އޭއެފްސީ ކަޕުގެ ދެކުނު އޭޝިއާއަށް ޚާއްސަ ގްރޫޕުގައި ބުދަ ދުވަހުގެރޭ ކުޅުނު މެޗުން ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއިން ފެށުން ރަނގަޅުކޮށްފިއެވެ.

ގައުމީ ފުޓްބޯޅަ ދަނޑުގައި ކުޅުނު މެޗުން ބަޝުންދަރާ މޮޅުވީ 2-0 ގެ ނަތީޖާއަކުންނެވެ.

މި މެޗު ފަށައިގެން މާޒިޔާއިން ރަނގަޅު ކުޅުމެއް ދެއްކިއިރު، މެޗުގެ ދެވަނަ މިނެޓުގައި އެ ޓީމުގެ މިޑްފީލްޑަރު އައިސަމް އިބްރާހީމަށް ވަނީ ލަނޑު ޖަހަން ރަނގަޅު ފުރުސަތެއް ލިބި ބޭކާރުވެފައެވެ. އެގޮތުން ބަޝުންދަރާގެ ދެ ކުޅުންތެރިން ކައިރިން ނައްޓާލުމަށްފަހު މާޒިޔާގެ ކޮނޭލިއަސް ސްޓެވާޓް (ކޯނޭ) ދިން ބޯޅަ ހުހަށްހުރެ އައިސަމް ފޮނުވާލި ނަމަވެސް، އެ ބޯޅަ ދިޔައީ ގޯލާ އަމާޒުނުވެ ބޭރަށެވެ.

އޭގެ ފަހުން މެޗުގެ އަށްވަނަ މިނެޓުގައި މާޒިޔާގެ ފޯވާޑް ނާއިޒް ހަސަން (ދާދު) އަށްވެސް ވަނީ ލަނޑު ޖަހަން ރަނުގެ ފުރުސަތެއް ލިބިފައެެވެ. ސްޓެވާޓް އޭރިއާ ތެރެއަށް ނަގައިދިން ހުރަސް ދާދު ބޮލުން ފޮނުވާލިއިރު. އޭނާ ފޮނުވާލި ހަމަލާގެ ހުރަހަކަށްވީ ބަޝުންދަރާގެ ގޯލްކީޕަރު އަނިސުރް ރަހްމާނެވެ.

މާޒިޔާއިން ރަނގަޅަށް ކުޅެމުން ދަނިކޮށް، މެޗުގެ 26 ވަނަ މިނެޓުގައި ބަޝުންދަރާއިން ވަނީ ލީޑު ނަގާފައެވެ. މި ލަނޑަކީ މާޒިޔާގެ މިޑްފީލްޑަރު މުޙައްމަދު އިރުފާން (އިރޭ) އަތުން ބައިކޮޅަށް ވަން ލަނޑެކެވެ. އަދި ފުރަތަމަ ހާފު ނިމުމުގެ ކުރިން ބަޝުންދަރާއިން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. މި ހާފު ނިމެން ފަސް މިނެޓަށް ވެފައި ވަނިކޮށް މާޒިޔާގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި، މި ލަނޑު އެ ޓީމަށް ކާމިޔާބުކޮށްދިނީ ރޮބްސަން ޑަ ސިލްވާއެވެ.

މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 64 ވަނަ މިނެޓުގައި މާޒިޔާގެ ސްޓެވާޓް ވަނީ އޭރިއާ ބޭރުން ނުރައްކާތެރި ހަމަލާއެއް ފޮނުވާލާފައެވެ. އެކަމަކު އޭނާ ފޮނުވާލި ހަމަލާ ދިޔައީ ހުރަސް ދަނޑިމަތިން ބޭރަށެވެ. އޭގެ ފަހުން މެޗުގެ 68 ވަނަ މިނެޓުގައި ބަޝުންދަރާގެ ބިޝުވަންތް ގޯޝްއަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން ހުހަށްހުރެ އޭނާ ފޮނުވާލި ބޯޅަ ދިޔައީ އަރިމަތީ ދަނޑިކައިރިން ބޭރަށެވެ. އަދި މެޗުގެ 76 ވަނަ މިނެޓުގައި ބަޝުންދަރާގެ ރައުލް އޮސްކާ ހުހަށްހުރެ ފޮނުވާލި ހަމަލާ މާޒިޔާގެ ގޯލްކީޕަރު މަމަކްތޯވް މިރްޒޮވިދް ވަނީ ހުށިޔާރުކަމާއެކު ދިފާއުކޮށްފައެވެ.

ގްރޫޕް ސްޓޭޖުގައި ކުޅުނު ފުރަތަމަ މެޗުން މާޒިޔާ ބަލިވިއިރު، ދެން އެ ޓީމުން މެޗެއް ކުޅޭނީ ހޮނިހިރު ދުވަހުގެ ރެއެވެ. އެރޭ މާޒިޔާ ނުކުންނާނީ އިންޑިއާގެ އޭޓީކޭ މޯހަން ބަގާނާ ދެކޮޅަށެވެ. އަދި ހޮނިހިރު ދުވަހުގެ ހަވީރު ބަޝުންދަރާ ނުކުންނާނީ ބެންގަލޫރު އެފްސީ ދެކޮޅަށެވެ.