އަލީ ވަހީދު ރާއްޖެއަށް އަނބުރާ ގެނެވޭނީ އިންޓަޕޯލް މެދުވެރިކޮށްގެން: ވަކީލު ނިޝާން

ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެއަށް އަނބުރާ ގެނެވޭނީ އިންޓަޕޯލް މެދުވެރިކޮށްގެން ކަމަށް މަޝްހޫރު ގާނޫނީ ވަކީލު މުހައްމަދު ނިޝާން އިބްރާހީމް ވިދާޅުވެއްޖެއެވެ.

އަލީ ވަހީދުގެ މައްސަލައާ ގުޅޭގޮތުން ރާއްޖެޓީވީގެ ފަލަސުރުހީ ޕްރޮގްރާމްގައި ނިޝާން ވިދާޅުވީ އަލީ ވަހީދުގެ މައްސަލައިގެ ރޫޓިން މިހާރު ކުރިއަށް ގެންދަނީ ރަނގަޅަށް ކަމަށެވެ. އަދި އޭނާގެ މައްޗަށް 2 މަހާއި 12 ދުވަހުގެ ޖަލު ހުކުމެއް ސުޕްރީމް ކޯޓުން އިއްވާފައިވާއިރު، އެ ހުކުމް ތަންފީޒުކުރުމަށް ފުލުހުންގެ އެހީތެރިކަމަށް ކަރެކްޝަނުން އެދޭނެ ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދު ފުޅު ވިދާޅުވެފައިވާތީ އެކަމަށް ކަރެކްޝަނުން މަސައްކަތް ކުރާކަން ހާމަވާ ކަމަށެވެ.

ނިޝާން ވިދާޅުވީ ކަންކަން ހިނގާފައިވާ ގޮތަށް ބަލާއިރު، އަލީ ވަހީދު އަނބުރާ ރާއްޖެ ގެނައުމަށް އިންޓަޕޯލްގެ އެހީތެރިކަމަށް އެދެންޖެހޭ ކަމަށާއި، އެނޫން ގޮތަކަށް އޭނާ ރާއްޖެއަށް ނުގެނެވޭނެ ކަމަށެވެ. ނިޝާން ވިދާޅުވީ އަލީ ވަހީދުގެ މައްޗަށް އިއްވާފައިވާ 2 މަހާއި 12 ދުވަހުގެ ޖަލު ހުކުމް ޖަލުގައި ބާއްވައިގެން ތަންފީޒު ކުރަން ޖެހޭ ކަމަށެވެ. އަދި އެ ހުކުމް ތަންފީޒު ނުކޮށްފިނަމަ ދިވެހިރާއްޖޭގެ ޝަރުއީ ކޯޓުތަކާ މެދު އަދި ދައުލަތުގެ ގާނޫނީ ވެރިކަމާ މެދު ރައްޔިތުން ދެކޭ ގޮތް ބަދަލުވާނެ ކަމަށެވެ.

އަލީ ވަހީދު ބޭސްފަރުވާއަށް ރާއްޖެއިން ބޭރަށް ވަޑައިގަތުމަށްޓަކައި، އެދިވަޑައިގަތުމުން ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އަދި އެކަން ކުރީ އަސްޢަދު ޢަލީ (އަޑުބަރޭ) ޖާމިނުވާގޮތަށެވެ. އެހެންނަމަވެސް ހަތަރު މަސް ފާއިތުވެ، ޝަރީއަތް ފެށުނު އިރު ވެސް އަލީ ވަހީދު އެނބުރި ރާއްޖެއަށް ވަޑައެއްނުގަންނަވައެވެ. އަދި އެކަމުގެ ޒިންމާ އަޑުބަރޭ ވެސް ނަގާފައެއް ނުވެއެވެ.

ޕާސް ޕޯޓު ދޫކުރި މައްސަލަ ދައުލަތުން ހައިކޯޓާއި ސުޕްރީމް ކޯޓުގައި ވެސް އިސްތިއުނާފުކުރިއެވެ. ނަމަވެސް، އަލީ ވަހީދު އުޅޭ އެޑްރެސް ނޭނގޭ ކަމަށް ބުނެ، ޗިޓް ނުފޮނުވިގެން އޭނާގެ ޕާސްޕޯޓް ހިފަހައްޓައިދޭން ހައިކޯޓަށާއި ސުޕްރީމް ކޯޓަށް ހުށަހެޅި މައްސަލަ ވެސް ވަނީ ބޭރު ކޮށްލާފައެވެ. އަލީ ވަހީދުގެ ޕާސްޕޯޓް ހިފަހައްޓަން ކުރިމިނަލް ކޯޓުގައި އެދުމުން އެ އަމުރު ނެރެނުދިން މައްސަލަ ޕީޖީން ހައި ކޯޓަށް ހުށަހެޅިއެވެ. އެހެންނަމަވެސް، އަލީ ވަހީދުގެ ޣައިރު ހާޒިރުގައި މައްސަލަ ކުރިއަށް ނުގެންދެވޭނެ ކަމަށް ބުނެ، ހައި ކޯޓުން މައްސަލަ ބަލައިގެންފައެއް ނުވެއެވެ.

ހައިކޯޓުގެ ރެޖިސްޓްރާގެ އެ ނިންމުން ރިވިއުކޮށްދޭން 10 އޮގަސްޓްވީ އަންގާރަ ދުވަހު ޕްރޮސިކިއުޓާ ޖެނަރަލްގެ ފަރާތުން ވަނީ އަނެއްކާވެސް އެ މައްސަލަ ހައި ކޯޓުގެ ފަނޑިޔާރުންގެ ބެންޗަށް ހުށަހަޅާފައެވެ. އެކަމާމެދު އަދި ހައިކޯޓުން ވަކި ގޮތެއް ނުނިންމަވައެވެ.