ރައީސް ނަޝީދަށް ދިން ހަމަލާ ތަހުގީގުކުރުމަށް ހަމަޖެއްސެވި އިނގިރޭސިވިލާތުގެ ވަކީލަށް ދައުލަތުން ޚަރަދެއް ނުކުރޭ
24 އޯގަސްޓު 2021 | އަންގާރަ 09:23ރައްޔިތުންގެ މަޖިލީހުން ވެސް ބުނެފައިވަނީ އެ އިދާރާއަކުންް ވެސް އެކަމާ ގުޅިގެން ޚަރަދު ނުކުރާ ކަމަށް
ކްރިސްޓީ ބްރައިމްލޯ | ދި ޓަައިމްސް
މެއި މަހުގެ ހަ ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަހުގީގުގައި އެމަނިކުފާނުގެ ފަރާތުން ވަކާލާތު ކުުރުމަށް އިނގިރޭސިވިލާތުގެ ކުއީން ކައުންސިލުގެ މެންބަރެއް ކަމަށްވާ ކްރިސްޓީ ބްރައިމްލޯއަށް ދައުލަތުން ޚަރަދެއް ނުކުރައްވާ ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ހޯމަދުވަހު ރައީސް އޮފީހުގައި ކުރިއަށްގެންދިޔަ ނޫސްވެރިންގެ ބައްދަލުވުމުގައި މަބްރޫކް މިިހެން ވިދާޅުވެފައިވާއިރު މިކަމާ ގުޅިގެން ރައްޔިތުންގެ މަޖިލީހުން ވެސް ބުނެފައިވަނީ އެ އިދާރާއަކުން ވެސް އެކަމާ ގުޅިގެން ޚަރަދު ނުކުރާ ކަމަށެވެ.
ރައްޔިތުންގެ މަޖިލީހުގެ އިދާރާއިން ނެރުނު ބަޔާނެއްގައި ބުނީ ރައީސް ނަޝީދަށް އަމާޒުކޮށް ދިން ހަމަލާ ރޭވުމާއި ހިންގުމުގައި ޝާމިލުވާ އަދި އެކަމަށް ފަންޑުކުރި މީހުން ހޯދުމަށް އެކަމަނާ މަސައްކަތް ކުރައްވާނެ ކަަމަށެވެ. މީގެއިތުރުން އެމަނިކުފާނަށް ހަމަލާ ދިން ހުރިހާ މީހުން އިންސާފުގެ ކުރިމައްޗަށް ގެނައުމަށް ބައިނަލްއަގުވާމީ އަދި ރާއްޖޭގެ ގާނޫނުތަކާ އެއްގޮތަށް މަސައްކަތް ކުރައްވާނެ ކަމަށެވެ.
ރައީސް ނަޝީދަށް ދިން ހަމަލާއާ ގުޅިގެން ފަރުވާ ހޯއްދެވުމަށް އެމަނިކުފާނު މިވަގުތު ރާއްޖެއިން ބޭރުގައި ހުންނެވިއިރު ޗުއްޓީގެ މުއްދަތު އިތުރުކޮށްދެއްވައި އެމަނިކުފާނު ރާއްޖެއިން ބޭރުގައި ދިރިއުޅުމަށް ހިތް ޚަލާސްކުރައްވައި އެ ފުރުސަތު ފަހިކޮށްދެއްވުމަށް އެމަނިކުފާނު ރައްޔިތުންގެ މަޖިލީހުގައި ވަނީ އެދިވަޑައިގެންފައެވެ. މިކަމާ ގުޅިގެން އެމަނިކުފާނު ވަނީ މަޖިލީހުގެ ނާއިބުރައީސް އީވާ އަބްދުﷲއަށް ސިޓީއެއް ފޮނުއްވާފައެވެ. ސިޓީގައި އެމަނިކުފާނު ވިދާޅުވެފައިވަނީ އެ ސިޓީއަކީ ސަރުކާރާއި ދައުލަތުގެ އިދާރާއަކާ ނުރުހިގެން ފޮނުއްވާ ސިޓީއެއް ނޫން ކަމަށެވެ. އަދި އެއީ މިވަގުތުގެ ހާލަތަށް ރިއާޔަތްކޮށް، އިޚުލާސްތެރިކަމާއެކު ދަންނަވާ ދެންނެވުމެއް ކަމަށެވެ.
ރައީސް ނަޝީދު ވިދާޅުވީ 6 މެއިގައި އެމަނިކުފާނަށް ދިން ހަމަލާ ރާވައި ހިންގި ފަރާތްތަކުގެ ތަހުގީގު އަދި ނުނިމި ކުރިއަށްދާކަމަށް ދިވެހި ފުލުހުންގެ ޚިދުމަތުން ބުނެފައިވުމާއެކު އެ ތަހުގީގު ނިމި، އެކަންރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި އެމަނިކުފާނު ރާއްޖެ ވަޑައިގަތުމަކީ އެމަނިކުފާނުގެ އާއިލާއާއި ހެޔޮއެދޭ އެތައް ބަޔަކާއި އަދި އެމަނިކުފާނު ވެސް ޖެހިލުންވާ ކަމެއް ކަމަށެވެ.
