އިނގިރޭސި ޕްރިމިއާ ލީގުގައި އާދިއްތަ ދުވަހުގެރޭ ޓޮޓެންހަމް ހޮޓްސްޕާއިން އެ ޓީމުގެ އިންގްލެންޑުގެ ފޯވާޑް ހެރީ ކޭން ނުލައި ކުޅެ އެންމެ ފަހުގެ ޗެމްޕިއަން މެންޗަސްޓާ ސިޓީ ބަލިކޮށްފިއެވެ.

އަމިއްލަ ދަނޑުގައި ކުޅުނު މެޗުން ޓޮޓެންހަމް މޮޅުވީ 1-0 ގެ ނަތީޖާއަކުންނެވެ.

މި މެޗުގައި ޓޮޓެންހަމުން ކޭން ބޭނުންކޮށްފައި ނުވާއިރު، މި ފަހަރުގެ ޓްރާންސްފާގައި ސިޓީއަށް ބަދަލުވާން ކޭން މަސައްކަތްކުރަމުން އަންނަ ކަމަށް މީގެ ކުރިން އިނގިރޭސި މީޑިއާތަކުން ވަނީ ރިޕޯޓުކޮށްފައެވެ. އެގޮތުން ޓޮޓެންހަމުގެ ފަރިތަކުރުންތަކަށް ނުކުންނަން ކޭން މީގެ ކުރިން ދެކޮޅު ހެދި ކަމަށްވެސް ރިޕޯޓުކުރިއެވެ. ނަމަވެސް މިހާރު ޓޮޓެންހަމުގެ ފަރިތަކުރުންތަކުގައި ކޭން ބައިވެރިވަމުން އަންނައިރު، ރިޕޯޓުތައް ބުނާ ގޮތުން މި މެޗުގައި ކޭން ބޭނުންކޮށްފައި ނުވަނީ އޭނާއަށް ޓޮޓެންހަމުގެ ޕްރީ-ސީޒަނުގައި ރަނގަށް ބައިވެރިނުވެވުމުންނެވެ.

ސިޓީއާ ދެކޮޅަށް ކުޅުނު މެޗަކީ މި ސީޒަނަށް ޓޮޓެންހަމުގެ ކޯޗުގެ މަގާމާ ހަވާލުވި ނޫނޯ އެސްޕިރީޓޯ ސަންޓޯ، ލީގުގައި އެ ޓީމަށް އިރުޝާދުދިން ފުރަތަމަ މެޗެވެ. މީގެ އިތުރުން މި މެޗުގެ ފުރަތަމަ އެގާރައިގައި ސިޓީން ވަނީ މި ފަހަރުގެ ޓްރާންސްފާގައި 100 މިލިޔަން ޕައުންޑް ޚަރަދުކޮށްގެން އެ ޓީމަށް ގެނައި އިންގްލެންޑުގެ މިޑްފީލްޑަރު ޖެކް ގްރީލިޝް ހިމަނާފައެވެ.

އާދިއްތަ ދުވަހުގެރޭ ކުޅުނު މެޗު ފަށައިގެން ސިޓީއަށް ރަނގަޅު ފުރުސަތުތަކެއް ތަނަވަސްކުރިއިރު، މެޗުގެ ވަރަށް ކުރީކޮޅު ލީޑު ނަގަން އެ ޓީމުގެ ފެނަންޑީނިއޯ އާއި ޖޮއާއޯ ކަންސޭލޯއަށް ރަނގަޅު ފުރުސަތުތަކެއް ލިބިގެންދިޔައެވެ. އަދި މި ހާފުގައި ޓޮޓެންހަމުގެ ސޮން ހުއެން-މިންވެސް ނުރައްކާތެރި ހަމަލާއެއް ފޮނުވާލިއިރު، އެ ހަމަލާ ދިޔައޯ ގޯލުގެ އަރިމަތީ ދަނޑި ކައިރިން ބޭރަށެވެ.

މި މެޗުގައި ފެނިގެންދިޔަ ހަމައެކަނި ލަނޑު ޓޮޓެންހަމުން ކާމިޔާބުކޮށްފައިވަނީ ދެވަނަ ހާފު ފަށައިގެން 10 ވަނަ މިނެޓުގައެވެ. އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ސޮންއެވެ. އަދި އޭގެ ފަހުން ޓޮޓެންހަމުގެ ސްޓީވެން ބާގްވިންއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ.

މި ސީޒަނުގެ ލީގުގައި ކުޅުނު ފުރަތަމަ މެޗުން ޓޮޓެންހަމުން އެންމެ ފަހުގެ ޗެމްޕިއަން ސިޓީ ބަލިކުރިއިރު، ލީގުގައި ދެން ޓޮޓެންހަމުން ކުޅޭ މެޗުގައި ނުކުންނާނީ ވަޓްފޯޑާ ދެކޮޅަށެވެ. އަދި ސިޓީ ނުކުންނާނީ ވާދަވެރި އާސެނަލާ ދެކޮޅަށެވެ.