ކޮރެއާގެ ދެ ލަނޑުން އިންޓައަށް މޮޅެއް

އިޓާލިއަން ލީގުގައި ހުކުރު ދުވަހުގެރޭ ހެލަސް ވެރޯނާ އަތުން ފަހަތުން އަރައި އެންމެ ފަހުގެ ޗެމްޕިއަން އިންޓަ މިލާން މޮޅުވެއްޖެއެވެ.

ވެރޯނާގެ ދަނޑުގައި ކުޅުނު މެޗުން އިންޓަ މޮޅުވީ 3-1 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ ވެރޯނާއިންނެވެ. މެޗު ފަށައިގެން 15 ވަނަ މިނެޓުގައި އިންޓަގެ ގޯލްކީޕަރު ސާމިރް ހަންޑަނޯވިޗް އަތުން ހެދުނު ގޯހެއްގެ ފައިދާނަގައި މި ލަނޑު އެ ޓީމަށް ކާމިޔާބުކޮށްދިނީ އިވާން އިލިޗެވެ.

މި މެޗުގެ ފުރަތަމަ ހާފު ވެރޯނާ ލީޑުގައި އޮވެ ނިންމާލި ނަމަވެސް، ދެވަނަ ހާފު ފަށައިގެން ދެވަނަ މިނެޓުގައި އިންޓައިން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ލަޓާރޯ މާޓީނޭޒެވެ. އަދި މެޗުގެ 83 ވަނަ މިނެޓުގައި މަޓެއޯ ޑާމިއަން ނަގައިދިން ހުރަހަކުން ބަދަލު ކުޅުންތެރިއެއްގެ ގޮތުގައި ކުޅެން އެރި ޔަކީން ކޮރެއާ ވަނީ އިންޓައަށް ލީޑު ނަގައިދީފައެވެ.

މި މެޗުގައި އިންޓައިން ލީޑު ފުޅާކޮށްފައިވަނީ މެޗުގެ އިތުރު ވަގުތުގައެވެ. އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ، ދެވަނަ ލަނޑުވެސް ޖަހައިދިން ކޮރެއާއެވެ. މި މެޗުގައި ކޮރެއާ ދެ ލަނޑު ޖެހިއިރު، މި މެޗަކީ ލާޒިއޯގެ ލޯނު އެއްބަސްވުމެއްގެ ދަށުން އިންޓައަށް ބަދަލުވުމަށްފަހު އޭނާ ކުޅެދިން ފުރަތަމަ މެޗެވެ.

މި ސީޒަނުގެ ލީގުގައި ކުޅުނު ދެވަނަ މެޗުންވެސް އިންޓަ މޮޅުވިއިރު، ލީގުގައި އެ ޓީމުން ދެން މެޗެއް ކުޅޭނީ އަންނަ ސެޕްޓެމްބަރު މަހުގެ 12 ވަނަ ދުވަހެވެ. އެ ދުވަހު ރަށުން ބޭރުގައި އިންޓަ ނުކުންނާނީ ސަމްޑޯރިއާއާ ދެކޮޅަށެވެ.