އަލީ ވަހީދު ހުންނެވީ އިނގިރޭސިވިލާތުގެ ޖަލެއްގައި

ކުރީގެ ޓޫރިޒަމް މިނިސްޓަރު އަލީ ވަހީދު ހުންނެވީ އިނގިރޭސި ވިލާތުގެ ޖަލެއްގައި ކަމަށް ރާއްޖެޓީވީއަށް މައުލޫމާތު ލިބިއްޖެއެވެ.

އިނގިރޭސިވިލާތުގެ ގެޓްވިކްގައި ހުރި ޖަލެއްގައި އަލީ ވަހީދު ހުންނެވި ކަމަށް ރާއްޖެއެމްވީއަށް ވަނީ ކަށަވަރުވެފައެވެ. އަދި ސެޕްޓެމްބަރު މަހުގެ 26 ވަނަ ދުވަހު މައި ބަދައިގެ އޮޕަރޭޝަނެއް ކުރުމަށް ޑޮކްޓަރު ދެއްވާފައިވާ އެޕޮއިންޓްމެންޓާ ހަމައަށް އިނގިރޭސިވިލާތުގައި މަޑުކުރެވޭނެގޮތް ހަމަޖައްސަވައި ދެއްވުމަށް އަލީ ވަހީދުގެ ފަރާތުން އެދިވަޑައިގެންފައިވާ ކަމަށް ވެސް ވަނީ މައުލޫމާތު ލިބިފައެވެ. އަލީ ވަހީދު ރާއްޖެ ނާންނަން ނިންމާފައި ނުވާކަމަށާއި، އިނގިރޭސިވިލާތުގެ ހިމާޔަތަށް ވެސް އެދިފައިނުވާކަމަށް މައުލޫމާތު ލިބެއެވެ.

އިނގިރޭސިވިލާތުގައި ހުންނަވަނިކޮށް އަލީ ވަހީދު ހައްޔަރު ކޮށްފައިވަނީ މި މަހުގެ 25 ވަނަ ދުވަހުގެ ވަގުތެއްގައެވެ. ހައްޔަރުކުރީ، މި މަހުގެ 10 ވަނަ ދުވަހަށް އޭނާގެ ވިސާ ހަމަވެފައިވާތީ ކަމަށް މައުލޫމާތު ލިބެއެވެ.

ޖިންސީ ފުރައްސާރައިގެ މައްސަލައެއްގެ ދައުވާ ކްރިމިނަލް ކޯޓުގައި އުފުލާފައިވަނިކޮށް އަލީ ވަހީދު ރާއްޖެއިން ބޭރަށް ވަޑައިގެންނެވީ، ބޭސް ފަރުވާއަކަށް ކަމަށް ވިދާޅުވެއެވެ. އޭގެ ފަހުން ޝަރީއަތުގެ އަޑު އެހުމުގައި އޮންލައިކޮށް ކުރިއަށްގެންދިޔުމަށް ގޮންޖެހުންތަކެއްހުރި ކަމަށް ބުނެ އެ މައްސަލަ ޕީޖީ ސުޕްރީމް ކޯޓުގައި އިސްތިއުނާފް ކުރުމުން ޗިޓް ލިބި، އެ އަޑުއެހުމުގައި ބައިވެފައި ނުވާތީ، ކޯޓުގެ ހުރުމަތް ކަނޑާލި ކަމަށް ނިންމައި، އޭނާގެ މައްޗަށް 2 މަހާއި 12 ދުވަހުގެ ޖަލު ހުކުމެއް އިއްވާފައިވަނީ އޮގަސްޓް މަހުގެ 11 ވަނަ ދުވަހުއެވެ. އެ ހުކުމް ތަންފީޒު ކުރުމަށް ކަރެކްޝަނަލް ސަރވިސްއަށް އަމުރުކުރުމުން އަލީ ވަހީދު މާލެ ގެނައުމަށް އިންޓަރޕޯލްގެ އެހީތެރިކަމަށް ރާއްޖެއިން އެދުނެވެ.

އިނގިރޭސިވިލާތުން އަލީ ވަހީދު ހައްޔަރުކޮށްފައިވަނީ، އޮންލައިންކޮށް ނޫސް ކޮންފަރެންސެއް ބޭއްވުމަށް ތައްޔާރުވެވަޑައިގެން އިންނަވަނި ކޮށެވެ.

އަލީ ވަހީދުގެ މައްޗަށް ކްރިމިނަލް ކޯޓުގައި ދައުވާ އުފުލާފައިވަނީ ޓޫރިޒަމް މިނިސްޓަރު ކަމުގައި ހުންނަވައިގެން އެ މިނިސްޓްރީގެ އަންހެން މުވައްޒަފުން ތަކަކަށް ޖިންސީ ގޯނާ ކުރި މައްސަލައިގައެވެ. މި މައްސަލައިގައި އަލީ ވަހީދުގެ މައްޗަށް 7 ދައުވާއެއް އުފުލާފައިވެއެވެ. ކްރިމިނަލް ކޯޓުގައި މި މަހުގެ 26 ވަނަ ދުވަހު ތާވަލްކުރި އަޑު އެހުން އެ ކޯޓުންވަނީ ސިއްރުކޮށްފައެވެ. އެއަށްފަހު އިނގިރޭސިވިލާތުގައި ހަައްޔަރުކޮށްފައި ހުރުމުން އޭނާއަށް ކްރިމިނަލް ކޯޓަށް ހާޒިރު ނުވެވިގެން އޭނާގެ ޝަރީއަތުގެ އަޑުއެހުން ވަނީ ކެންސަލްކޮށްފައެވެ.