"ސޭ ޗީޒް!"

މާތް ﷲ އިންސާނާއަށް ދެއްވި ސިފަތަކުގެ ތެރެއިން ހިނިތުންވުމަކީ މާތް ސިފައެކެވެ. އެއީ އިސްލާމްދީން އެކަމަށް ބާރުއަޅާ ސިފައެކެވެ. އަދި އެއީ އަނެއް އިންސާނާގެ ނަފުސާނީ ދުޅަހެޔޮކަމަށް ތިމާއަށް ދެވޭ ފަރުވާއަކަށް ވީހިނދު އެއީ ހިތްހެޔޮކަމުގެ ޢަލާމާތެކެވެ. އޯގާވެރިކަމާއި އަޅާލުން ދައްކުވައިދޭ ކަމެކެވެ. ކޮންމެ މީހަކަށް ވެސް އެމީހަކަށް ޚާއްސަ އަދި އެހެން މީހުންނާ ތަފާތު ހިނިތުންވުމެއް ލިބިގެންވެއެވެ. މިއިން ކޮންމެ ހިނިތުންވުމަކީ ވެސް އިންސާނާއަށް ތަފާތު އެތަކެއް ފައިދާ ތަކެއް ލިއްބައިދޭ ހިނިތުންވުން ތަކެކެވެ. އެއީ ދީނީ ނަޒަރަކުން ނުވަތަ އިލްމީ އަދި ސައިންސްގެ ނަޒަރިއްޔާތުން ބެލިނަމަވެސް މެއެވެ.

ހިނިތުންވުމުގެ ސަބަބުން ސިކުނޑިއަށް ހަމަޖެހުން ގެނުވައި އަރާމު ލިއްބައިދެއެވެ. ހަމައެއާއެކު އޭގެ ހެޔޮ އަސަރު މުޅި ހަށިގަނޑަށް ފެތުރިދެއެވެ. އަދި ހިނިތުންވާ ކޮންމެ ފަހަރަކު ސިކުނޑީގައިވާ ކުދިކުދި މޮލިކިއުލްތައް ހަށިގަނޑު ތެރެއަށް ފޮނުވައިދެއެވެ. އޭގެތެރޭގައި ޑޮޕޮމައިން، ސެރޮޓޮނިން، އެންޑޯފިން ހިމެނެއެވެ. މިއީ އިންސާނާ އުފާވެރިކަންމަތީ ބަހައްޓައިދޭ ކުދިކުދި އެހެނަސް ދިރިހުރުމަށް މުހިއްމު މޮލިކިއުލް ތަކެކެވެ. ހަށިގަނޑުން މި މާއްދާތައް އުފައްދާ މިންވަރު މަދުވެއްޖެނަމަ ނަފްސާނީ ބަލިތައް ކަމަށްވާ ޑިޕްރެޝަން އަދި އެންޒައިޓީގެ ޝިކާރައަކަށް ވުމަށް މަގުފަހި ވެއެވެ.

ވުމާއެކު ގިނަގިނައިން ހިނިތުންވުމުން މީހާ ހަމަޖެހި އެހެން މީހުންނަށް ވެސް މި އުފާވެރިކަން ފެތުރުމަށް މަގުފަހި ކޮށްދެއެވެ. މީގެ އިތުރުން ވެސް އެންޑޯފިން މިއީ ހަށިގަނޑަށް ލިބޭ ތަދުތައް ލުއި ކޮށްދިނުމަށް އެހީވެދޭ މާއްދާއެކެވެ. މީގެ ސަބަބުން ވެސް އިންސާނާ މޮޅިވުމާ ދުރުވެ ހިތްހަމަ ޖެހިގެން ހުރުމަށް އެހީވެދެއެވެ. ޢިލްމުވެރިންގެ ހޯދުންތަކުން އެނގޭ ގޮތުގައި، އިންސާނާއަށް ބޭނުންވާ އުފާވެރިކަމުގެ އިޙްސާސަކީ ބައެއްފަހަރު ކެއިންބުއިމާ އެއް ދަރަޖައަށް ބޭނުންޖެހޭ ކަމެކެވެ.

ސައިންސްވެރިން ހާމަކުރައްވާ ގޮތުގައި އެއް އިންސާނަކު ހިނިތުން ވެއްޖެނަމަ އެ ހިނިތުންވުން ފެންނަ މީހާއަށް ވެސް އިހުތިޔާރެއްނެތި ހިނިތުންވެވެއެވެ. ޑރ. އިބްރާހީމުލްފިޤީ ވިދާޅުވާ ފަދައިން ހިނިތުންވުމަކީ އެކެއްގެ މޫނުން އަނެކެއްގެ މޫނަށް “ވާރުތަވާ” ކަމެކެވެ. ނަތީޖާއަކަށް ވެގެން ދަނީ އެ ދެމީހުންގެ ހަށިގަނޑަށް ވެސް ހަމަޖެހުން ލިބިގެން ދިޔުމެވެ. އިތުރު ދިރާސާއަކުން ދައްކާ ގޮތުގައި ހިނިތުންވުމެއް ފެނިއްޖެ ނަމަ އިންސާނާގެ ސިކުނޑީގައިވާ އޯބިޓޯފްރޮންޓަލް ކޯޓެކްސް އެކްޓިވޭޓް ކޮށްދެއެވެ. މީގެ ސަބަބުން އެމީހާގެ ހިތާމަތައް މަތިން ހަނދާން ނެތިގެން ހިނގައިދެއެވެ.

މީގެ އިތުރުން ވެސް ހިނިތުންވުމަކީ އޭގެ ސަބަބުން ހަށިގަނޑުގެ ދިފާއީ ނިޒާމަށް އެތަކެއް ފައިދާތަކެއް ލިއްބައިދޭ ކަމެކެވެ. އެގޮތުން ހިނިތުންވެ ހީލާ ކޮންމެ ފަހަރަކު އިންސާނާގެ ފުއްޕާމޭގެ ޖާގަ އިތުރުކޮށްދީ ފުންކުރުމަށް އެހީތެރިވެއެވެ. މީގެ ސަބަބުން ނޭވާލާ ނިޒާމަށް ޖެހޭ ބަލިތަކުން ރައްކާތެރިވުމަށް މަގުފަހިވެއެވެ. މީގެ އިތުރުން ވެސް ފުއްޕާމޭ އަދި ހިތުގައިވާ މަސްތައް ވަރުގަދަކޮށްދީ ކޮންމެ ދުވަހަކު ކުރާ މަސައްކަތް އިތުރަށް ލުއިފަސޭހަ ކޮށްދީ އެކަން އިތުރަށް ފުރިހަމަ ކުރުމުގައި އެހީވެއެވެ. ވުމާއެކު ހިނިތުންވުމަކީ ކޮންމެ ދުވަހެއްގެ ވެސް އާންމު ދިރިއުޅުމުގެ މަސައްކަތާއި ނޭވާލާ ނިޒާމަށް ލިބިދޭ ބާރެކެވެ.

މި ހުރިހާ ކަމަކުން އެނގިގެން ދަނީ ހިނިތުންވުމަކީ ހުރިހާ ގޮތަކުން ވެސް ފައިދާހުރި ކަމެއްކަމެވެ. އައި އެއީ އެހެން މީހުންގެ ލޯބި ލިބި ސިއްހީ ގޮތުންނާއި ދުނިޔަވީ ގޮތުން ވެސް ގިނަ ފައިދާތަކެއް ލިއްބައިދޭ، ކޮންމެ މީހަކު ވެސް ކުރުން މުހިއްމު އަދި ފައިދާހުރި ކަމެކެވެ.