ކުރީގެ ޑިފެންސް މިނިސްޓަރު އަދި ދަނގެތީ ދާއިރާގެ މެމްބަރ ކާރނަލް ރިޓަޔަރޑް މުހައްމަދު ނާޒިމް ޑިފެންސް މިނިސްޓަރަކަށް ހުންނަވަނިކޮށް ގެއިން ފިސްތޯލަ ފެނުނު މައްސަލާގައި، އެކަމާ ގުޅިގެން އޭރުގެ ރައީސުލްޖުމްހޫރިއްޔާ އަބްދުﷲ ޔާމީނާ ގުޅުވައި ނާޒިމް ދައްކަވާފައިވާ ވާހަކަތައް ޕީޕީއެމް/ ޕީއެންސީ ކޯލިޝަންގެ ފަރާތުން ދޮގުކޮށްފިއެވެ.
އެކަން ދޮގުކޮށް އެކޯލިޝަންގެ ފަރާތުން ނެރެފައިވާ ނޫސްބަޔާނެއްގައި ބުނެފައިވަނީ އުސޫލުތައް ހަމަޖެހިފައި އޮންނަނީ ޑިފެންސް މިނިސްޓަރަކަށް ހުންނަވާ ބޭފުޅަކަށް އަމިއްލަފުޅަށް ސޮއި ކުރައްވައިގެން ހަތިޔާރު ގެއަށް ގެންދެވޭނެ ގޮތަކަށް ކަމަށް ވިދާޅުވެ ދައްކަވާފައިވާ ވާހަކަތަކަކީ ވެސް ހަގީގަތާ ޚިލާފު ވާހަކަތަކެއް ކަމަށެވެ. ކެބިނެޓްގައި ހިމެނިވަޑައިގަންނަވާ އެއްވެސް ވަޒީރަކަށް އަމިއްލަފުޅު ބޭނުމަށް ހަތިޔާރު ގެންގުޅުމަކީ ރާއްޖޭގެ އުސޫލުތައް ހަމަޖެހިފައިވާ ގޮތެއް ނޫންކަމަށް ބަޔާނުގައި ބުނެފައިވެއެވެ. ހަމައެއާއެކު ނާޒިމްގެ ގެއިން ހަތިޔާރު ފެނުނު މައްސަލައަކީ އޭރުގެ ރައީސް އަބްދުﷲ ޔާމީންގެ ރޭއްވުމެއްގެ ދަށުން އެމަނިކުފާނަށް އެނގިވަޑައިގެން ހިނގާފައިވާކަމެއްކަމަށް ނާޒިމް ވިދާޅުވެފައިވީނަމަވެސް އެކަން ޔާމީނަށް އެނގިވަޑައިގަތީ އެގެއިން ހަތިޔާރު ފެނުނު ފަހުން ކަމަށް ކޯލިޝަންގެ ބަޔާނުގައި ބުނެފައިވެއެވެ.
ކުރީގެ ޑިފެންސް މިނިސްޓަރު ދައްކަވާފައިވާ މި ވާހަކަތައް ކޯލިޝަނުން ހަރުކަށި އިބާރާތުން ކުށްވެރިކުރާކަމަށް ބުނެފައިވެއެވެ. އަދި ވަޒީރުން ހަތިޔާރު ގެންގުޅުމާ ގުޅޭގޮތުން ރާއްޖޭގައި ހަމަޖެހިފައިވާ އުސޫލުތަކާ ގުޅުވައިގެން ދައްކަވާފައިވާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށް ވުމުން އެކަމުގެ ކަންބޮޑުވުން ފާޅުކޮށް ކަމުގެ ހަގީގަތް އެއްވެސް އޮޅުވާލުމެއްނެތި ރައްޔިތުންނަށް ނާޒިމް ހާމަކޮށްދެއްވުމަށް ވަނީ އެދިފައެވެ.
ޕީޕީއެމް/ޕީއެންސީ ކޯލިޝަންގެ ނޫސްބަޔާން ނިންމާލަމުން ބުނެފައިވަނީ ސިޔާސީ ޕާޓީ އުފައްދާނީ ދޮގާއި ފަސާދަ ފަތުރައިގެން ނޫންކަމަށެވެ.
ނާޒިމް އިސްވެ ހުންނަވައި ގެންދަވަނީ ސިޔާސީ ޕާޓީއެއް އުފެއްދެވުމުގެ މަސައްކަތް ކުރައްވަމުންނެވެ. އަދި އެޕާޓީން އަންނަނީ ރައްޔިތުންގެ މަޖިލީހުގެ މައިނޯރިޓީ ޕާޓީއަށް ވުމަށް ވެސް މަސައްކަތްކުރަމުންނެވެ. މިވަގުތު މައިނޯރިޓީ ޕާޓީއަކީ ޕީޕީއެމްއެވެ.