ފްރާންސްގެ މިޑްފީލްޑަރު ފްރޭންކް ރިބެރީ އަލުން ބަޔާން މިއުނިކާ ނުގުޅޭނެ ކަމަށް އެ ޓީމުގެ ސީއީއޯ އޮލިވާ ޚާން ވިދާޅުވެއްޖެއެވެ.

ބަޔާނުގައި 12 އަހަރު ހޭދަކުރުމަށްފަހު އުމުރުން 38 އަހަރުގެ ރިބެރީ ފިއޮރެންޓީނާއާ ގުޅުނީ ހިލޭ ޓްރާންސްފާއެއްގެ ދަށުން 2019 ވަނަ އަހަރުގެ އޯގަސްޓް މަހުގެ ތެރޭގައެވެ. އެކަމަކު ފިއޮރެންޓީނާއާއެކު ރިބެރީ ހަދާފައި އޮތް އެއްބަސްވުން މިދިޔަ ޖޫން މަހު ވަނީ ހަމަވެފައެވެ. އެއާއެކު ރިބެރީ މިހާރު އަންނަނީ ބަޔާނުގެ އައު ކޯޗު ހޫލިއަން ނާގަލްސްމަނުގެ ސްކޮޑާއެކު ފަރިތަކުރަމުންނެވެ. ނަމަވެސް ދާދި ފަހުން ދިން އިންޓަވިއުއެއްގައި ބަޔާނުގެ ސީއީއޯ އޮލިވާ ޚާން ވިދާޅުވީ ރިބެރީގެ ސޮއި ހޯދުމުގެ ވިސްނުމެއް ބަޔާނުން މިހާރު ނުގެންގުޅޭ ކަމަށެވެ.

މި ވަގުތު ކުލަބެއް ނެތި ރިބެރީ ހުރިއިރު، މީގެ ކުރިން ގަލަސަތަރާއި އާއި މާސޭއަށް ކުޅެފައިވާ ރިބެރީ އެންމެ ފުރަތަމަ ބަޔާނަށް ބަދަލުވީ 2007 ވަނަ އަހަރުގެ ސީޒަނުގައެވެ. އޭނާ ވަނީ މީގެ ކުރިން ބަޔާނަށް ކުޅެދިން 425 މެޗުގައި 124 ލަނޑު ކާމިޔާބު ކޮށްފައެވެ. ބަޔާނާއެކު ރިބެރީ 20 ށްވުރެ ގިނަ ތަށި ހޯދިފައިވާއިރު، އޭގެ ތެރޭގައި ޖަރުމަން ލީގު ނުވަ ފަހަރު ހިމެނެއެވެ. އަދި ވަނީ ބަޔާނާއެކު ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕުވެސް ކާމިޔާބުކޮށްފައެވެ.

ބަޔާން ދޫކޮށްލުމަށްފަހު ރިބެރީ ފިއޮރެންޓީނާގައި ދެ ސީޒަން ހޭދަކުރިއިރު، އޭނާ ވަނީ އެ ޓީމަށް ކުޅެދިން 51 މެޗުގައި ފަސް ލަނޑު ޖަހާފައެވެ. މީގެ އިތުރުން ފްރާންސް ގައުމީ ފުޓްބޯޅަ ޓީމާއެކު 2006 ވަނަ އަހަރުގެ ފީފާ ވޯލްޑް ކަޕުގެ ރަނަރަޕްކަން ހޯދި ރިބެރީ ވަނީ ގައުމީ ޓީމަށް ކުޅުނު 81 މެޗުގައި 16 ލަނޑު ކާމިޔާބުކޮށްފައެވެ. ރިބެރީ ގައުމީ ޓީމަށް ކުޅުން ހުއްޓާލާފައިވަނީ 2014 ވަނަ އަހަރުގެ ތެރޭގައެވެ.