ސަރުކާރު ކުންފުނިތަކުން ވައްކަން ކުރުމުގެ ބޮޑެތި ޕްލޭންތަކެއް އިދިކޮޅުން ވަނީ ރާވާފައި: މޫކޭ
އެކި ފަހަރު މަތިން އޮފީހަށް ގެއްލުން ދީގެން ވައްކަން ކުރަން މަސައްކަތްކޮށް، ނާކާމިޔާބުވި
ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިންގ ޑިރެކްޓަރ މޫސާ ޢަލީ މަނިކު (މޫކޭ)
ސަރުކާރަށް އޮންނަ އިތުބާރު ގެއްލުވާލުމުގެ މަގުސަދުގައި ސަރުކާރު ކުންފުނިތަކުން ވައްކަން ކުރުމުގެ ބޮޑެތި ޕްލޭންތަކެއް އިދިކޮޅުން ރާވާފައިވާކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިންގ ޑިރެކްޓަރ މޫސާ ޢަލީ މަނިކު (މޫކޭ) ތުހުމަތު ކުރައްވައިފިއެވެ.
ބުދަ ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން, އާރްޑީސީގެ އޮފީހުން ތަކުރާރުކޮށް ވައްކަން ކުރަމުންދާ މައްސަލައަށް އަލިއަޅުވާލައްވައި, އާރްޑީސީން ވައްކަން ކުރި 3 ފަަހަރުގެ އިތުރުންވެސް އެކި ފަހަރު މަތިން އޮފީހަށް ގެއްލުން ދީގެން ވައްކަން ކުރަން މަސައްކަތްކޮށް، ނާކާމިޔާބު ވެފައިވާ ކަމަށެވެ.
މޫކޭ ވިދާޅުވީ، އެންމެ ފަހުން އާރްޑީސީން ވައްކަން ކުރި ދެ ފަހަރުވެސް އޮފީހުގެ އެއްވެސް ފައިސާއެއް ގެންގޮސްފައި ނުވާ ކަމަށެވެ. ނަމަވެސް ބައެއް މުވައްޒަފުންގެ އަމިއްލަ ސާމާނުތަކާއި އޮފީހުގެ ބައެއް ސާމާނު ވަގަށް ނަގާފައިވާކަމަށް އޭނާ ވިދާޅުވިއެވެ. މިއީ ހަމައެކަނި އާރްޑީސީއަށް ދިމާވެފައިވާ މައްސަލައެއް ނޫންކަމަށް ވިދާޅުވެ، އޭނާ ވަނީ އިދިކޮޅަށް ބޮޑު ތުހުމަތެއް ކުރައްވާފައެވެ. އެގޮތުން އާރްޑީސީއަށް ހަމަލާ ދިނީ, ސަރުކާރު ކުންފުނިތަކަށް ހަމަލާ ދީގެން އިދިކޮޅަށް ނެގޭނެ ޕޮއިންޓެއްގެ ގޮތުގައި އެކަން ބޭއްވުމަށްކަމަށް އޭނާ ވިދާޅުވިއެވެ.
މޫކޭ ވިދާޅުވީ، މިއީ ސަރުކާރު ކުންފުނިތަކުގެ ހިންގުން ދޯދިޔާކަން ދައްކައި، އާންމުންގެ އިތުބާރު ގެއްލުވާލުމުގެ މަގުސަދުގައި އިދިކޮޅުން ކުރާ ކަމެއް ކަމަށެވެ. އެގޮތުން ސަރުކާރުގެ އެސްއޯއީތަކަށް އަމާޒުކޮށް މިފަދަ ކަންކަން ކުރިއަށް އޮތް ތަނުގައިވެސް ހިންގުމަށް ޕްލޭންތަކެއް ރާވާފައިވާކަމަށް މައުލޫމާތު ލިބޭކަމަށް މޫކޭ ވިދާޅުވިއެވެ. އެގޮތުން ޖުލައި 13ވަނަ ދުވަހުގެ ރޭގެ ވަގުތެއްގައި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ)ގެ ހެޑް އޮފީހުން ވައްކަންކުރުމަށް ބަޔަކު މަސައްކަތް ކުރިކަންވެސް މޫކޭ ފާހަގަ ކުރެއްވިއެވެ.
އޭގެ އިތުރުން، ތުހުމަތެއް ކުރެވުމާއެކު އިދިކޮޅުން ވަގުތުން ބަޔާން ނެރެ އެކަމާ ގުޅިގެން މީގެ ކުރިންވެސް ވާހަކަ ދައްކާފައިވާކަން ފާހަގަ ކުރައްވައި މޫކޭ ވަނީ "ފުރިފައި ހުރި އެއްޗެއް ގުޑުގުޑެއް ނާޅާނެ" ކަމަށް ދޭހަވާ މޭރުމުން ވާހަކަ ދައްކަވާފައެވެ.
އާރްޑީސީ އޮފީސް ފަޅާލުމާ ގުޅިގެން މޫކޭ ކުރެއްވި ޓްވީޓެއްގައި ވިދާޅުވީ އޮފީހަށް ގެއްލުންދީ ވައްކަން ކުރަން މަސައްކަތް ކުރަނީ ކުށުގެ ރެކޯޑް އޮންނަ ފަރާތްތައް ބޭނުން ކޮށްގެން އިދިކޮޅު ފަރާތްތަކުން ރާވައިގެން ކަމަށް މޫކޭ މީގެ ކުރިންވެސް ވަނީ ވިދާޅުވެފައެވެ.
