ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުން ފްރެއިބާގް އަތުން ބޮރޫޝިއާ ޑޯޓްމުންޑް ބަލިވެއްޖެއެވެ.

ރަށުން ބޭރުގައި ކުޅުނު މެޗުން ޑޯޓްމުންޑް ބަލިވީ 2-1 ގެ ނަތީޖާއަކުންނެވެ.

މި މެޗުގައި ފްރެއިބާގުން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ހަވަނަ މިނެޓުގައި ލިބުނު ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ ވިންޗެންޒޯ ގްރީފޯއެވެ.

އޭގެ ފަސް މިނެޓު ފަހުން ނަތީޖާ އެއްވަރުކުރަން ޑޯޓްމުންޑުގެ ޖޫޑް ބެލިންހަމަށް ހުސް ފުރުސަތެއް ލިބުނު ނަމަވެސް، އޭރިއާ ތެރެއިން އޭނާ ފޮނުވާލި ހަމަލާ ފްރެއިބާގުގެ ގޯލްކީޕަރު ވަނީ ދިފާއުކޮށްފައެވެ. އަދި މެޗުގެ 32 ވަނަ މިނެޓުގައި ބެލިންހަމް ބޮލުން ފޮނުވާލި ހަމަލާއެއް ވަނީ ގޯލުގެ އަރިމަތީ ދަނޑިއަށްވެސް އަމާޒުވެފައެވެ.

މި މެޗުގައި ފްރެއިބާގުން ލީޑު ފުޅާކޮށްފައިވަނީ ދެވަނަ ހާފު ފަށައިގެން އަށްވަނަ މިނެޓުގައެވެ. ލޫކަސް ހޯލާގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ރޮލަންޑް ޝަލާއިއެވެ. އެކަމަކު އޭގެ ހަ މިނެޓު ފަހުން ފަރެއިބާގުގެ ޔަނިކް ކައިޓަލް އަތުން ބައިކޮޅަށް ވަން ލަނޑާއެކު ޑޯޓްމުންޑުން ވަނީ ފަރަގު ކުޑަކޮށްފައެވެ.

ލީގުގައި ހޮނިހިރު ދުވަހުގެރޭ ކުޅުނު މެޗުން ފްރެއިބާގް އަތުން ޑޯޓްމުންޑް ބަލިވިއިރު، މިދިޔަ އަންގާރަ ދުވަހުގެރޭ ކުޅުނު ޖަރުމަން ސުޕަ ކަޕުގެ މެޗުންވެސް ޑޯޓްމުންޑް ވަނީ ބަލިވެފައެވެ. ލީގުގައި ޑޯޓްމުންޑުން ދެން މެޗެއް ކުޅޭނީ އަންނަ ހުކުރު ދުވަހެވެ. އެ ދުވަހު އަމިއްލަ ދަނޑުގައި ޑޯޓްމުންޑް ނުކުންނާނީ ހޮފެއިންހެއިމާ ދެކޮޅަށެވެ.