ކުށުގެ ތެރެއަށް ކުޑަކުދިން ނެރޭ މީހުންނާއި ދެކޮޅަށް ދައުވާ ކުރާނަން – ޕީޖީ
19 އޯގަސްޓު 2021 | ބުރާސްފަތި 13:40ގޭންގުތަކުން ކުޑަކުދިން ބޭނުން ކޮށްގެން ކުށްކުރާ މިންވަރު އަންނަނީ އިތުރުވަމުން
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
ކުޑަކުދިން ކުށުގެ ތެރެއަށް ނެރޭ މީހުންނާއި ދެކޮޅަށް ގާނޫނީ ގޮތުން ކުރެވެންހުރި ދައުވާތައް ކުރާނެ ކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވެއްޖެއެވެ.
މިދިޔަ ޖޫން މަހުގެ ތެރޭގައި އުމުރުން 13 އަހަރުގެ ކުއްޖަކު ރަހީނުކޮށް މަރާލައި މޫދަށް އެއްލާލާފައި އޮއްވައި ފެނުން މައްސަލައާ ގުޅޭ ގޮތުން ބުރާސްފަތި ދުވަހު ޕީޖީ ޝަމީމް ވަނީ ނޫސްވެރިންނާއި ބައްދަލުކުރައްވާފައެވެ. ޝަމީމް ވިދާޅުވީ އެއީ ރާއްޖޭގައި ހިނގައިގެން ވާނެ ކަމެއް ނޫން ކަމަށެވެ.
ޕްރޮސެކިއުޓާ ޖެނެރަލް އޮފީހުގައި ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީޖީ ޝަމީމް ވިދާޅުވީ، ކުޑަކުދިން ބޭނުންކޮށްގެން ކުށްކުރުމަށް ޖާގައެއް ނުދެއްވާނެ ކަމަށާއި، އެފަދަ ކަމެއް ކުޑަކުދިން ލައްވައި ކުރުވާ މީހުންނާއި ދެކޮޅަށް ދައުވާ ކުރައްވާނެ ކަމަށެވެ.
ޕީޖީ ޝަމީމް މިހެން ވިދާޅުވިއިރު، ރާއްޖޭގެ ގޭންގުތަކުން ކުޑަކުދިން އެކި ކުށްތަކުގައި ބޭނުން ކުރުން ވަނީ އާންމުވެފައެވެ.
ރަހީނުކޮށް މަރާލައި 13 އަހަރުގެ ކުއްޖަކު މޫދަށް އެއްލާލި މައްސަލާގައި ގަސްތުގައި މީހަކު މެރުމުގެ ދައުވާ ކޯޓަށް ފޮނުވަން ނިންމާފައިވާއިރު، މި މައްސަލާގައި ދައުވާ ކުރަނީ ނ. ލަންދޫ ބަގީޗާގޭ އިބްރާހީމް ޒިހާންގެ އިތުރުން 17 އަހަރުގެ ފިރިހެން ކުއްޖެއްގެ މައްޗަށެވެ.
ޕީޖީ ވިދާޅުވީ ހަތް ބާވަތެއްގެ 13 ދައުވާއެއް ޒިހާންގެ މައްޗަށް އުފުލާއިރު މި ދައުވާތައް ސާބިތުވެއްޖެނަމަ ގާތްގަނޑަކަށް 100 އަހަރުގެ ޖަލު ހުކުމެއް ޒިހާންގެ މައްޗަށް އަންނާނެ ކަމަށެވެ.
