް ސަބިޓްޒާ ކުޅުނުއިރު، އޭނާ ވަނީ އެ ޓީމާއެކު އޮސްޓްރިއަން ލީގާއި، އޮސްޓްރިއަން ކަޕް ކާމިޔާބުކޮށްފައެވެ.

އޮސްޓްރިއާގެ ގައުމީ ޓީމަށް މިހާތަނަށް 54 މެޗު ކުޅެދީފައިވާ ސަބިޓްޒާ ވަނީ މި އަހަރުގެ ހޫނު މޫސުމުގައި ބޭއްވި ޔޫރޯ ފުޓްބޯޅަ މުބާރާތުގައިވެސް މޮޅު ކުޅުމެއް ދައްކާފައެވެ.

ސަބިޓްޒާ ބަޔާނަށް ބަދަލުވިއިރު، ޖަރުމަން ލީގުގައި އެ ޓީމުން ދެން މެޗެއް ކުޅޭނީ އަންނަ ސެޕްޓެމްބަރު މަހުގެ 11 ވަނަ ދުވަހެވެ. އެ ދުވަހު ރަށުން ބޭރުގައި ބަޔާން ނުކުންނާނީ ލައިޕްޒީގާ ދެކޮޅަށެވެ. އެހެންކަމުން އެ މެޗުގައި ސަބިޓްޒާ ފެނުމުގެ ފުރުސަތު ބޮޑު ކަމަށް ރިޕޯޓުތައް ބުނެއެވެ.