ރިޝްވަތުގެ ކުށް ސާބިތުވެ އިންޑޮނޭޝިއާގެ ކުރީގެ ވަޒީރަކަށް 12 އަހަރުގެ ޖަލު ޙުކުމެއް
23 އޯގަސްޓު 2021 | ހޯމަ 16:53އޭނާ ވަނީ ތަކުރާރުކޮށް މި ތުހުމަތުތަކަށް އިންކާރު ކުރައްވާފައި
އިންޑޮނޭޝިއާގެ ކުރީގެ ސޯޝަލް އެފެއަރޒް މިނިސްޓަރ ޖުލިއާރީ ބަތުބާރާ
ކޮވިޑް-19ގެ ބަލިމަޑުކަމުގެ ތެރޭގައި ރިޝްވަތު ނެގިކަމުގެ ކުށް ސާބިތުވެ އިންޑޮނޭޝިއާގެ ކުރީގެ ވަޒީރަކަށް 12 އަހަރުގެ ޖަލު ޙުކުމެއް އިއްވައިފިއެވެ.
ޖަކާޓާގެ ކޮރަޕްޝަން ކޯޓުން ހޯމަ ދުވަހު މި ޙުކުމް އިއްވާފައިވަނީ އިންޑޮނޭޝިއާގެ ކުރީގެ ސޯޝަލް އެފެއާޒް މިނިސްޓަރ ޖުލިއާރީ ބަތުބާރާގެ މައްޗަށެވެ. ފުލުހުން ހިންގި ޚާއްސަ ސްޓިންގ އޮޕަރޭޝަނެއްގައި އޭނާ ހައްޔަރުކުރީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ. ހައްޔަރުކުރިއިރު ސޫޓްކޭސްތަކާއި، ދަބަސްތަކުގެ އިތުރުން، ސިޓީ އުރަތަކުގައި ގިނަ އަދަދެއްގެ ފައިސާތައްވެސް ހޯދާފައިވެއެވެ.
ރިޕޯޓުތައް ބުނާގޮތުން މިއީ ހައްތަހާވެސް ރިޝްވަތުގެ ފައިސާއެވެ. އެގޮތުން 1.2 މިލިއަން އެމެރިކާ ޑޮލަރު ރިޝްވަތުގެ ގޮތުގައި ނަގާފައިވާއިރު، މި ފައިސާއަކީ ކޮވިޑް-19ގެ ބަލިމަޑުކަމުގެ ތެރޭގައި ފަޤީރު އާއިލާތަކަށް ކާބޯތަކެތި ފޯރުކޮށްދިނުމުގެ މަސައްކަތްތަކާ ގުޅުންހުރި ފައިސާކަން އެ ޤައުމުގެ ނޫސްތަކުން ވަނީ ރިޕޯޓު ކޮށްފައެވެ.
ޖުލިއާރީގެ މައްޗަށް ކޮށްފައިވާ ޙުކުމުގައި ބުނެފައިވަނީ ޖަލު ޙުކުމް ތަންފީޒު ކުރެއްވުމަށްފަހުވެސް އިތުރު 4 އަހަރު ސަރުކާރުގެ އެއްވެސް ވަޒީފާއެއް އޭނާއަށް އަދާ ނުކުރެއްވޭނެ ކަމަށެވެ. ނަމަވެސް އޭނާ ވަނީ ތަކުރާރުކޮށް މި ތުހުމަތުތަކަށް އިންކާރު ކުރައްވާފައެވެ.
