ފީފާ ސެންޗަރީ ކުލަބުގައި ދަގަނޑޭ ހިމެނުމުގެ އަމާޒެއް

ގައުމީ ފުޓްބޯޅަ ޓީމުގެ ގޯލު ބެލެހެއްޓި އެންމެ ކާމިޔާބު ގޯލްކީޕަރު އިމްރާން މުޙައްމަދާއެކު ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ގައުމީ ޓީމަށް 100 މެޗު ހަމަކޮށް، ފީފާ ސެންޗަރީ ކުލަބަށް ވަނުމަކީ ދިވެހި ފުޓްބޯޅައަށް ލޯބިކުރާ ކޮންމެ މީހަކުވެސް ބޭނުންވާނެ ކަމެއް ކަމަށް ގައުމީ ޓީމުގެ ކޯޗު އަލީ ސުޒޭން ބުނެފިއެވެ.

މީގެ ކުރިން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވަނީ އޮކްޓޯބަރު މަހު ރާއްޖޭގައި ބާއްވާ ސާފް ޗެމްޕިއަންޝިޕަކީ ދަގަނޑޭގެ ފަހު މުބާރާތަށްވުމުގެ ފުރުސަތު އޮތް ކަމަށް ބުނެފައެވެ.

އެކަމަކު ބުރާސްފަތި ދުވަހު ގައުމީ ޓީމާ އަލަށް ހަވާލުވި ކޯޗިން ޓީމުން ބޭއްވި ނޫސްވެރިންގެ ބައްދަލުވުމުގައި ސުޒޭން ބުނީ ކުރިއަށް އޮތް ސާފް ޗެމްޕިއަންޝިޕަށް ދަގަނޑޭ ނުކުންނާނީ ފިޓްކޮށް ކަމަށާއި، ދަގަނޑޭގެ އަނިޔާގެ ކަންކަމަކީ އަދި ކުރިއަށް އޮތް ސާފް ޗެމްޕިއަންޝިޕަކީ އޭނާ ސާފުގައި ކުޅޭ ފަހު މުބާރާތް ކަމަށް ދެކިގެން، ޕްރެޝަރުތަކެއް ނަގަން ޖެހޭ ކަމެއްގެ ގޮތުގައި ނުދެކޭ ކަމަށެވެ.

ފީފާ ސެންޗަރީ ކުލަބުގައި މި ވަގުތު ހިމެނެނީ ރާއްޖޭގެ އެންމެ ކުޅުންތެރިއެކެވެ. އެއީ 17 އަހަރު ވަންދެން ރާއްޖޭގެ ގޯލު ބެލެހެއްޓި އިމްރާން މުޙައްމަދެވެ. ދަގަނޑޭ ވަނީ މިހާތަނަށް ގައުމީ ޓީމަށް 85 މެޗު ކުޅެދީ 55 ލަނޑު ކާމިޔާބުކޮށްފައެވެ. އެހެންކަމުން ސެންޗަރީ ކުލަބަށް ވަންނަން ދަގަނޑޭއަށް 15 މެޗު ކުޅެން ޖެހޭނެއެވެ.

ސުޒޭން ބުނީ ދަގަނޑޭ ސެންޗަރީ ކުލަބަށް ވަނުމަށް އެއްވެސް ޕްރެޝަރެއް ނެތް ކަމަށާއި، ސާފް ޗެމްޕިއަންޝިޕަކީ އެހިސާބަށް ދަތުރުކުރުމަށް އޮންނަ މުބާރާތެއް ކަމަށެވެ. އަދި ދަގަނޑޭ ފީފާ ސެންޗަރީ ކުލަބަށް ވަނުމަކީ އެފްއޭއެމުގެ ރައީސް ބައްސާމުގެވެސް ވަރަށް ބޮޑު ވިސްނުންފުޅެއް ކަމަށާއި، އަދި އެކަން ކުރުމަށް ދަގަނޑޭ މަދުވެގެން އެއް އަހަރު ގައުމީ ޓީމަށް ކުޅެން ޖެހޭނެ ކަމަށްވެސް ބުންޏެވެ. އެހެންކަމުން ކުރިއަށް އޮތް ތަނުގައި ގައުމީ ޓީމަށް ކޮންމެ ކޯޗެއް އައި ކަމުގައިވީ ނަމަވެސް، ދަގަނޑޭއަށް ސްކޮޑުން ޖާގަ ދިނުމަކީ އޭނާގެ ވަރަށް ބޮޑު އެދުމެއް ކަމަށްވެސް ސުޒޭން ބުންޏެވެ.

ސާފުގެ އެންމެ ގިނަ ރިކޯޑު އޮތް ކުޅުންތެރިއަކީ ދަގަނޑޭއެވެ. އެގޮތުން މި މުބާރާތުގައި އެންމެ ގިނަ ލަނޑު ޖެހި ކުޅުންތެރިޔާގެ ރިކޯޑުވެސް އޮތީ އޭނާގެ އަތުގައެވެ.