މިދިޔަ ދިރާސީ އަހަރު ނިމުނު ދަރިވަރުންނަށް ވެކްސިންޖެހުމަށް ސްކޫލުން ގުޅާނެ - ޑރ. ނަޒްލާ
ސްކޫލް ކުދިންނަށް ވެކްސިނޭޝަން ޕްރޮގްރާމް ކުރިއަށްގެންދިއުމުގެ ގޮތުން ބެލެނިވެރިން މިކަމަށް އަހުލުވެރިކުރުވުމުގެ ޕްރޮގްރާމެއް ވަނީ ފަށާފައި
ޑރ. ނަޒްލާ ރަފީގު - އެޗްއީއޯސީގެ ތަރުޖަމާނު
މިދިޔަ ދިރާސީ އަހަރު ނިމިފައި ތިބި، ވެކްސިން ޖެހޭ އުމުރުގެ ދަރިވަރުން ވެކްސިން ޖެހުމަށް ސްކޫލުން ގުޅަމުން ގެންދާނެ ކަމަށް އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
ޑރ. ނަޒްލާ މިހެން ވިދާޅުވީ، އެޗްޕީއޭގެ ހާލުބެލުން ޕްރޮގްރާމްގައި ވާހަކަދައްކަވަމުންނެވެ. ޑރ. ނަޒްލާ ވިދާޅުވީ، 12 އަހަރާއި 18 އަހަރާ ދެމެދުގެ އުމުރުފުރާގެ ކުދިންނަށް ވެކްސިން ދިނުމަށް ވަރަށް އަވަހަށް ހުުޅުވާލާނެ ކަމަށާއި، މާލެ ސަރަހައްދުގައި، މިހާރު އޮންނަ އެޕޮއިންޓްމަންޓް ސިސްޓަމްގެ ތެރެއިން ވެކްސިން ޖެހުމުގެ އިންތިޒާމް ކުރިއަށްދާނެ ކަމަށެވެ. ރަށްރަށުގައި އެ ރަށެއްގެ ސިއްޙީ މަރުކަޒު ނުވަތަ ހޮސްޕިޓަލްތަކުން ވެކްސިން ޖަހާނެ ދުވަސް އިއުލާން ކުރައްވާނެ ކަމަށެވެ. އެންމެ ފަހުން އޯލެެވެލް ނިމުނު ދަރިވަރުންނަށް ސްކޫލުން ގުޅަމުން ގެންދާނެ ކަމުގައި ވިދާޅުވިއެވެ.
އަމާޒަކީ މި މަސް ނިމުމުގެ ކުރިން ހުރިހާ ސްކޫލް ކުދިންނަށް ވެކްސިންގެ ފުރަތަމަ ޑޯޒް ޖެހުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވަނީ ވިދާޅުވެފައެވެ.
އައު އާންމު ހާލަތާއެކު ކުރިއަށް ދެވޭނީ ހުރިހާ އެންމެން ވެސް ވެކްސިންގެ ދެ ޑޯޒް ޖަހައިގެން ކަމަށާއި ޓީޗަރުންނަށް ވެކްސިން ޖެހުމުގެ ޕްރޮގްރާމަށް އިތުރު ހަލުވިކަމެއް ލިބިގެންދާނެ ކަމަށް ރައީސް ވިދާޅުވިއެވެ. ރައީސް ވަނީ ހުރިހާ ބެލެނިވެރިންނާއި މައިންބަފައިން ވެސް ކުދިންނަށް ވެކްސިން ޖެހުމަށް ބާރު އެޅުމަށް އެދިވަޑައިގެންފައެވެ.
ކިޔެވުން މެދުކަނޑާނުލައި ކުރިއަށް ގެންދިޔުމަށްޓަކައި އެޑިއުކޭޝަން މިނިސްޓްރީން އަޅާފައިވާ ހަރުދަނާ ފިޔަވަޅުތަކަށް ޓީޗަރުންނާއި ދަރިވަރުންގެ އިތުރުން ބެލެނިވެރިން ވެސް އަމަލުކުރެއްވުމަށް ރައީސް ނަސޭހަތްތެރިވެވަޑައިގެންނެވިއެވެ.
ރައީސް މިފަދައިން ވިދާޅުވެފައިވާއިރު ސްކޫލް ކުދިންނަށް ވެކްސިނޭޝަން ޕްރޮގްރާމް ކުރިއަށްގެންދިއުމުގެ ގޮތުން ބެލެނިވެރިން މިކަމަށް އަހުލުވެރިކުރުވުމުގެ ޕްރޮގްރާމެއް އެޑިއުކޭޝަން މިނިސްޓްރީން ވަނީ ފަށާފައެވެ. 12 އަހަރާއި 18 އަހަރާ ދެމެދުގެ ސްކޫލް ކުދިންނަށް ވެކްސިން ޖަހައިދިނުމަށް ނިންމާފައިވާކަމަށާއި، މިފަދަ ކަމެއް ކުރާއިރު އެންމެ މުހިންމު ކަމެއްގެ ގޮތުގައި ކުރަންޖެހޭނީ ބެލެނިވެރިން މިކަމަށް ހޭލުންތެރިކުރުވުން ކަމަށް ވެސް މިނިސްޓްރީން ވަނީ ފާހަގަކޮށްފައެވެ.
