ފްރާންސްގެ ޒުވާން ތަރި ކީލިއަން އެމްބާޕޭ ޕީއެސްޖީ ދޫކޮށްލަން ޖެހޭ ސަބަބެއް ނެތް ކަމަށް އެ ކުލަބުގެ ރައީސް ނާސިރު އެލް-ޚެއްލާފީ ވިދާޅުވެއްޖެއެވެ.

އުމުރުން 22 އަހަރުގެ އެމްބާޕޭއަކީ ރެއާލް މެޑްރިޑުން ހޯދަން މަސައްކަތްކުރަމުން އަންނަ ކުޅުންތެރިއެކެވެ. 2017 ވަނަ އަހަރު މޮނާކޯ ދޫކޮށް 145 މިލިޔަން ޔޫރޯއަށް ޕީއެސްޖީއާ ގުޅުނު އެމްބާޕޭ މި ވަގުތު އެ ޓީމުގެ އެއްބަސްވުމުގައި ހުރީ އަންނަ އަހަރުގެ ހޫނު މޫސުމުގެ ނިޔަލަށެވެ. އެއާއެކު އެމްބާޕޭގެ އެއްބަސްވުން އާކުރަން ޕީއެސްޖީން މަސައްކަތްކުރި ނަމަވެސް، އެ ޓީމުގެ އެއްބަސްވުން އާކުރަން އެމްބާޕޭ ބޭނުންނުވާ ކަމަށް ފްރާންސްގެ މީޑިއާތަކުން މީގެ ކުރިން ވަނީ ރިޕޯޓުކޮށްފައެވެ.

ދާދި ފަހުން ޕީއެސްޖީން ވަނީ ހިލޭ ޓްރާންސްފާއެއްގެ ދަށުން އުމުރުން 34 އަހަރުގެ އާޖެންޓީނާގެ ތަރި ލިއޮނަލް މެސީގެ ސޮއި ހޯދާފައެވެ. ދެ އަހަރުގެ އެއްބަސްވުމެއްގެ ދަށުން މެސީ ޕީއެސްޖީއާ ގުޅުނުއިރު، އެ ޓީމާއެކު މެސީ ހަދާފައިވާ އެއްބަސްވުމުގެ ދަށުން އޭނާއަށް އަހަރެއްގެ މައްޗަށް 35 މިލިޔަން ޔޫރޯގެ މުސާރާއެއް ލިބޭނެއެވެ.

ރަސްމީކޮށް ޕީއެސްޖީ ކުޅުންތެރިއެއްގެ ގޮތުގައި މީޑިއާއަށް މެސީ ތައާރަފުކުރުމަށް ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޚެއްލާފީ ވިދާޅުވީ ފައިނޭންޝިއަލް ފެއާޕްލޭ (އެފްއެފްޕީ) ގަވާއިދުގެ ތެރެއިންވެސް ޕީއެސްޖީއަށް އެމްބާޕޭގެ އެއްބަސްވުން އާކުރުމުގެ ފުރުސަތު އެބައޮތް ކަމަށެވެ.

އަދި އެމްބާޕޭއަކީ ޕީއެސްޖީގެ ކުޅުންތެރިއެއް ކަމަށާއި، މީގެ ކުރިން އޭނާ ބޭނުންވީ ހުރިހާ މުބާރާތެއްގައި ވާދަކުރެވޭ ފެންވަރު ޓީމެއް ޕީއެސްޖީގައި އޮތުން ކަމަށެވެ. އަދި މެސީއާއެކު ޕީއެސްޖީއަކީ މި ވަގުތު ޔޫރަޕުގައި އޮތް އެންމެ ވަރުގަދަ އެއް ކުލަބު ކަމަށާއި، އެހެންކަމުން އެމްބާޕޭ މިހާރު ޕީއެސްޖީ ދޫކޮށްލަން ޖެހޭ ސަބަބެއް ނެތް ކަމަށްވެސް ވަނީ ބުނެފައެވެ.

މި ފަހަރުގެ ހޫނު މޫސުމުގައި އެމްބާޕޭ ހޯދުމަށް ރެއާލުން އަލުން މަސައްކަތް ކުރާނެކަމުގެ އިޝާރާތެއް އެ ކުލަބުގެ ރައީސް ފްލޮރެންޓީނޯ ޕެރޭޒް މީގެ ކުރިން ދިން ނަމަވެސް، ރިޕޯޓުތައް ބުނާ ގޮތުން ދެން އެ ޓީމުން އެމްބާޕޭގެ ސޮއި ހޯދަން މަސައްކަތްކުރާނީ އަންނަ އަހަރުގެ ހޫނު މޫސުމުގައި ހިލޭ ޓްރާންސްފާއެއްގެ ދަށުންނެވެ. ރިޕޯޓުތައް ބުނާ ގޮތުން ރެއާލުގެ އިތުރުން ލިވަޕޫލާއި، ޔުވެންޓަސް އަދި ބާސެލޯނާއިންވެސް އަންނަނީ އެމްބާޕޭ ހޯދުމަށް މަސައްކަތް ކުރަމުންނެވެ.

ޕީއެސްޖީގައި ތަފާތު މޮޅު ކުޅުމެއް ދައްކަމުން އަންނަ އެމްބާޕޭ ވަނީ މިހާތަނަށް އެ ޓީމަށް ކުޅެދުން 172 މެޗުގައި 132 ލަނޑު ޖަހާފައެވެ. އަދި އޭނާ ވަނީ ޕީއެސްޖީއާއެކު ފްރެންޗް ލީގު ތިން ފަހަރު ކާމިޔާބުކޮށްފައެވެ. އަދި ޒުވާން އުމުރުގައި އެމްބާޕޭ ވަނީ ފްރާންސާއެކު ފީފާ ވޯލްޑް ކަޕުވެސް ކާމިޔާބުކޮށްފައެވެ.