ޠާލިބާނުން ޑޯރ-ޓު-ޑޯރއަށް، އދ އިން ކުރަނީ ބަދަލު ހިފުމުގެ ތުހުމަތުތަކެއް

ޠާލިބާނުން އަފްޣާނިސްތާނުގެ އެކި އަވަށްތަކުގައި ޑޯރ-ޓު-ޑޯރ ހިންގައި، ޠާލިބާނުންނާ އިދިކޮޅު ފަރާތްތަކަށް ޓާގެޓް ކުރަމުންދާކަމަށް އަޑުފެތުރިއްޖެއެވެ.

އދ ގެ ތްރެޓް އެސެސްމަންޓް ރިޕޯޓަކާ ޙަވާލާދީ އަލްޖަޒީރާގައި ރިޕޯޓު ކޮށްފައިވާ ގޮތުން ޠާލިބާނުން ގެންދަނީ އިދިކޮޅަށް ނިސްބަތްވާ އާއިލާތައް ހޯދައި، ގޭގެއަށް ޒިޔާރަތް ކުރަމުންނެވެ. އެއާއެކު، އަފްޣާނިސްތާނުގެ އައު ވެރިން ބަދަލު ހިފުމުގެ ހަރަކާތްތަކެއް ރާވަމުންދާކަމަށް އދ ގެ މި ރިޕޯޓުގައި ވަނީ ތުހުމަތުކޮށްފައެވެ.

އދ އިން އެހެން ބުނެފައިވާއިރު، އަފްޣާންގައި ކުރަމުން ދިޔަ ހަނގުރާމަ ނިމިއްޖެ ކަމަށާއި، އެދެނީ ބައިނަލް އަޤުވާމީ މުޖްތަމައުން ސުލްޙަވެރި ގުޅުމެއް ބާއްވަން ކަމަށް ޠާލިބާނުންގެ ސިޔާސީ އޮފީހުން ދާދި ފަހުން ވަނީ ބުނެފައެވެ. އެގޮތުން ޠާލިބާނުންގެ ތަރުޖަމާނު މުހައްމަދު ނައީމް ވަނީ ބައިނަލްއަޤުވާމީ ސުލްޙައަށް ވެސް ގޮވާލައްވާފައެވެ. އޭނާ ވިދާޅުވީ، ބޭނުންވާ ކަންކަން ހާސިލްވެފައިވާ ކަމަށާއި، އެއީ ގައުމުގެ މިނިވަންކަމާއި ރައްޔިތުންނަށް މިނިވަންކަން ހޯދައި ދިނުން ކަމަށެވެ. އަދި އަމިއްލަ ބިން ބޭނުންކޮށްގެން ގައުމަށް ހަމަލާދިނުމުގެ ފުރުސަތު ނުދޭނެ ކަމަށާއި، އެއްވެސް މީހަކަށް އަނިޔާވެރިވާން ބޭނުން ނުވާ ކަމަށެވެ.

އޭގެ އިތުރުން، ރައްޔިތުންގެ ގެދޮރަށް ވަދެ ކުރީގެ ސަރުކާރަށް ޚިދުމަތްކުރި މީހުންނަށް އެއްވެސް އަދަަބެއް ދިނުމުގެ ވިސްނުމެއް ނެތް ކަަމުގެ ޔަޤީންކަންވެސް ޠާލިބާނުން ވަނީ ދީފައެވެ.

އަފްޣާނިސްތާނުގެ މަސްރަޙު ގޯސްވެފައިވުމާއެކު، ބޭރުގެ އެކި ގައުމުތަކުގެ ޑިޕްލޮމެޓުންނާއި އޮފިޝަލުން އަނބުރާ އެ ގައުމުތަކަށް ދިއުމުގެ ކަންކަން އަދިވެސް ދަނީ ކުރަމުންނެވެ.