ގެއްލުން ކުޑަކުރުމުގެ ގޮތުން މާލެ ސަރަހައްދުގައި އިމާރާތްކުރުމާގުޅޭ މަސައްކަތްތައް ކުރުމުގެ ހުއްދަ ދިނުމަށް ނިންމައިފި
މަސައްކަތް ކުރުމުގެ ހުއްދަ ދީފައިވަނީ ގެއްލުން ކުޑަކުރުމުގެ ގޮތުން
މާލެ ކޮންސްޓްރަކްޝަން ސައިޓެއްގައި ބިދޭސީން މަސައްކަތްކުރަނީ،
ކޮވިޑް-19އާ ގުޅިގެން އަޅާފައިވާ ޚާއްސަ ފިޔަވަޅުތަކާއެކު މާލެ، ހުޅުމާލެ އަދި ވިލިމާލޭގައި އިމާރާތްކުރުމާގުޅޭ މަސައްކަތްތައް ކުރުމުގެ ހުއްދަ ދިނުމަށް އިކޮނޮމިކް މިނިސްޓްރީން ނިންމައިފިއެވެ.
އިކޮނޮމިކް މިނިސްޓްރީން ބުނީ މާލެ ސިޓީގައި ކޮވިޑް 19 ގެ ނުރައްކާތެރިކަން އިތުރުވުމާ ގުޅިގެން ދެ ހަފްތާގެ މުއްދަތަށް ޚާއްސަ ފިޔަވަޅު އަޅާފައިވާއިރު، މި މުއްދަތުގައި، ކޮންމެހެން ކުރަންޖެހޭ މަސައްކަތްތައް ކުރެވޭނެ އިންތިޒާމެއް ހަމަޖައްސައި، އިމާރާތްކުރުމުގެ މަސައްކަތްކުރާ ފަރާތްތަކަށް ލިބިދާނެ ގެއްލުންތައް ކުޑަކުރުމަށް މާލެ އަދި ވިލިމާލޭގައި ނަމަ، މާލެ ސިޓީ ކައުންސިލުން އަދި ހުޅުމާލޭގައި ނަމަ، ހުޅުމާލެ ޑިވެލޮޕްމަންޓް ކޯޕަރޭޝަން މެދުވެރިކޮށް ހުއްދަ ދިނުމަށް ނިންމާފައިވާ ކަމަށެވެ.
އެގޮތުން ފައުންޑޭޝަން ކޮނެފައިވާ ސައިޓުތަކުގައި ފައުންޑޭޝަން އެޅުމުގެ މަސައްކަތް ކުރުމާއި، ސްލެބް ޝަޓަރިންގ މަސައްކަތް ނުވަތަ ދަގަނޑު އެޅުމުގެ މަސައްކަތް ފަށާފައިވާ ސައިޓުތަކުގައި އެ މަސައްކަތް ނިންމުމަށާއި، މިފަދަ ކޮންސްޓްރަކްޝަން ސައިޓުތަކުގެ އިންޖިނިއަރުންނަށް ސައިޓުގެ މަސައްކަތް އިންސްޕެކްޓް ކުރުމަށް އަދި އާންމު ރައްޔިތުންނާއި ވަކިން ސައިޓުގައި އެންމެހައި މަސައްކަތްތެރިންގެ ނިދުމާއި ކެއުންބުއިން ހަމަޖެހިފައި ހުންނަ ސައިޓުތަކާއި، ހުޅުމާލޭގައި ހުރި އާންމު ރައްޔިތުންނަށް ނުވަދެވޭ ގޮތަށް ހުންނަ މިފަދަ ސައިޓުތަކުގެ މަސައްކަތް ކުރުމުގެ ހުއްދަދޭނެ ކަމަށް މިނިސްޓްރީން ބުނެއެވެ.
އިކޮނޮމިކް މިނިސްޓްރީން ބުނީ އިސްވެ ދެންނެވިފައިވާ އެއްވެސް މަސައްކަތެއް ކުރުމަށް އެދޭ ފަރާތްތަކުން، މައުލޫމާތު ފުރިހަމަ ކުރުމަށްފަހު މާލެ ސިޓީގައި މަސައްކަތެއް ކުރުމަށްނަމަ، ahbb.admin@malecity.gov.mvށް، އަދި ހުޅުމާލޭގައި މަސައްކަތެއް ކުރުމަށްނަމަ، municipal@hdc.com.mv އަށް، އީމެއިލް ކުރުމަށް އެދޭ ކަމަށެވެ.
ކޮންމެހެން ކުރަންޖެހޭ މަސައްކަތްތައް ކަނޑައަޅާނީ، މަސައްކަތްކުރުމަށް އެދޭ ސައިޓުތައް ބެލުމަށްފަހު، މާލެ ސިޓީ ކައުންސިލް ނުވަތަ ހުޅުމާލެ ޑިވެލޮޕްމަންޓް ކޯޕަރޭޝަންއިންނެވެ. އަދި، ސައިޓްއަކަށް ހުއްދަ ދިނުމަށް ނިންމުމާއެކު، އެ މިނިސްޓްރީއިން ހުޅުމާލެ ޑިވެލޮޕްމަންޓް ކޯޕަރޭޝަން އަދި މާލެ ސިޓީ ކައުންސިލުން ފޮނުވާ ތަންތަނުގައި މަސައްކަތްކުރުމަށް އެދިފައިވާ މުވައްޒަފުންނަށް ހުއްދަ ދޫކުރެވޭނެއެވެ.
