ތަޖުރިބާކާރު ފޯވާޑް ރޮބަޓް ލެވަންޑޯސްކީ ބަޔާން މިއުނިކަށް 300 ލަނޑު ހަމަކުރި މެޗުން، ހާތާ ބާލިން އަތުން ފަސޭހަކަމާއެކު އެ ޓީމު މޮޅުވެއްޖެއެވެ.

ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުން ބަޔާން މޮޅުވީ ފަސޭހަކަމާއެކު 5-0 ގެ ނަތީޖާއަކުންނެވެ.

ބަޔާނުގެ ދަނޑުގައި ކުޅުނު މި މެޗުގައި އެ ޓީމުގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ހަވަނަ މިނެޓުގައި އެލްފޮންސޯ ޑޭވީސް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ތޯމަސް މުލާއެވެ. އަދި ފުރަތަމަ ހާފު ނިމުމުގެ ކުރިން ލެވަންޑޯސްކީ ވަނީ ލަނޑެއް ޖަހައި، ބަޔާނުގެ ލީޑު ފުޅާކޮށްދީފައެވެ.

މި މެޗުގެ ދެވަނަ ހާފުގައިވެސް ބަޔާނުން ގިނަ ހަމަލާތަކެއް އުފެއްދިއިރު، މި ހާފު ފަށައިގެން ހަތަރުވަނަ މިނެޓުގައި އެ ޓީމުން ވަނީ ތިންވަނަ ލަނޑެއް ޖަހާފައެވެ. މުލާގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ ޒުވާން ތަރި ޖަމާލް މުސިއާލާއެވެ. އަދި މެޗުގެ 70 ވަނަ މިނެޓުގައި ލެރޯއި ސާނޭ ދިން ޕާހަކުން ލެވަންޑޯސްކީ ބަޔާނުގެ ހަތަރުވަނަ ލަނޑު ޖަހައިދިންއިރު، އޭގެ 14 މިނެޓު ފަހުން ލެވަންޑޯސްކީ ވަނީ އިތުރު ލަނޑެއް ޖަހައި، މެޗުގައި ހެޓްރިކް ހަދާފައެވެ.

މި މެޗުގައި ލެވަންޑޯސްކީ ހެޓްރިކް ހެދިއިރު، އޭނާ މިހާރު ވަނީ ބަޔާނުގެ ޖާޒީގައި ޖުމްލަ 301 ލަނޑު ޖަހާފައެވެ. އަދި މި މެޗުގައި ޖެހި ލަނޑުތަކާއެކު ލެވަންޑޯސްކީ ވަނީ ޖެހިޖެހިގެން ބަޔާނުގެ 16 ވަނަ މެޗުގައިވެސް ލަނޑު ޖަހާފައެވެ. މީގެ ކުރިން ޖެހިޖެހިގެން އެންމެ ގިނަ މެޗުގައި ބަޔާނަށް ލަނޑު ޖެހުމުގެ ރިކޯޑު އޮތީ 1970 ވަނަ އަހަރު، ޖެހިޖެހިގެން 15 މެޗުގައި ލަނޑު ޖެހި ކުރީގެ އެއްވަނަ ފޯވާޑް ގާޑް މުލާގެ އަތުގައެވެ.

ލީގުގައި ހޮނިހިރު ދުވަހުގެރޭ ކުޅުނު މެޗުން ބަޔާން މޮޅުވިއިރު، ލީގުގައި އެ ޓީމުން ދެން މެޗެއް ކުޅޭނީ އަންނަ ސެޕްޓެމްބަރު މަހުގެ 11 ވަނަ ދުވަހެވެ. އެ ދުވަހު ރަށުން ބޭރުގައި ބަޔާން ނުކުންނާނީ އާރްބީ ލައިޕްޒީގާ ދެކޮޅަށެވެ.