ޕެރަލިމްޕިކްސްގައި ވާދަކުރާ އެތުލީޓުންނަށް ނައިބު ރައީސް ހިތްވަރުދެއްވައިފި

މި މަހު ޖަޕާނުގެ ޓޯކިއޯގައި ބާއްވާ ޕެރަލިމްޕިކް ގޭމްސްގައި ރާއްޖެއިން ވާދަކުރާ އެތުލީޓުންނާއި، ރާއްޖޭގެ ޑެލިގޭޝަނުގެ މެންބަރުން އަދި ޕެރަލިމްޕިކް ކޮމިޓީއާ ބައްދަލުކުރައްވައި ރައީސުލްޖުމްހޫރިއްޔާގެ ނައިބު ފައިޞަލް ނަސީމް އެތުލީޓުންނަށް ހިތްވަރުދެއްވައިފިއެވެ.

ދުނިޔޭގެ އެންމެ ބޮޑު ކުޅިވަރު އީދު އޮލިމްޕިކް ގޭމްސް 2020 ށްފަހު ޕެރަލިމްޕިކްސް ފެށުމަށް ހަމަޖެހިފައިވަނީ މި މަހުގެ 24 ވަނަ ދުވަހެވެ. އަދި މި ގޭމްސް އަންނަ ސެޕްޓެމްބަރު މަހުގެ ފަސްވަނަ ދުވަހުގެ ނިޔަލަށް ކުރިއަށްދާނެއެވެ. މި ފަހަރުގެ ގޭމްސްގައި ރާއްޖޭގެ ދެ އެތުލީޓަކު ވާދަކުރާއިރު، މިއީ ޕެރަލިމްޕިކްސްއިން ރާއްޖެއަށް ފުރުސަތު ލިބުނު ފުރަތަމަ ފަހަރެވެ.

މި ފަހަރުގެ ޕެރަލިމްޕިކްސްގައި ރާއްޖެއިން ވާދަކުރުމަށް ފުރުސަތު ލިބިފައިވަނީ ދެ ދުވުންތެރިން ކަމަށްވާ މުޙައްމަދު މާޒިން އާއި ފާތިމަތު އިބްރާހީމަށެވެ. މި ފަހަރުގެ ގޭމްސްގައި އެ ދެ އެތުލީޓުން ވާދަކުރާނީ 100 މީޓަރު ދުވުމުގައެވެ. އެ ރޭހުގައި މާޒިންގެ ގައިޑެއްގެ ގޮތުގައި ދުވާނީ މުޙައްމަދު ސައިފް ޒާހިރެވެ. އަދި ފާތުންގެ ގައިޑަކީ ރަބާ އިސްމާޢީލް އާސިފެވެ.

އެ ދެ އެތުލީޓުންނާ ނައިބު ރައީސް ބައްދަލުކުރެއްވީ ބުރާސްފަތި ދުވަހުގެ މެންދުރުފަހު ރައީސުލްޖުމްހޫރިއްޔާގެ އޮފީހުގައެވެ. މި ބައްދަލުކުރެއްވުމުގައި ނައިބު ރައީސް ވަނީ އެ ދެ އެތުލީޓުންނާއި މުޅި ޑެލިގޭޝަނަށް މަރުޙަބާ ވިދާޅުވެ، ޝުކުރުއަދާކުރައްވާފައެވެ. އަދި ޚާއްސަގޮތެއްގައި މާޒިން އާއި ފާތިމަތު އިބްރާހީމަކީ ވަރަށް އަޒުމާއި ހިތްވަރާއެކު ކުރިއަށްދާ ދެ އެތުލީޓުންކަން ފާހަގަކުރައްވައި، ދެ އެތުލީޓުންނަށްވެސް ވަނީ ކާމިޔާބީއަށް އެދިވަޑައިގެންފައެވެ.

މި ބައްދަލުކުރެއްވުމުގައި އެ ދެ އެތުލީޓުން ވަނީ މުބާރާތުގެ ކުރިން ނައިބު ރައީސް އެ އެތުލީޓުންނާ ބައްދަލުކުރައްވައި ހިތްވަރުދެއްވީތީ އެކަން އުފަލާއެކު ފާހަގަކޮށްފައެވެ. އަދި މި ފަހަރުގެ ގޭމްސްގައި ކާމިޔާބު ހޯދައި، ރާއްޖެއަށް ރީތި ނަން ހޯދައިދިނުމަކީ ވަރަށް ބޮޑު އުއްމީދެއްކަން އެ ދެ އެތުލީޓުން ފާހަގަކުރިއެވެ.

އަދި މި ބައްދަލުކުރެއްވުމުގައި ނައިބު ރައީސާއި ރާއްޖޭގެ ޕެރަލިމްޕިކް ޑެލިގޭޝަނުން ވަނީ ޕެރަލިމްޕިކްސްއަށް ރާއްޖޭގެ އެތުލީޓުން ތައްޔާރުކޮށްދިނުމުގައި ކުޅިވަރާ ބެހޭ ވަޒީރު އަޙްމަދު މަޚްލޫފް އަދާކުރެއްވި މުހިންމު ދައުރު ފާހަގަކުރައްވައި، ވަޒީރަށް ޝުކުރު އަދާކުރައްވާފައެވެ.

ފެނުމުން މަހުރޫމްވެފައިވާ މީހުންގެ ހައްގުގައި މަސައްކަތް ކުރާ ޖަމިއްޔާ، ބްލައިންޑް އެންޑް ވިޝުއަލީ އިމްޕެއާޑް ސޮސައިޓީ އޮފް މޯލްޑިވްސްގެ ދެ މެންބަރުން ކަމަށްވާ މާޒިން އާއި ފާތުންނަކީ ދުވުމަށް ހާއްސަ ދެ އެތުލީޓުންނެވެ. މީގެ ތެރެއިން މާޒިން ވަނީ މޮރިޝަސްގައި 2019 ގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ވާދަކޮށް ލޯ މެޑަލް ހޯދާފައެވެ.