ރައީސް ނަޝީދަށް އިންޒާރު ދިން މީހާ މީދޫން ހައްޔަރުކޮށްފި

މީސްމީޑިއާ މެދުވެރިކޮށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސަށް އިންޒާރު ދިން މީހަކު ފުލުހުން ހައްޔަރު ކޮށްފިއެވެ.

އެކަމާ ގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ، ރައީސް ނަޝީދަށް މީސްމީޑިއާ މެދުވެރިކޮށް އިންޒާރު ދިން މީހަކު ރ އަތޮޅު މީދޫއިން ހައްޔަރު ކޮށްފައިވާ ކަމަށެވެ. ކޯޓު އަމުރެއްގެ ދަށުން އޭނާ ހައްޔަރު ކޮށްފައިވަނީ ހޯމަ ދުވަހުކަން ފުލުހުންގެ މީޑިއާ އޮފިޝަލު ފާހަގަ ކުރެއްވިއެވެ.

މި މައްސަލަ ފުލުހުން މިހާރު ގެންދަނީ ތަހުގީގު ކުރަމުންނެވެ.

މައުލޫމާތު ލިބިފައިވާ ގޮތުގައި މި މައްސަލައަކީ ރައީސް ނަޝީދު އަނބުރާ ރާއްޖެ ވަޑައިގެންފިނަމަ، "ބަދުރު ދުވަހު އަބޫޖަހުލަށް ހެދިގޮތް ހަދާނަން" ކަމަށް ބުނެ، ފޭސްބުކްގައި މީހަކު ކުރި ޕޯސްޓަކާއި ގުޅޭ މައްސަލައެކެވެ.

މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށް ދިން ޙަމަލާއަށްފަހު ހަރުކަށި ފިކުރާއި، ޓެރަރިޒަމްގެ މައްސަލަތައް އިތުރު އިސްކަމެއް ދީގެން ތަންފީޒީ އިދާރާތަކުން ގެންދަނީ ފިޔަވަޅުތައް އަޅަމުންނެވެ.