ބަޝުންދަރާއިން ހޯދީ ހައްގު މޮޅެއް: ވިޑަކޮވިޗް

އޭއެފްސީ ކަޕުގެ ދެކުނު އޭޝިއާއަށް ޚާއްސަ ގްރޫޕުގައި ބުދަ ދުވަހުގެރޭ ކުޅުނު މެޗުން ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއިން ހޯދީ ހައްގު މޮޅެއް ކަމަށް މާޒިޔާ ސްޕޯޓްސް އެންޑް ރެކްރިއޭޝަނުގެ ކޯޗު ރިސްޓޯ ވިޑަކޮވިޗް ބުނެފިއެވެ.

ބުދަ ދުވަހުގެރޭ ގައުމީ ފުޓްބޯޅަ ދަނޑުގައި ކުޅުނު މެޗުން ބަޝުންދަރާ މޮޅުވީ 2-0 ގެ ނަތީޖާއަކުންނެވެ.

މެޗަށްފަހު ވާހަކަ ދައްކަމުން މާޒިޔާގެ ކޯޗު ވިޑަކޮވިޗް ބުނީ ބަޝުންދަރާއަށް ލިބުނީ ހައްގު މޮޅެއް ކަމަށާއި، އެކަމަކު މާޒިޔާއަށް ދެވަނަ ބުރުން ޖާގައެއް ހޯދުމުގެ ފުރުސަތު އަދި ނުގެއްލޭ ކަމަށެވެ.

ވިޑަކޮވިޗް ބުނީ މާޒިޔާކޮޅަށް ވަން ފުރަތަމަ ލަނޑަކީ ނަސީބުދެރަކަމުން ވަން ލަނޑެއް ކަމަށާއި، އެ ލަނޑަށްފަހު މާޒިޔާގެ ގޭމް އަލުން ނުކުޅެވުނު ކަމަށެވެ. އަދި މެޗަށް ނުކުތް އިރުވެސް މާޒިޔާއަށްވުރެ ފޯމުގައި ބަޝުންދަރާ އޮތްކަން އެނގޭ ކަމަށާއި، އަދި މާޒިޔާގެ ކުޅުންތެރިންގެ ފަރާތުން ފުރަތަމަ ހާފުގައި ގޯސްތަކެއް ހެދުނު ކަމަށްވެސް ވަނީ ބުނެފައެވެ.

ބަޝުންދަރާ އަތުން މާޒިޔާ ބަލިވިއިރު، މިއީ މާޒިޔާއިން މިދިޔަ އަހަރުގެ ޑިސެމްބަރު މަހު ކުޅުނު އެފްއޭ ޗެރިޓީ ޝީލްޑް މެޗުގައި އީގަލްސް އަތުން ބަލިވި ފަހުން، އެ ޓީމު ބަލިވި ފުރަތަމަ ފަހަރެވެ. އަދި މިއީ މާޒިޔާގެ ކޯޗުގެ މަގާމާ ޖެނުއަރީ މަހު ހަވާލުވި ވިޑަކޮވިޗުގެ އިރުޝާދުގެ ދަށުން އެ ޓީމު ބަލިވި ފުރަތަމަ މެެޗެވެ. މީގެ ކުރިން ވިޑަކޮވިޗުގެ ކޯޗުކަމުގައި ކުޅުނު 10 މެޗުގެ ތެރެއިން އަށް މެޗުން މާޒިޔާ މޮޅުވިއިރު، ދެ މެޗު ވަނީ އެއްވަރުވެފައެވެ.

ބުދަ ދުވަހުގެރޭ ކުޅުނު މެޗަށްފަހު ވާހަކަ ދައްކަމުން ބަޝުންދަރާގެ ކޯޗު ސްޕެއިންގެ އޮސްކާ ބްރުޒޮން ބުނީ ބަޝުންދަރާއިން ނުކުތީ ބޯޅަ ހިފަހައްޓައިގެން މޮޅު ކުޅުމެއް ކުޅުމުގެ ބަދަލުގައި ނަތީޖާ ނެރުމަށް ކަމަށެވެ. އަދި މެޗުގައި ބަޝުންދަރާގެ ޕްލޭން ހާސިލުވި ކަމަށްވެސް ބުންޏެވެ.

އޮސްކާ ބުނީ މެޗަށް ނުކުތް އިރުވެސް މާޒިޔާއިން އެޓޭކުކުރާ ވަގުތުގައި އެ ޓީމުގެ ފަހަތުން ޖާގަތަކެއް ލިބޭނެކަން އެނގޭ ކަމަށާއި، މެޗުގައި ބަޝުންދަރާއިން އޭގެ ފައިދާ ނެގި ކަމަށެވެ. އަދި ގްރޫޕް ސްޓޭޖުގެ ފުރުސަތު އަދި އެއްވެސް ޓީމަކަށް ނުގެއްލޭ ކަމަށާއި، އެގޮތުން ބެންގަލޫރާއި މާޒިޔާއަށްވެސް ދެވަނަ ބުރަށް ދިޔުމުގެ ފުރުސަތު އަދިވެސް އެބައޮތް ކަމަށް ވަނީ ބުނެފައެވެ.

ބުދަ ދުވަހުގެރޭ ކުޅުނު މެޗަކީ ބަޝުންދަރާއިން އޭއެފްސީ ކަޕުގައި ކުޅުނު ދެވަނަ މެޗެވެ. ފުރަތަމަ މެޗުގައި މިދިޔަ އަހަރުގެ އޭއެފްސީ ކަޕުގައި ބަންގްލަދޭޝްގައި ކުޅުނު މެޗުން ބަޝުންދަރާ މޮޅުވީ ރާއްޖޭގެ ޓީސީ ސްޕޯޓްސް ކުލަބު އަތުން 5-1 ގެ ނަތީޖާއަކުންނެވެ.