ފޭކް ބުކިންގ ހައްދައިގެން ފަތުރުވެރިން ގެންނަމުންދާ މައްސަލަ ފުލުހުން ބަލަން ފަށައިފިއެވެ.

ފަތުރުވެރިން ރާއްޖެއަށް އެތެރެވުމުގެ ކުރިން ތިބޭނެ ތަނެއް އިމިގްރޭޝަނަށް، ޕޯޓަލް މެދުވެރިކޮށް ހުށަހަޅަންޖެހޭއިރު، އެއްތަނަކަށް މާގިނަ ބުކިންގ ހައްދާފައި ހުންނަ މައްސަލަތަކާއި، ފަތުރުވެރިންނަށް އޮޅުވާލައިގެން ގެނެސް އެމީހުން މަގުމަތިކޮށްލާ މައްސަލަތަކަކާއި، އާންމުން ދިރިއުޅޭ ގޭގޭގައި މީހުން ކަރަންޓީން ކުރުމުގެ މައްސަލަތަކެއް މިފަހުން ވަނީ ފެންމަތިވެފައެވެ.

އެކަމާ ގުޅޭގޮތުން ފުލުހުން ބުނީ، ބުކިންގ އާ ގުޅޭ މައްސަލަތަކެއް ފުލުހުންނަށް ހުށައަޅާފައިވާ ކަމަށެވެ. އަދި އެ މައްސަލަ ފުލުހުން މިހާރު ތަހުގީގު ކުރަމުންދާކަމަށް ފުލުހުންގެ މީޑިއާ އޮފިޝަލު ވިދާޅުވިއެވެ.

މައުލޫމާތު ލިބިފައިވާ ގޮތުގައި މި މައްސަލަ ބަލަމުންދަނީ ފުލުހުންގެ އިކޮނޮމިކް ކްރައިމް ޑިޕާޓުމަންޓުންނެވެ.

އުސޫލުތަކާ ޚިލާފަށް ގިނަ އަދަދެއްގެ ފަތުރުވެރިން ރާއްޖޭގައި ޗުއްޓީ ހޭދަކުރަމުންދާ ކަމުގެ މައުލޫމާތު ލިބެމުންދާތީ, ޓޫރިޒަމް މިނިސްޓްރީން މިހާރު ވަނީ ޚާއްސަ އިންސްޕެކްޝަނެއް ފަށާފައެވެ. އޮޅުވާލައިގެން ސައްހަ ނޫން ބުކިންތަކެއް ދިނުމުގެ ސަބަބުން މާލޭގައި ތާށިވި 27 ފަތުރުވެރިއަކު ސަރުކާރުގެ ބެލުމުގެ ދަށުގައި މިވަގުތު ވެސް އެބަތިއްބެވެ. އޭގެ ތެރޭގައި ގިނަ އަދަދެއްގެ ކުޑަކުދިން ވެސް ހިމެނޭއިރު، އެމީހުންނަށް އޮޅުވާލައިގެން ރާއްޖެއަށް ގެނައި މީހާ މިހާރު ހައްޔަރު ކޮށްފައިވާ ކަމަށް ވެއެވެ.

އޭގެ އިތުރުން، ހަތަރު ކޮޓަރިއަކަށް ބުކިން ހައްދައިގެން ރާއްޖެއަށް އައި އިންޑިޔާގެ 189 މީހަކު އަނބުރާ ފޮނުވާލަން ޖެހުނުއިރު، އެކަން ވެސް ސަމާލުކަމަށް އައީ އެންމެ 4 ކޮޓަރިއަށް 200އާ ގާތްކުރާ އަދަދަށް މީހުން ބުކިން ހައްދާފައި އޮތުމުންނެވެ.