މަނީ ލޯންޑަރިން ގެ ކުށް ސާބިތުވެ ޖަލު ހުކުމެއް އިއްވާފައިވާ ކުރީގެ ރައީސް އަބްދުﷲ ޔާމީނުގެ މައްސަލައިގައި ބެންޗުގައި ހިމެނިވަޑައިގަންނަވާ ގާޒީންނަށް މަގާމުގެ ކުރިއެރުން ލިބުމަކީ އިއްތިފާގެއް ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) ގެ ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިން ވިދާޅުވެއްޖެއެވެ.

ކްރިމިނަލް ކޯޓުގައި މި މައްސަލަ ކުރިއަށް ދިޔައިރު، މައްސަލަ ބެއްލެވި ގާޒީ އަލީ ރަޝީދު ހުސައިން ސުޕްރީމް ކޯޓުގެ ފަނޑިޔާރު ކަމަށް އައްޔަންކޮށްފައިވާއިރު،  ގާޒީ އަހުމަދު ޝަކީލް ވަނީ ކްރިމިނަލް ކޯޓުގެ އިސް ގާޒީކަމަށް އައްޔަން ކުރައްވާފައެވެ. އެއާއެކު، ރައީސް ޔާމީނަށް ހުކުމް ކުރެއްވި ގާޒީންނަށް މަގާމުގެ ކުރިއެރުން ދީފައިވަނީ އެކަމުގެ "އިނާމެއްގެ ގޮތުން" ކަމަށް އަޑުފެތުރިގެން ދިޔައެވެ.

ރައީސް ޔާމީނަށް ހުކުމް ކުރެއްވި ގާޒީންނަށް މަގާމުގެ ކުރިއެރުން ދީފައިވަނީ އެހަމައިން ނޫންކަމުގެ ޔަގީންކަން މެމްބަރު ހިސާން ވަނީ ދެއްވާފައެވެ. "ވަގުތު" ނޫހަށް ދެއްވި ޚާއްސަ އިންޓަރވިއުއެއްގައި ހިސާން ވަނީ ރައީސް ޔާމީންގެ މައްސަލަ ބެއްލެވި ގާޒީންނަށް މަގާމުގެ ކުރިއެރުން ދެވުނީ ޔާމީނަށް ހުކުމް ކުރި ދަނޑިވަޅުގައި ކަމަށް ވިޔަސް އެއީ އިއްތިފާގެއް ކަމަށް ވިދާޅުވެފައެވެ. އެގޮތުން ގާޒީ އަލީ ރަޝީދަކީ ސުޕްރިމް ކޯޓަށް އެންމެ ގާބިލް އެއް ފަނޑިޔާރުކަން ފާހަގަ ކުރައްވައި ހިސާން ވަނީ އެއީ ޝަރުއީ ދާއިރާގެ އިލްމު އުނގެނިވަޑައިގެންފައިވާ ބޭފުޅެއްގެ އިތުރުން، ޖިނާއީ އަދުލުގެ ނިޒާމަށް ގެނެވުނު އިސްލާހުތަކަށް ހޭލުންތެރި އަދި ތަޖުރިބާކާރު ބޭފުޅެއްކަން ފާހަގަ ކުރައްވާފައެވެ.

އޭގެ އިތުރުން، ރައީސުލްޖުމްހޫރިއްޔާވެސް އޭރު އިސްކަންދެއްވީ ޝަރުއީ ދާއިރާގެ ބެކްގްރައުންޑެއް ލިބިވަޑައިގެންފައިވާ ބޭފުޅަކު އެ މަގާމަށް އައްޔަން ކުރެއްވުމަށްކަން ހިސާން ފާހަގަ ކުރެއްވިއެވެ.

ގާޒީ އަލީ ރަޝީދު ހުސައިން ވަނީ މިސްރުގެ ގާހިރާއިން މާސްޓަރ އޮފް ޝަރިއާ ހާސިލު ކުރައްވާފައެވެ. 2007ން ފެށިގެން ރާއްޖޭގެ އެކި ކޯޓުތަކުގައި މަސައްކަތް ކުރައްވާފައިވާއިރު، ޖިނާއީ ކުށްތަކާއި ގުޅޭ މުހިއްމު ގާނޫނުތަކާއި ގަވާއިދުތަކެއްގެ މަސައްކަތުގައި އަމަލީ ގޮތުން ބައިވެެރިވެވަޑައިގެންފައިވެއެވެ. އެގޮތުން ޖިނާއީ އިޖުރާއަތުގެ ބިލު މަޖިލީހަށް ހުށައެޅުމުގެ ކުރިން އެ ބިލު އިސްލާހު ކުރެއްވުމުގެ މަރުހަލާއާއި، ޝަރީއަތް ކުރުމާ ބެހޭ ޖިނާއީ އިޖުރާއަތުގެ ގަވާއިދު ޑްރާފްޓް ކުރުމުގައިވެސް ބައިވެރިވެވަޑައިގެންފައިވެއެވެ.

ގާޒީ ޝަކީލުއާ ގުޅިގެންވެސް މި އަޑުތައް ފެތުރިފައިވާއިރު، ކްރިމިނަލް ކޯޓުގެ އިސް ގާޒީކަމުގެ މަގާމު ހުސްވުމުން ނަން ހުށަހެޅި ހަމައެކަނި ގާޒީއަކީ ގާޒީ ޝަކީލުކަން ހިސާން ފާހަގަ ކުރެއްވިއެވެ. ކުރިން ޖޭއެސްސީގެ މެމްބަރުންނަށް ފެނިވަޑައިގަންނަވާ ބޭފުޅެއް އެ މަގާމުތަކަށް އައްޔަން ކުރެއްވި ނަމަވެސް މިހާރު އެ އުސޫލު ބަދަލުކޮށް އިސްގާޒީ ކަމަށް މިހާރު ބޭފުޅުން އައްޔަން ކުރަައްވަނީ އިއުލާނު ކޮށްގެންކަން ހިސާން ވިދާޅުވެފައިވެއެވެ.

ކުރީގެ ރައީސް އަބްދުﷲ ޔާމީނުގެ އިސްތިއުނާފް މައްސަލަ ސުޕްރީމް ކޯޓުގައި ތާވަލު ކުރުމާއެކު، ރައީސް ޔާމީނަށް ހުކުމް ކުރެއްވި ފަނޑިޔާރުންނާއި ގުޅޭ ގޮތުން މިފަދަ ތަފާތު ވާހަކަތައް މިފަހުން އަނެއްކާވެސް ވަނީ ފެންމަތިވެފައެވެ. އެގޮތުން ގާޒީ ހުސައިން ފާއިޒު ރަޝާދުއާއި، ގާޒީ އަލީ އާދަމްގެ އިތުރުން، ގާޒީ ސަމީރު ކަމަށް ބުނާ ބަޔަކު ވާހަކަ ދައްކަވާ އޯޑިއޯތަކެއް ލީކުވެފައިވާއިރު، މި އޯޑިއޯތައް ލީކުވެފައިވަނީ ރައީސް ޔާމީނުގެ މައްސަލަ ސުޕްރީމް ކޯޓުގައި ތާވަލުކުރުމާއެކުއެވެ. މިއީ ސައްހަ އޯޑިއޯތަކެއްކަން ކަށަވަރުވެފައެއް ނުވެއެވެ.