ކޮވިޑް-19ން ދިފާއުވުމަށް އިތުރު 626 މީހުން ވެކްސިންގެ ދެވަނަ ޑޯޒު ފުރިހަމަކޮށްފި

ކޮވިޑް-19ން ދިފާއުވުމަށް އިތުރު 626 މީހުން ވެކްސިންގެ ދެވަނަ ޑޯޒު ފުރިހަމަކޮށްފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން ބުނީ، ހޯމަ ދުވަހު އިތުރު 626 މީހުން ވެކްސިންގެ ދެވަނަ ޑޯޒް ޖަހާފައިވާ ކަމަށެވެ. އެއީ މާލެ ސަރަހައްދުން ވެކްސިން ޖެހި 451 މީހުންނާއި، އަތޮޅު ތެރެއިން ވެކްސިން ޖެހި 175 މީހުންނެއެވެ. އެއާއެކު މިހާތަނަށް ވެކްސިންގެ ދެޑޯޒް ޖެހި މީހުންގެ އަދަދު ވަނީ 296،498ށް އަރާފައެވެ.

މީގެ އިތުރުން އިތުރު 5،056 މީހުން ވަނީ ފުރަތަމަ ޑޯޒު ޖަހާފައެވެ. އޭގެ ތެރޭގައި ހިމެނެނީ މާލެ ސަރަހައްދުން ވެކްސިން ޖެހި 1901 މީހުންނާއި، އަތޮޅު ތެރެއިން ވެކްސިން ޖެހި 3155 މީހެކެވެ. އެއާއެކު ރާއްޖެއިން މިހާތަނަށް ވެކްސިންގެ ފުރަތަަމަ ޑޯޒު ޖެހި މީހުންގެ އަދަދު ވަނީ 354،192ށް އަރާފައެވެ.

އެޗްޕީއޭއިން ބުނީ މާލެ ސަރަހައްދުގައި ވެކްސިން ޖަހާ 6 ސެންޓަރާއި، 3 މޮބައިލް ޓީމެއް މިވަގުތު ހަރަކާތްތެރިވަމުންދާ ކަމަށެވެ. އަދި އަތޮޅުތެރޭގައި 176 ވެކްސިން ސެންޓަރު ގާއިމްކުރެވިފައިވާކަމަށް އެޗްޕީއޭއިން ވަނީ ބުނެފައެވެ.

މި ހިނގާ އޮގަސްޓު މަސް ނިމުމުގެ ކުރިން ރާއްޖޭގެ އާބާދީގެ 90 އިންސައްތަ މީހުންނަށް ވެކްސިންގެ ދެޑޯޒް ދިނުމަށް މިހާރު ވަނީ ވެކްސިން ކެމްޕެއިނެއް ފަށާއެވެ. މި ކެމްޕެއިންގެ އިތުރުން އުމުރުން 12 އަހަރާއި 18 އަހަރާ ދެމެދުގެ ކުދިންނަށް ފައިޒަރ ވެކްސިން ދިނުމުގެ ކެމްޕެއިނެއް އޯގަސްޓް 15 ވަނަ ދުވަހު ވަނީ ފަށާފައެވެ.

މި ޕްރޮގްރާމުގެ ތެރެއިން އެންމެ ފުރަތަމަ އިސްކަމެއް ދޭނީ ސްކޫލް ކުދިންނަށް ވެކްސިން ދިނުމަށް ކަމަށް އެޗްޕީއޭއިން ބުނެފައިވެއެވެ. އަދި އެ އުމުރުފުރާގެ ކުދިންގެ ތެރެއިން ސްކޫލުގައި ނޫޅޭ ކުދިންނާއި، މާބަނޑު މީހުންނާއި، އަދިވެސް ފައިޒަރ ވެކްސިން ޖަހަން ޝަރުތު ހަމަވާ މީހުން ވެކްސިން ޖެހުމަށް އެޕޮއިންޓްމެންޓް ހެއްދުމަށް މިހާރު ވަނީ ހުޅުވާލާފައެވެ.