އައު ސަރުކާރު އެކުލަވާލުމުގެ މަޝްވަރާތަކަށް ޠާލިބާންގެ ކޯ-ފައުންޑަރ މުއްލާ ޢަބްދުލްޣަނީ ކާބުލްއަށް

ޠާލިބާނުންގެ ބާރުގެ ދަށަށް އަފްޣާނިސްތާނު ގެނައިތާ ހަފުތާއެއްވާން ކައިރިވެފައިވާއިރު, އައު ސަރުކާރެއް އެކުލަވާލުމުގެ ވާހަކަތައް ދެއްކުމަށް އެ ޖަމާޢަތުގެ އެއް ކޯ-ފައުންޑަރ އަދި ޑެޕިޔުޓީ ލީޑަރ ޢަބްދުލްޣަނީ ބިރާދަރު ކާބުލްއަށް އަތުވެއްޖެއެވެ.

ޠާލިބާންގެ ބާރުގެ ދަށަށް އަފްޣާނިސްތާނު ގެނެސްފައިވާއިރު, އެގައުމުގައި ތިބި އެހެން ގައުމުތަކުގެ މީހުން އަނބުރާ ގައުމަށް ދިޔުމުގެ މަސައްކަތްތައް އަންނަނީ ކުރަމުންނެވެ. މިހާތަނަށް އައިއިރު އެތައް ހާސް ބަޔަކު އަފްޣާނިސްތާނުން އަނބުރާ އެެމީހުންގެ ގައުމުތަކަށް ގޮސްފައިވާއިރު, ކާބުލްގެ އެއަރޕޯޓްގެ ސެކިޔުރިޓީގެ ހާލަތުވެސް އަންނަނީ ގޯސްވަމުންނެވެ. ހުޅަނގުގެ ގައުމުތަކުން އަންނަނީ އެގައުމުތަކުގެ ރައްޔިތުންގެ އިތުރުން, އަފްޣާނިސްތާނުގެ ރައްޔިތުންގެ ތެރެއިން ގައުމުން ބޭރަށް ދާން ބޭނުންވާ ފަރާތްތަކަށް އެފުރުސަތު ދެމުންނެވެ.

އައު ސަރުކާރު އެކުލަވާލުމުގެ ވާހަކަތަކުގެ ތެރެއިން ހަނގުރާމަވެރި ކޮމާންޑަރުންނާއިމ ކުރީ ސަރުކާރުގެ ވެރިންނާއި، ސިޔާސަތުތައް އެކުލަވާލާ މީހުންނާއި އަދި ދީނީ ޢިލްމުވެރިންނާ ބައްދަލުކުރާނެ ކަމަށް ޠާލިބާންގެ އޮފިޝަލު ވަނީ ބުނެފައެވެ.

ޤަތަރުގައި ހުރުމަށްފަހު ބިރާދަރު އެނބުރި އަފްޣާނިސްތާނަށް އައިސްފައިވަނީ މިދިޔަ އަންގާރަ ދުވަހުއެވެ. އޭނާ އައީ ޠާލިބާން އެސިޓީއަކަށް އުފަންވި ކަންދަހާރަށެވެ. އެއަށްފަހު މިހާރު ކާބުލްއަށް މިވަނީ އައިސްފައެވެ.

ބިރާދަރުއަކީ 2020 ވަނަ އަހަރު އެމެރިކާއިން ތާލިބާނުންނާއެކު ކުރިޔަށް ގެންދިޔަ ސުލްހައިގެ ވާހަކަތަކުގައި ތާލިބާނުންގެ ފަރާތުން އެންމެ އިސްކޮށް ވާހަކަ ދެއްކި މީހާއެވެ. އައު ސަރުކާރެއް އެކުލަވާލުމުގެ ވާހަކަތަކުގައި އޭނާއަކީ މުހިންމު މީހެކެވެ. މިފަހުން އޭނާ ވަނީ އަފްޣާނިސްތާނުގެ ކުރީގެ ލީޑަރުންނާއެކު ވާހަކަތައް ކުރިޔަށްގެންގޮސްފައެވެ. އޭގެތެރޭގައި އަފްޣާނިސްތާނުގެ ކުރީގެ ރައީސް ޙާމިދު ކަރްޒާއީވެސް ހިމެނެއެވެ.

އަފްޣާނިސްތާނުގެ އޮފިޝަލުން ބުނެފައިވަނީ އޮގަސްޓްމަހުގެ 31 ވަނަ ދުވަހު, އެގައުމުގައި ތިބި ބޭރު ގައުމުތަކުގެ ފައުޖުތައް އެގައުމުން ފައިބަންދެން ޠާލިބާނުން އައު ސަރުކާރެއް ގާއިމެއް ނުކުރާނެ ކަމަށެވެ. މީގެއިތުރުން ޠާލިބާންގެ އޮފިޝަލުން ބުނެފައިވަނީ އަފްޣާނިސްތާނުގައި ދެން އުފެދޭ ސަރުކާރެއް އޮންނާނެ ގޮތުގެ އޮނިގަނޑު ކުރިޔަށް އޮތް ހަފްތާތަކުގައި އެޖަމާޢަތުން ހާމަކުރާނެ ކަމުގައެވެ. އައު ސަރުކާރުގައި އޮންނާނީ އެތެރޭގެ ސަލާމަތީ ކަންކަން ބެލެހެއްޓުމަށް ވަކި ޓީމެއް, އަދި އިޤްތިޞާދީ ކަންކަން ބެލެހެއްޓުމަށް ވަކި ޓީމެއްގެ ގޮތުގައި ކަމަށް ޠާލިބާންގެ އޮފިޝަލުން ވަނީ ބުނެފައެވެ. މީގެއިތުރުން ކުރީ ސަރުކާރުތަކުގައި މަސައްކަތްކޮށްފައިވާ ކަމާބެހޭ މާހިރުންވެސް ބައިވެރިކުރާނެ ކަމަށް ވަނީ ބުނެފައެވެ.

އައު ސަރުކާރުގައި އޮންނާނީ ހުޅަނގުން ސިފަކުރާފަދަ ޑިމޮކްރަސީގެ އުސޫލެއް ނޫން ކަމަށާއި, ނަމަވެސް ހުރިހާ އެންމެންގެ ޙައްޤުތައްވެސް ރައްކާތެރިކުރާނެ ކަމަށް އެޖަމާޢަތުގެ އޮފިޝަލް ވަނީ ބުނެފައެވެ. ކުރިޔާ ޚިލާފަށް މިފަހަރު ޠާލިބާނުން ފެންނަނީ ތަފާތު ސިޔާސަތުތަކާއެކުގައެވެ. އެމީހުން ބުނަމުން އަންނަނީ, ބޭނުންވަނީ އަފްޣާނިސްތާނަށް ސުލްހަ ގެނައުމަށްކަމަށެވެ.

އަނެއްކޮޅުން ޠާލިބާނުންގެ ބާރުގެ ދަށަށް އަފްޣާނިސްތާނު ގެނައުމަށްފަހު, މިހަފުތާގައި މަސައްކަތަށް ނިކުތް ސަރުކާރުގެ ބައެއް މުވައްޒަފުން އޮފީސްތަކަށް ދިޔުމަށް ޠާލިބާނުން ވަނީ ހުރަސްއަޅާފައިކަމަށް އަލްޖަޒީރާއިން ވަނީ ރިޕޯޓްކޮށްފައެވެ. އެގޮތުން ފޮރިން މިނިސްޓްރީގެ މުވައްޒަފުންނާ ހަވާލާދީ އަލްޖަޒީރާގައި ރިޕޯޓްކޮށްފައިވާ ގޮތުގައި އެމީހުންނަށް އޮފީހަށް ވަނުމަށް ހުރި މަގުތައް ޠާލިބާނުން ވަނީ ބަންދުކޮށްފައެވެ. އަދި ބައެއް މީހުން ބުނާ ގޮތުގައި އެމީހުންނަށް ޠާލިބާނުން އަންގާފައިވަނީ އައު ސަރުކާރު އުފެދި އައު މިނިސްޓަރުންނާއި ޑިރެކްޓަރުން އައްޔަނުކުރެވެންދެން އޮފީހަށް ނައިސް ތިބުމަށެވެ.

ނަމަވެސް އެހެން ބައެއް އޮފީސްތަކުގެ މުވައްޒަފުން, އޮފީސް ކާޑު ދެއްކުމުން މަސައްކަތަށް ދިޔުމުގެ ހުއްދަ ދީފައިވާކަމަށް އަލްޖަޒީރާއިން ވަނީ ރިޕޯޓްކޮށްފައެވެ.