ހުއްދަ ނެތް ތަންތަނުގައި ފަތުރުވެރިން ބޭތިއްބުމަކީ އިންސާނީ ވަގުފާރި: ޑރ. މައުސޫމް
16 އޯގަސްޓު 2021 | ހޯމަ 04:21ހުއްދަ ނެތް ތަންތަނުގައި ފަތުރުވެރިން ބައިތިއްބާ ކަމުގެ ގިނަ މައްސަލަތަކެއް ވަނީ ފެންމަތިވެފައި
ޓޫރިޒަމް މިނިސްޓަރ ޑރ. އަބްދުﷲ މައުސޫމް
ހުއްދަ ނެތި ތަންތަނުގައި ޓޫރިސްޓުން ބޭތިއްބުމަކީ ޓޫރިޒަމެއްނޫން ކަމަށާއި، އެއީ އިންސާނީ ވަގުފާރި ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ޓޫރިޒަމް މިނިސްޓަރު މިފަދައިން ވިދާޅުވެފައި މިވަނީ ހުއްދަ ނެތް ތަންތަނުގައި ފަތުރުވެރިންގެ ގޮތުގައި އަންނަ މީހުން ބައިތިއްބާކަމުގެ ގިނަ ވާހަކަތަކެއް ދެކެވެމުންދާ ވަގުތެއްގައި ކުރެއްވި ޓްވީޓެއްގައެވެ.
މިނިސްޓަރު ވިދާޅުވީ އިންސާނީ ވަގުފަރިއާއި ޓޫރިޒަމާ ވަރަށް ތަފާތު ކަމަށެވެ. ޓޫރިސްޓުން ބޭތިއްބުމުގެ ހުއްދަ ނެތް ތަންތަނުގައި އެމީހުން ބޭތިއްބުމަކީ އެއީ ޓޫރިޒަމެއްނޫން ކަމަށާއި، އެއީ އިންސާނީ ވަގުފާރި ކަމަށް މިނިސްޓަރު ޑރ. މައުސޫމް ވިދާޅުވިއެވެ.
ކަމާގުޅޭ އިދާރާތަކުން އެފަދަކަންތައްތައް ބަލައި ފިޔަވަޅު އަޅާނެކަމުގެ ޚަބަރު ލިބުމުން ކުޑަކޮން ހިތްހަމަޖެހުން ލިބުނު ކަމަށް މިނިސްޓަރުގެ ޓްވީޓުގައި ވިދާޅުވެފައިވެއެވެ.
ފަތުރުވެރިން ބޭތިއްބުމުގެ ހުއްދަ ނެތް ތަންތަނުގައި އެމީހުން ބޭތިއްބުމާ ގުޅޭގޮތުން މިނިސްޓަރު މައުސޫމް މިފަދައިން ވިދާޅުވެފައިވާއިރު، މިފަދަ ޝަކުވާތަކެއް ފުލުހުންނަށް ހުށަހަޅާފައިވާކަމަށް ފުލުހުން ވަނީ ބުނެފައެވެ. މި ޝަކުވާ ކަމާ ގުޅުންހުރި އިދާރާތަކާ ހިއްސާކޮށް އެ އިދާރާތަކާ ގުޅިގެން މިކަންކަން ހައްލުކުރުމުގެ މަސައްކަތް ކުރަމުންދާކަމަށް ފުލުހުން ވަނީ ބުނެފައެވެ.
މައުލޫމާތު ލިބޭގޮތުގައި މިފަދައިން ފަތުރުވެރިން ބޭތިއްބުމުގެ ހުއްދަ ނެތް ތަންތަނުގައި އެމީހުން ބައިތިއްބާތީ އެކަމުގެ ގިނަ މައްސަލަތަކެއް ވަނީ ފުލުހުންނަށް ހުށަހަޅާފައެވެ. ފުލުހުން މިހާރު މިފަދަ ތަންތަން ބަލައި ފާސްކުރަން ފަށާފައިވާކަމުގެ މައުލޫމާތު ވެސް ދަނީ ލިބެމުންނެވެ.
