އިންޑިއާ އަތުން ލިބުނު ފިލާވަޅު ކުރިއަށްހުރި މެޗުތަކުގައި ފެނިގެންދާނެ ކަމަށާއި، މެޗުން ލިބުނު ނަތީޖާއާއި މެދު ހިތްހަމަ ޖެހޭ ކަމަށް ރާއްޖޭގެ ގައުމީ ބާސްކެޓް ޓީމުގެ ކެޕްޓަން މުހަންމަދު ޒިލާލް (ޒިލާ) ބުނެފިއެވެ.

 ސައުތް އޭޝިއަން ބާސްކެޓްބޯލް އެސޯސިއޭޝަން ޗެމްޕިއަންޝިޕް (ސާބާ ޗެމްޕިއަންޝިޕް)ގައި ރާއްޖެ ކުޅުނު ފުރަތަަމަ މެޗުން އިންޑިއާ އަތުން ބަލިވުމަށް ފަހު ނޫސްވެރިންނާއި ވާހަކަ ދައްކަމުން ޒިލާ ބުނީ، މެޗުން މި ހޯދުނު ނަތީޖާއާއެދު ހިތްހަމަ ޖެހޭ ކަމަށާއި، ފުރަތަމަ ފަހަރަށް އިންޑިއާ އަތުން 100 ޕޮއިންޓް ހަމަނުވެ ނިންމާލެވުމުން އެއީ ލިބުނު ވަރަށް ބޮޑު ކުރިއެރުމެއް ކަމަށެވެ.

ޒިލާ ބުނީ އެންމެ ފުރަތަމަ އިންޑިއާ އާއި ދެކޮޅަށް ކުޅުނުއިރު، އިންޑިއާއިން ތަށި ގެންދާ ސްކޯ އަދިވެސް ހަނދާން ވާކަމަށާއި، ނަމަވެސް މަޑުމަޑުން ރާއްޖޭގެ ޓީމު ފޯމަކަށް އެޅެމުން އައިސް އަމިއްލަ ފަސްގަނޑުގައި މި ނެރުނު ނަތީޖާއިން ހަމަ ގައިމުވެސް ޓީމު ކުރިއެރުން ހޯދަމުން އަންނަކަން ހާމަވެގެން ހިނގައްޖެކަމަށެވެ.

އިތުރަށް ވާހަކަ ދައްކަމުން ޒިލާ ބުނީ، މިއީ އަދި އެންމެ ހޯދަން ބޭނުންވާ ނަތީޖާ ނޫން ކަމަށާއި، ނަމަވެސް ހުރިހާ ކުޅުންތެރުންވެސް، އިތުބާރާއިއެކު އެ ކުޅުންތެރިއެއްގެ ދައުރު އެންމެ ފުރިހަމައަށް އަދާކުރުމަށް މަސައްކަތްކުރުމުން އެކަމާ ވަރަށް އުފާވެއްޖެ ކަމަށެވެ.

ޒިލާ ބުނީ، ޓީމުން ބޭނުންވީ މި މެޗަކީ ކުރިއަށްހުރި މެޗުތަކަށް ނިކުންނައިރު ލިބޭ ބޫސްޓަކަށް ކަމަށާއި، އެކަން ހާސިލް ވެއްޖެ ކަމަށް ގަބޫލުކުރާ ކަމަށެވެ. އެގޮތުން ކުރިއަށް ހުރި މެޗުތަކުގައި މި މެޗުން ހެދުނު ގޯސްތަކާއި، ރަނގަޅުކުރަން ފެންނަ ކަންކަން ބެލުމަށްފަހު ކުޅުން އިތުރަށް ވަރުގަދަ ކުރާނެ ކަމަށްވެސް ޒިލާ ބުނެޏެވެ.

މުބާރަތުގައި ރާއްޖެ ކުޅުނު ފުރަތަމަ މެޗުން އިންޑިއާއަތުން މި ބަލިވީ 84 ޕޮއިންޓް 42 ޕްއިންޓުންނެވެ. އެހެންކަމުން މިއާ މީގެކުރުން އިންޑިއާ އަތުން ރާއްޖެ ނެރެމުން އަންނަ ނަތީޖާތަކަށް ބަލާނަމަ، ލިބުނު ކުރިއެރުމެކެވެ.

މުބާރާތުގައި ރާއްޖެ ކުޅޭ ދެވަނަ މެޗުގައި ހޮނިހިރު ދުވަހުގެ ރޭ ރާއްޖެ ނިކުންނާނީ ނޭޕާލް އާއި ދެކޮޅަށެވެ.