ޢަލީ ވަޙީދުގެ މައްޗަށް އިއްވި ހުކުމާއެކު، ސުޕްރީމް ކޯޓުން ކުޑަކަކޫ ނުޖަހާނެކަން ހާމަވޭ: ނިޝާން

ސުޕްރީމް ކޯޓުގެ ޙުރުމަތް ކެނޑުމުން ކުރީގެ ޓޫރިޒަމް މިނިސްޓަރ ޢަލީ ވަޙީދުގެ މައްޗަށް އިއްވި ހުކުމާއެކު، ސުޕްރީމްކޯޓުން އެއްވެސް މީހެއްގެ ކުރިމަތީގައި ކުޑަކަކޫ ނުޖަހާނެކަން ހާމަވެގެން ގޮސްފައިވާ ކަމަށް މަޝްހޫރު ޤާނޫނީ ވަކީލު މުޙައްމަދު ނިޝާން އިބްރާހީމް ވިދާޅުވެއްޖެއެވެ.

ސުޕްރީމް ކޯޓުގެ ޙުރުމަތް ކެނޑުމުން ކުރީގެ ޓޫރިޒަމް މިނިސްޓަރުގެ މައްޗަށް 2 މަހާއި 12 ދުވަހުގެ ޖަލު ހުކުމެއް ސުޕްރީމް ކޯޓުން ވަނީ އިއްވާފައެވެ. ބުދަ ދުވަހު ސުޕްރީމްކޯޓުގައި ތާވަލްކޮށްފައިވަނީ، ކްރިމިނަލް ކޯޓުގައި ޢަލީ ވަޙީދުގެ މައްޗަށް އުފުލާފައިވާ ދައުވާގެ ޝަރީޢަތް އޮންލައިކޮށް ކުރިއަށް ގެންދާ މަައްސަލައިގެ އަޑު އެހުމުގައި އޮންލައިކޮށް ބައިވެރިވާ މައްސަލައާ ގުޅިގެން ޕީޖީ އޮފީހުން ސްޕްރީމް ކޯޓުގައި އިސްތިއުނާފުކުރި މައްސަލައިގެ އަޑުއެހުމެކެވެ.

ސުޕްރީމް ކޯޓުން ފޮނުވި ޗިޓު ޢަލީ ވަޙީދަށް ލިބި، މި މައްސަލައިގެ އަޑު އެހުމުގައި އޭނާ ބައިވެރި ނުވުމުން, ކޯޓުގެ ޙުރުމަތް ކެނޑިކަމަށް އިސް ފަނޑިޔާރު އޭނާގެ މައްޗަށް ޙުސްނުއް ސުޢޫދު ކަނޑައެޅުއްވިއެވެ. މި ކަމަށް ފަނޑިޔާރުންގެ ބެންޗުން ތާއީދު ކުރެއްވުމުން އޭނާގެ މައްޗަށް 2 މަހާއި 12 ދުވަހުގެ ޖަލު ހުކުމެއް އިއްވައި، އެ ހުކުމް ތަންފީޒުކުރުމަށް ކަރެކްޝަނަލް ސަރވިސްއަށް ވަނީ އަމުރު ކުރައްވާފައެވެ.

މިމައްސަލާ ގުޅޭ ގޮތުން ރާއްޖެޓީވީގެ ފަލަސުރުޚީ ޕްރޮގްރާމްގައި ނިޝާން ވިދާޅުވީ ކޯޓުތަކުގެ ޙުރުމަތް ރައްކާތެރިކުރުމާބެހޭ ގަވާއިދާއި، ޤާނޫނުލް ޢަުޤޫބާތުގެ 541ވަނަ މާއްދާ, އަދި ކޯޓުތަކާބެހޭ ޤާނޫނުގެ ބަޔާންކުރާ އިޖުރާއަތުގެ އުސޫލުތަކަށް ބަލާއިރު، ޢަލީ ވަޙީދު ސުޕްރީމް ކޯޓުގެ ޙުރުމަތް ކެނޑިކަން ސާބިތުވާ ކަމަށެވެ. އަދި މިހާލަތުގައި ދިވެހިރާއްޖޭގެ ކޯޓުތަކުން އެމީހެއްގެ ކުރިމަތީގައި ކުޑަކަކޫ ޖަހައިގެން ނުވާނެ ކަމަށް ނިޝާން ވިދާޅުވިއެވެ.

ނިޝާން ވިދާޅުވީ ކޯޓުތަކާއި، ޕްރޮސެކިއުޓަރ ޖެނަރަލްއަކީ ތަންފީޒީ އިދާރާއެއް ނޫން ކަމަށާއި، ތަންފީޒީ އިދާރާތަކަކީ ފުލުހުންގެ މުއައްސަސާއާއި ކަރެކްޝަނަލް ސަރވިސް ކަމަށެވެ. ޢަލީ ވަޙީދުގެ ޝަރީޢަތް ކުރިއަށް ގެންދިއުމުގައި މީގެ ކުރިން ހިނގާފައިވާ ކަންކަމަށް އިޝާރާތްކުރައްވައި ނިޝާން ވިދާޅުވީ ކޯޓުތަކުން ކަންކަން ކުރި ގޮތާމެދު ވަރަށް ބައިވަރު ގިލަން ވެރިކަމެއް އުފެދިގެން އައި ކަމަށާއި، ސޯޝަލް މީޑީއާގައި ގިނަ ބައެއްގެ ފާޑު ކިޔުންތައް އަމާޒުވެގެންދިޔަ ކަމަށެވެ. އަދި ވިދާޅުވީ ޢަލީ ވަޙީދުގެ ޕާސްޕޯޓު މުޠުލަޤަށް ދޫކޮށްލުމަކީ ކަމާ ގުޅުންހުރި އިދާރާތަކުން ހެދި އެންމެ ބޮޑު ގޯސް ކަމަށެވެ. ދުނިޔޭގެ އެހެންގައުމުތަކުގައި ވެސް އަމަލުކުރާ ގޮތަށް ބަލައި އެފަދަ ގޮތަކަށް އަމަލު ކުރިނަމަ މިހާލަތަށް ނުދާނެ ކަމަށް ނިޝާން ވިދާޅުވިއެވެ.

އެގޮތުން ރާއްޖެ ނޫން ގައުމަކަށް އެތެރެނުވެވޭ ގޮތަށް ޕާސްޕޯޓު ދޫކުރުމާއި، ނުވަތަ ޓްރަވަލް ޑޮކިއުމެންޓެއް ދިނުމަށްފަހު ޕާސްޕޯޓު ދޫކުރެވޭނެ ކަމަށް ނިޝާން ވިދާޅުވިއެވެ.

ޢަލީ ވަޙީދުގެ މައްސަލައާ ގުޅިގެން ކޮމިޝަނަރ އޮފް ޕްރިޒަންސް އަޙުމަދު މުޙައްމަދު ފުޅު ވިދާޅުވީ ޢަލީ ވަޙީދު ރާއްޖެ ގެނައުމަށް ފުލުހުންގެ އެހީތެރިކަމަށް ކަރެކްޝަނުން އެދޭނެ ކަމަށެވެ. އަދި ޙުކުމް ތަންފީޒު ކުރުމަށް އަމުރު ލިބިފައިވާ ކަމަށެވެ. އެހެންކަމުން ބުރާސްފަތި ދުވަހު އެ މަސައްކަތް ފަށާފައިވާކަން ފާހަގަކުރެއްވިއެވެ.