ބެއިންޖިން ލެބެއްގެ ސީނިއަރ ސައިންޓިސްޓަކު 2020 ވަނަ އަހަރުގެ ކުރީކޮޅު ކޮވިޑަށް ޕޮޒިޓިވްވިކަން ހާމަވެއްޖެއެވެ.

ޗައިނާގެ ލެބެއްގެ ތެރެއިން ސައިންޓިސްޓަކުގެ ކޮވިޑަށް ޕޮޒިޓިވްވިކަން ފުރަތަމަ ފަހަރަށް ހާމަވެފައިވާއިރު، މިކަން ހާމަވެފައި ވަނީ އެމެރިކާއިން ހޯދާފައިވާ އީމެއިލް ތަކަކުންނެވެ. އެގޮތުން ވައިރަސް ފެނުނު ޗައިނާގެ ނެޝަނަލް އިންސްޓިޓިއުޓް ފޮރ ވައިރަލް ޑިޒީސް ކޮންޓްރޯލް އެންޑް ޕްރިވެންޝަން (އެންއައިވީޑީސީ) އަކީ ޗައިނާގެ ސެންޓަރ ފޮރ ޑިޒީސް ކޮންޓްރޯލް އެންޑް ޕްރިވެންޝަން ގެ ލެބެކެވެ. 2004 ވަނަ އަހަރުވެސް ސަރސް ވައިރަސްގެ އައުޓްބްރޭކެއް ވަނީ މިލެބާ ގުޅިފައެވެ.

ބެއިޖިންގެ ލެބަކުން ސީނިއަރ ސައިންޓިސްޓަކު ކޮވިޑަށް ޕޮޒިޓިވްވެފައިވާ ކަމުގެ މައުލޫމާތު އާންމުވުމާއެކު ވަޔަރޮލޮޖީ ލެބުތަކުގެ ސަލާމަތާއި ރައްކާތެރިކަމާ މެދު ސުވާލުތައް ވަނީ އުފެދިފައެވެ. ވަކިން ޚާއްސަކޮށް ޗައިނާ ސަރުކާރުގެ މިފަދަ ލެބުތަކުގެ ރައްކާތެރިކަމާމެދު ގިނަ ބަޔަކު ދަނީ ސުވާލު އުފައްދަމުންނެވެ.

ކޮވިޑް-19 ފުރަތަަމަ ފެނިފައި ވަނީ ޗައިނާގެ ވޫހާނުން ކަމަށް ވެފައި އެއީ ވޫހާންގެ ލެބަކުން ފެނުނު ވައިރަހެއްތޯ ބެލުމުގެ ތަހުގީގުތައް ދަނީ ކުރަމުންނެވެ. އެގޮތުން ކޮވިޑް އުފެދުނު ގޮތާއިމެދު އެމެރިކާއިން އެކުލަވާލި ރިޕޯޓުން ކޮވިޑް އުފެދިފައިވަނީ ޗައިނާގެ ވޫހާން ސިޓީގެ ލެބުންކަން އެނގިފައިވާކަން ވަނީ ހާމަވެފައެވެ.

މި ރިޕޯޓުގައި, ކޮވިޑް އުފެދުނު ގޮތުގެ ތަފްސީލު ދީފައިވާއިރު، އެއަށް ބާރުދޭ ގިނަ ހެކިތަކެއް ވަނީ ހިމަނާފައެވެ. އޭގެ ތެރޭގައި ވޫހާންގެ ލެބޯޓްރީގެ ޗީފް، އެ ލެބޯޓްރީގައި މަސައްކަތް ކުރާ ސައިންސްވެރިންނަށް ފޮނުވާފައިވާ މެއިލްތަކެއް ވެސް ވަނީ ހިމަނާފައެވެ. މިއީ މީގެ ކުރިން އެމެރިކާގެ ސްޓޭޓް ޑިޕާޓްމަންޓުން ލީކުކޮށްލާފައިވާ މެއިލްތަކެއްވެސްމެއެވެ.

ކޮރޯނާވައިރަސް ދުނިޔެއަށް ފެތުރުނީ ވޫހާންގެ ލެބަކުން ލީކުވެގެން ކަމަށް ދެކެވޭ ވާހަކަ ފަހަކަށް އައިސް ވަނީ އިތުރުވެފައެވެ. ނަމަވެސް އެއީ އެއްވެސް ހަގީގަތެއް ނެތް ކޮންސްޕިރެސީ ތިއަރީއެއް ކަމަށް ޗައިނާ ސަރުކާރުން ދަނީ ބުނަމުންނެވެ.