މި ސީޒަނުގެ ޖަރުމަން ލީގުގައި ކުޅުނު ފުރަތަމަ މެޗުން އެންމެ ފަހުގެ ޗެމްޕިއަންކަން ބަޔާން މިއުނިކް އެއްވަރުވެއްޖެއެވެ.

ހުކުރު ދުވަހުގެރޭ ކުޅުނު މެޗުން ބަޔާން އެއްވަރުވީ ބޮރޫޝިއާ މޮންޗެންގްލަޑްބަކާ ވާދަކޮށް 1-1 ގެ ނަތީޖާއަކުންނެވެ.

މޮންޗެންގްލަޑްބަކުގެ ދަނޑުގައި ކުޅުނު މި މެޗުގައި ބަޔާނުން ގިނަ ހަމަލާތަކެއް ފޮނުވާލި ނަމަވެސް، މެޗުގެ ވަރަށް ކުރީކޮޅު މޮންޗެންގްލަޑްބަކުން ވަނީ ލީޑު ނަގާފައެވެ. މެޗު ފަށައިގެން 10 ވަނަ މިނެޓުގައި ލާސް ސްޓިންޑީ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އަލަސާން ޕްލެއާއެވެ.

ނަމަވެސް ފުރަތަމަ ހާފު ނިމުމުގެ ކުރިން ބަޔާނުން ވަނީ ނަތީޖާ އެއްވަރުކޮށްފައެވެ. މި ހާފު ނިމެން ތިން މިނެޓަށް ވެފައި ވަނިކޮށް ޖޯޝުއާ ކިމިޗް ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ތަޖުރިބާކާރު ފޯވާޑް ރޮބަޓް ލެވަންޑޯސްކީއެވެ. މި ސީޒަނުގެ ޖަރުމަން ލީގުގައި ކުޅުނު ފުރަތަމަ މެޗުގައި ލެވަންޑޯސްކީ ލަނޑު ޖެހިއިރު، މިދިޔަ ސީޒަނުގައި އޭނާ ވަނީ 41 ލަނޑު ޖަހައި، ކުރީގެ އެއްވަނަ ފޯވާޑް ގާޑް މުލާ 1972 ވަނަ އަހަރު ހަދާފައިވާ ރިކޯޑު މުގުރާލާފައެވެ. އެ ފަހަރު މުލާ 40 ލަނޑު ހަމަކުރިއިރު، އޭނާގެ ރިކޯޑު ލެވަންޑޯސްކީ މުގުރާލީ 29 މެޗުންނެވެ.

މި ސީޒަނުގެ ޖަރުމަން ލީގުގައި ކުޅުނު ފުރަތަމަ މެޗުން ބަޔާން އެއްވަރުވިއިރު، ލީގުގައި ދެން އެ ޓީމުން މެޗެއް ކުޅޭނީ މި މަހުގެ 22 ވަނަ ދުވަހުއެވެ. އެ ދުވަހު އަމިއްލަ ދަނޑުގައި ބަޔާން ނުކުންނާނީ ކޮލޯންއާ ދެކޮޅަށެވެ.