މި ފަހަރުގެ ޓްރާންސްފާ ބާޒާރުގައި މެންޗެސްޓާ ޔުނައިޓެޑުން އެ ޓީމަށް ކުޅެމުން އަންނަ ފްރާންސް ފޯވާޑް އެންތަނީ މާޝިއަލް ވިއްކާނުލާނެ ކަމަށް ރިޕޯޓުތައް ބުނެފިއެވެ.

މޮނާކޯގައި ތިން ސީޒަން ހޭދަކުރުމަށްފަހު އުމުރުން 25 އަހަރުގެ މަޝިއަލް ޔުނައިޓެޑަށް ބަދަލުވީ 2015 ވަނަ އަހަރުގެ ސެޕްޓެމްބަރު މަހު، 36 މިލިޔަން ޕައުންޑުގެ ފީއަކަށެވެ. އެ ފަހަރު އޭނާ ވަނީ ޔުނައިޓެޑާއެކު ހަތަރު އަހަރުގެ އެއްބަސްވުމެއް ހަދާފައެވެ. އަދި 2019 ވަނަ އަހަރުގެ ޖެނުއަރީ މަހުގެ ތެރޭގައި މާޝިއަލް ވަނީ ޔުނައިޓެޑުގެ އެއްބަސްވުން އިތުރު ފަސް އަހަރަށް އާކޮށްފައެވެ. އެހެންކަމުން ޔުނައިޓެޑާއެކު މާޝިއަލް ހަދާފައިވާ އެއްބަސްވުން ހަމަވާނީ 2024 ވަނަ އަހަރުގެ ހޫނު މުސުމުގައެވެ.

ރިޕޯޓުތައް ބުނާ ގޮތުން 2019 ވަނަ އަހަރުން ފަށައިގެން އިންޓަ މިލާނުން އަންނަނީ މާޝިއަލް ހޯދަން މަސައްކަތްކުރަމުންނެވެ. އަދި ޔުނައިޓެޑް ދޫކޮށްލަން މާޝިއަލުވެސް ބޭނުންވާ ކަމަށް ރިޕޯޓުތައް ބުނެއެވެ. އެކަމަކު ޔުނައިޓެޑުގެ ކޯޗު އޮލެ ގުނަ ސޯލްޝެއާ ޕްލޭނުގައި މަޝިއަލް ހިމެނޭތީ، އެ ޓީމުން މި ފަހަރުގެ ޓްރާންސްފާގައި މާޝިއަލް ނުވިއްކަން މިހާރު ނިންމާފައިވާ ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.

ރާންސްގެ ލިޔޯނުން ކެރިއަރު ފަށައި މޮނާކޯއަށްވެސް ކުޅުނު މާޝިއަލް ވަނީ މިހާތަނަށް ޔުނައިޓެޑަށް ކުޅެދިން 258 މެޗުގައި 78 ލަނޑު ޖަހާފައެވެ. އެކަމަކު މި ފަހަކަށް އައިސް އަނިޔާގެ ސަބަބުން މާޝިއަލަށް އެންމެ އެދެވޭ ކުޅުމެއް ޔުނައިޓެޑުގައި ދެއްކިފައި ނުވާއިރު، މި އަހަރުގެ އޭޕްރީލް މަހުގެ ކުރީކޮޅު ކަކުލަށް ލިބުނު އަނިޔާއެއްގެ ސަބަބުން މާޝިއަލަށް މިދިޔަ ސީޒަނުގެ ގިނަ މެޗުތަކެއް ގެއްލުނެވެ. އެކަމަކު އެ އަނިޔާއިން ރަނގަޅު މާޝިއަލް މިހާރު އަންނަނީ ޔުނައިޓެޑުގެ ޕްރީ-ސީޒަނުގައި ބައިވެރިވަމުންނެވެ.

ޔުނައިޓެޑުގައި މާޝިއަލް މިހާތަނަށް ހަ ސީޒަން ހޭދަކޮށްފައިވާއިރު، އޭނާ ވަނީ އެ ޓީމާއެކު އިނގިރޭސި އެފްއޭ ކަޕާއި އިނގިރޭސި ލީގު ކަޕް އަދި ޔުއެފާ ޔޫރޮޕާ ލީގު ކާމިޔާބުކޮށްފައެވެ. އަދި ފްރާންސްގެ ގައުމީ ފުޓްބޯޅަ ޓީމާއެކު 2016 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ރަނަރަޕްކަން ހޯދި މާޝިއަލް ވަނީ ގައުމީ ޓީމަށް ކުޅުނު 27 މެޗުގައި އެއް ލަނޑު ޖަހާފައެވެ.